തൊടുപുഴ: തൊണ്ടിക്കുഴ ഗവ. യുപി സ്കൂളിലെ കിണറ്റില് സാമൂഹ്യവിരുദ്ധര് മരപ്പട്ടിയെ തല്ലിക്കൊന്ന് തള്ളി.
ചാലംകോട് ക്ഷേത്രത്തിന്റെ മുന്വശത്തായി സ്കൂള് ചുറ്റുമതിലിനോട് ചേര്ന്ന് നില്ക്കുന്ന മൂടിയുള്ള കിണറ്റിലാണ് കല്ല് കെട്ടി താഴ്ത്തിയ നിലയില് മരപ്പട്ടിയെ കണ്ടെത്തുന്നത്. മണം വന്നതിനെ തുടര്ന്ന് സ്കൂള് അധികൃതര് ഇന്നലെ വൈകിട്ട് കിണര് വെള്ളം വറ്റിച്ചിരുന്നു. ഈ സമയത്താണ് മരപ്പട്ടിയെ കണ്ടെത്തുന്നത്. പ്രദേശത്തിരുന്ന് മദ്യപിച്ചതിന്റെ ലക്ഷണങ്ങളുണ്ട് ഇവരാണ് ഇതിന്റെ പിന്നിലെന്നാണ് സംശയിക്കുന്നത്.
ഇരുമ്പ് കൂടും അതിനെ പുറമെ നെറ്റും ഇട്ടിട്ടുള്ള കിണറാണിത്. ഒരു കാരണവശാലും മരപ്പട്ടിയോ മറ്റ് ജീവികളോ ഇതില് ചാടാനുള്ള സാധ്യത ഇവിടെ ഇല്ലെന്ന് സ്കൂള് ഹെഡ്മാഷ് സി.സി. രാജന് പറഞ്ഞു. രാത്രി കാലങ്ങളില് സ്കൂളില് സാമൂഹ്യവിരുദ്ധര് അഴിഞ്ഞാടുകയാണ്. ചുറ്റുമതില് ഉണ്ടെങ്കിലും രാത്രികാലങ്ങളില് സ്കൂളിന്റെ ഗേറ്റ് പൂട്ടാറില്ല. ഇതും ഇത്തരക്കാര്ക്ക് അനുകൂലമാകുകയാണ്. 130ഓളം കുട്ടികള് പഠിക്കുന്ന സ്കൂളിലാണ് ഇത്തരത്തിലുള്ള സംഭവങ്ങള് തുടരുന്നത്.
മുന്പ് നിരവധി തവണ ഇവിടെ പ്രശ്നങ്ങള് ഉണ്ടായിരുന്നു. സംഭവത്തില് ഇന്ന് പോലീസില് പരാതി നല്കുമെന്ന് വാര്ഡ് മെമ്പര് ടി.എം. മുജീബ് പറഞ്ഞു. ലൈറ്റും മറ്റ് സുരക്ഷാ സംവിധാനങ്ങളും സ്കൂളില് സ്ഥാപിക്കണമെന്ന ആവശ്യം നാട്ടുകാര് ഉയര്ത്തുന്നുണ്ട്. മേഖലയില് മദ്യപരുടെ ശല്യം കൂടിയിട്ടും പോലീസ് തിരിഞ്ഞ് നോക്കുന്നില്ലെന്ന ആരോപണവും ശക്തമാണ്.
പ്രതികരിക്കാൻ ഇവിടെ എഴുതുക: