വടകര: മിനി സിവില് സ്റ്റേഷനില് പ്രവര്ത്തിക്കുന്ന കൃഷി അസിസ്റ്റന്റ് ഡയറക്റ്ററുടെ ഓഫീസിന്റെ സീലിംഗ് തകര്ന്ന് വീണു. ഇന്നലെ ഉച്ചയോടെയാണ് സംഭവം. കൃഷി അസിസ്റ്റന്റ് ഡയറക്റ്ററും മറ്റു ജീവനക്കാരും ഉച്ച ഭക്ഷണത്തിനു പുറത്തേക്ക് ഇറങ്ങുന്ന സമയത്താണ് അപകടം. തലനാരിഴക്കാണ് ദുരന്തം ഒഴിവായത്.
സിവില് സ്റ്റേഷനിലെ രണ്ടാം നിലയിലാണ് ഓഫീസ് പ്രവര്ത്തിക്കുന്നത്. സിവില് സ്റ്റേഷന് കെട്ടിടത്തിന്റെ പല ഭാഗങ്ങളും അപകടാവസ്ഥയിലായിട്ട് വര്ഷങ്ങളായി. പല ഘട്ടങ്ങളിലായി വന് ബീമുകളടക്കം തകര്ന്നു വീണെങ്കിലും ഇതിന് പരിഹാരം കാണാന് അധികൃതര് ഇതേവരെ തയ്യാറായിട്ടില്ല. നിരവധി ജീവനക്കാരും, പല ഓഫീസുകളിലായി ദിനം പ്രതി നൂറുകണക്കിന് പൊതുജനങ്ങളും സിവില് സ്റ്റേഷനില് എത്തുന്നുണ്ട്.
എന്നാല് പല തവണ പൊതുമരാമത്ത് വിഭാഗത്തിന് ഇതു സംബന്ധിച്ച് മുന്നറിയിപ്പ് നല്കിയതിനെ തുടര്ന്ന് എസ്റ്റിമേറ്റ് തയ്യാറാക്കി കോഴിക്കോട് അസിസ്റ്റന്റ് എക്സിക്യൂട്ടീവ് എഞ്ചിനീയര്ക്ക് അയച്ചു കൊടുത്തതായി തഹസില്ദാര് പി.കെ.സതീഷ്കുമാര് പറഞ്ഞു.
അടിയന്തിരമായി ചെയ്യേണ്ട പ്രവൃത്തികള്ക്ക് ഉടന് അനുമതി നല്കണമെന്ന് ആവശ്യപ്പെട്ട് ഇ-മെയില് സന്ദേശം അയച്ചതായും തഹസില്ദാര് പറഞ്ഞു.
പ്രതികരിക്കാൻ ഇവിടെ എഴുതുക: