പയ്യന്നൂര്: സ്വാതന്ത്ര്യ സമരസേനാനികളുടെ ജീവിതഗാഥകളും ഹൃദയ സ്പന്ദനങ്ങളും നിറഞ്ഞു നില്ക്കുന്ന പൈതൃകഭൂമിയായ പയ്യന്നൂരില് ഗാന്ധിസ്മൃതി മ്യൂസിയം സ്ഥാപിക്കുമെന്ന് മന്ത്രി രാമചന്ദ്രന് കടന്നപ്പള്ളി അറിയിച്ചു. പയ്യന്നൂര് പഴയ പൊലീസ് സ്റ്റേഷന്റെ ശാസ്ത്രീയ സംരക്ഷണ പ്രവൃത്തികള്, ദേശീയ സ്വാതന്ത്ര്യ സമരവും പയ്യന്നൂരും എന്ന വിഷയത്തിലുള്ള സെമിനാര് എന്നിവയുടെ ഉദ്ഘാടനം നിര്വ്വഹിക്കുകയായിരുന്നു അദ്ദേഹം.
ചരിത്രപ്രാധാന്യം കണക്കിലെടുത്ത് സംസ്ഥാന പുരാവസ്തു വകുപ്പ് സംരക്ഷിത സ്മാരകമായി പ്രഖ്യാപിച്ച പൊലീസ്സ്റ്റേഷന് കെട്ടിടത്തിന്റെ സമഗ്ര സംരക്ഷണ പ്രവൃത്തികള് നടത്തുന്നതിന് സര്ക്കാര് 90 ലക്ഷം രൂപ അനുവദിക്കുകയും ഇ-ടെണ്ടര് നടപടികള് പൂര്ത്തിയാക്കി കരാറുകാരനെ ഏല്പ്പിക്കുകയും ചെയ്തതായി അദ്ദേഹം പറഞ്ഞു. പൗരാണിക കെട്ടിടങ്ങളുടെ ശാസ്ത്രീയ സംരക്ഷണത്തിനുള്ള മാനദണ്ഡങ്ങള് കൃത്യമായി പാലിച്ചുകൊണ്ടാണ് പ്രൃത്തികള് നടത്തുകയെന്നും അദ്ദേഹം അറിയിച്ചു.
ചടങ്ങില് സി.കൃഷ്ണന് എംഎല്എ അധ്യക്ഷത വഹിച്ചു. പുരാവസ്തു വകുപ്പ് ഡയറക്ടര് ജെ.റെജികുമാര്, പയ്യന്നൂര് നഗരസഭാ ചെയര്മാന് അഡ്വ. ശശി വട്ടക്കൊവ്വല്, പയ്യന്നൂര് ബ്ലോക്ക് പഞ്ചായത്ത് പ്രസിഡണ്ട് സി.സത്യപാലന്, പുരാവസ്തു വകുപ്പ് എഡ്യുക്കേഷന് ഓഫീസര് ടി.കെ കരുണാദാസ് തുടങ്ങി സാമൂഹ്യ-രാഷ്ട്രീയ-സാംസ്കാരിക രംഗത്തെ പ്രമുഖര് ചടങ്ങില് സംബന്ധിച്ചു. ദേശീയ സ്വാതന്ത്ര്യ സമരവും പയ്യന്നൂരും എന്ന വിഷയത്തില് നടന്ന ചരിത്ര സെമിനാറില് കേരള ചരിത്ര പൈതൃക മ്യൂസിയം എക്സിക്യൂട്ടീവ് ഡയറക്ടര് ഡോ.എസ് റെയ്മണ് വിഷയം അവതരിപ്പിച്ചു. നീലേശ്വരം നഗരസഭ ചെയര്മാന് പ്രൊഫ. കെ.പി ജയരാജന് മോഡറേറ്ററായി. ചര്ച്ചയില് ഡോ. ടി.പവിത്രന്, ഡോ.എം.ടി.നാരായണന്, ഡോ.പി.ജെ വിന്സെന്റ് പങ്കെടുത്തു.
പ്രതികരിക്കാൻ ഇവിടെ എഴുതുക: