വടകര: മകന്റെ ഭാര്യയെ ലൈംഗികമായി പീഡിപ്പിച്ചെന്ന പരാതിയില് ഭര്തൃ പിതാവ് അറസ്റ്റില്. നടക്കുതാഴ കുറുമ്പയില് ആവങ്കോട്ട് മലയില് ദിനേശ് ബാബു(54)നെയാണ് വടകര എസ്ഐ എം. സനല്രാജ് അറസ്റ്റ് ചെയ്തത്. വടകര ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതി മുമ്പാകെ ഹാജരാക്കിയ പ്രതിയെ മജിസ്ട്രേറ്റ് എം.ടി. ജലജാറാണി പതിനാല് ദിവസത്തേക്ക് റിമാന്ഡ് ചെയ്തു.
പ്രതിയുടെ മകന് സുബീഷിന്റെ ഭാര്യ അശ്വതിയെ പീഡനം സഹിക്ക വയ്യാതെ കഴിഞ്ഞ ഒക്ടോബര് ഒന്നിന് ഭര്തൃവീട്ടില് തൂങ്ങി മരിച്ച നിലയില് കണ്ടെത്തിയിരുന്നു. നാല് വര്ഷം മുമ്പാണ് സുബീഷും അശ്വതിയും തമ്മിലുള്ള വിവാഹം നടന്നത്. കല്യാണം കഴിഞ്ഞ് ഏതാനും മാസങ്ങള്ക്ക് ശേഷം തന്നെ ബാബുവിന്റെ പീഡനം തുടങ്ങിയിരുന്നു. ആദ്യം ലൈംഗീക ചുവയോടെയുള്ള സംസാരമായിരുന്നു. പിന്നീട് അശ്വതിയെ പല തവണ കയറി പിടിച്ചതായും പരാതിയില് പറയുന്നു. ഈ വസ്തുതകള് അശ്വതി ഡയറിയില് എഴുതി വച്ചതാണ് പ്രതിയുടെ അറസ്റ്റിലേക്ക് എത്തിച്ചത്.
ഡയറി വായിച്ച അശ്വതിയുടെ സഹോദരന് അക്ഷയ് ആണ് പോലീസില് പരാതി നല്കിയത്. ഇതിനെ തുടര്ന്ന് ഡയറിയും പോലീസ് കസ്റ്റഡിയില് എടുത്തു. ഐപിസി 306, 354 എന്നീ വകുപ്പുകള് പ്രകാരമാണ് പ്രതിക്കെതിരെ കേസെടുത്തത്.
പ്രതികരിക്കാൻ ഇവിടെ എഴുതുക: