പാലാ: അത്ലറ്റിക് ചാമ്പ്യന്ഷിപ്പുകളില് ഏറ്റവും ഗ്ലാമര് പോരാട്ടമായ 100 മീറ്ററില് അതിവേഗത്തില് പറന്നെത്തി പെണ്കുട്ടികളില് ജൂനിയര് വിഭാഗത്തിലെ ആന്സി സോജനും ആണ്കുട്ടികളില് സീനിയര് വിഭാഗത്തിലെ ആന്സ്റ്റിന് ജോസഫ് ഷാജിയും വേഗമേയറിയ താരങ്ങളായി.
സീനിയര് പെണ്കുട്ടികളില് കോഴിക്കോട് പുല്ലൂരാംപാറ സെന്റ് ജോസഫ് എച്ച്എസ്എസിലെ അപര്ണ റോയിയേക്കാള് മികച്ച സമയത്തില് ഫിനിഷ് ചെയ്താണ് ആന്സി വേഗപ്പറവയായത്. അപര്ണ 12.49 സെക്കന്റില് ഫിനിഷ് ലൈനിലേക്ക് പറന്നെത്തിയപ്പോള് 12.45 സെക്കന്ഡിലാണ് ജൂനിയര് വിഭാഗത്തില് തൃശൂര് , നാട്ടിക ഗവ.ഫിഷറീസ് ഹയര് സെക്കന്ഡറി സ്കൂളിലെ ആന്സിയുടെ ഫിനിഷിങ്ങ്. മലപ്പുറം കടക്കാശ്ശേരി ഐഡിയല് സ്കൂളിന്റെ അഞ്ജലി പി.ഡി 12.72 സെക്കന്ഡില് വെള്ളിയും കോട്ടയം ഭരണങ്ങാനം സ്പോര്ട്സ് കൗണ്സില് ഹോസ്റ്റലിലെ ആന്റോസ് ടോമി 12.80 സെക്കന്ഡില് വെങ്കലവും നേടി.
സീനിയര് ആണ്കുട്ടികളുടെ വിഭാഗം 100 മീറ്ററില് ട്രാക്കില് മിന്നല്പ്പിണര് കണക്കെ കുതിച്ചാണ് തിരുവനന്തപുരം സായിയിലെ ആന്സ്റ്റിന് ജോസഫ് ഷാജി ഫാസ്റ്റസ്റ്റായത്. 11.04 സെക്കന്ഡിലായിരുന്നു ആന്സ്റ്റിന്റെ ഫിനിഷിങ്ങ്. എറമണാകുളം തുറവൂര് മാര് അഗസ്റ്റിന്സ് എച്ച്എസ്എസിലെ നിബിന് ബൈജു 11.08 സെക്കന്ഡില് വെള്ളി നേടിയപ്പോള് കോതമംഗലം സെന്റ് ജോര്ജ് എച്ച്എസ്എസിലെ മുഹമ്മദ് നൂര് ഹഖ് 11.23 സെക്കന്ഡില് വെങ്കലം സ്വന്തമാക്കി.
സീനിയര്പെണ്കുട്ടികളുടെ വിഭാഗത്തില് 12.49 സെക്കന്ഡിലാണ് അപര്ണ്ണ റോയ് പൊന്നിലേക്ക് പറന്നെത്തിയത്. തിരുവനന്തപുരം സായിയിലെ നിഭ കെ.എം 12.58 സെക്കന്ഡില് വെള്ളിയും ആലപ്പുഴ ചാരമംഗലം ജിഡിവിഎച്ച്എസ്എസിലെ രേഷ്മ. ജി 12.78 സെക്കന്ഡില് വെങ്കലവും നേടി. നിഭയ്ക്ക് കഴിഞ്ഞ വര്ഷം വെങ്കലമായിരുന്നു ലഭിച്ചത്.
ജൂനിയര് ആണ്കുട്ടികളില് സായ് തിരുവനന്തപുരത്തിന്റെ സി. അഭിനവ് 11.08 സെക്കന്ഡില് പറന്നെത്തിയാണ് വേഗത്തിന്റെ കുട്ടിത്തമ്പുരാനായത്. കോഴിക്കോട് പുല്ലൂരാംപാറ സെന്റ് ജോസഫ് എച്ച്എസ്എസിലെ അരുണ്. എ.സി 11.21 സെക്കന്ഡില് വെള്ളിയും തിരുവനന്തപുരം സായിയുടെ തന്നെ അഖില് ബാബു 11.37 സെക്കന്ഡില് വെങ്കലവും കരസ്ഥമാക്കി.
സബ് ജൂനിയര് പെണ്കുട്ടികളുടെ വിഭാഗത്തില് പാലക്കാട് പറളി സ്കൂളിന്റെ നേഹ. വി 13.46 സെക്കന്ഡില് സ്വര്ണ്ണം നേടിയപ്പോള് കോഴിക്കോട് പുല്ലൂരാംപാറ സെന്റ് ജോസഫ് എച്ച്എസ്എസിലെ സാനിയ ട്രീസ ടോമി 13.49 സെക്കന്ഡില് വെള്ളിയും തിരുവനന്തപുരം ജി.വി. രാജ സ്പോര്ട്സ് സ്കൂളിലെ അലീന സെബാസ്റ്റിയന് വെങ്കലവും നേടി.
ഇതേ വിഭാഗം ആണ്കുട്ടികളില് സ്വര്ണ്ണം നേടിയത് മണിപ്പൂരുകാരന്. കോതമംഗലം സെന്റ് ജോര്ജ് എച്ച്എസ്എസിന്റെ താരമായ താങ്ജാം അലേര്ട്സണ് സിങ് 12.34 സെക്കന്ഡില് ഒന്നാമതെത്തി. കോട്ടയം കുറുമ്പനാടം സെന്റ് പീറ്റേഴ്സ് എച്ച്എസ്എസിലെ റെനീന് ഇമ്മാനുവല് തോമസ് 12.48 സെക്കന്ഡില് വെള്ളിയും തൃശൂര് വലപ്പാട് ജിവിഎച്ച്എസ്എസിലെ മുഹമ്മദ് റമീസ് 12.57 സെക്കന്ഡില് വെങ്കലവും നേടി.
പ്രതികരിക്കാൻ ഇവിടെ എഴുതുക: