വടക്കഞ്ചേരി:മംഗലംഡാമിലെ സന്ദര്ശകര്ക്കായി അടിസ്ഥാന സൗകര്യമുള്പ്പെടെയുള്ള പ്രവര്ത്തനങ്ങള് തുടങ്ങുന്നതിന്മുന്നോടിയായി എം.എല്.എ ഉള്പ്പെടെയുള്ള സംഘം സ്ഥലം സന്ദര്ശിച്ച് വിലയിരുത്തി. പണികളുടെ പ്രവര്ത്തനങ്ങള്ക്കായി വാപ്കോസ് എന്ന ഏജന്സിയെ ഏല്പ്പിക്കാനും തീരുമാനിച്ചു.
കൂടുതല് സഞ്ചാരികളെ മംഗലംഡാമിലേക്ക് ആകര്ഷിക്കുന്നതിനായി അഡ്വഞ്ചര് ടൂറിസം ആണ് പ്രധാനമായും ലക്ഷ്യമിടുന്നത്.ഇതിനായി വിവിധ സാഹസിക ഇനങ്ങള് ഇവിടെ ഒരുക്കും .കൂടാതെ കുട്ടികളുടെ പാര്ക്ക് ഇപ്പോള് ഇരിക്കുന്നിടത്തു നിന്നും മാറ്റി ഡാമിന്റെ പരിസരത്ത് തന്നെ ഒരുക്കുകയാണ് ലക്ഷ്യം. ഇതിലൂടെ കുട്ടികള്ക്ക് ഒരേ സമയം ഡാമിന്റെ ആസ്വാദനത്തോടൊപ്പം കളിക്കാനുള്ള സൗകര്യവും ലഭിക്കും.
ഒരു ഓപ്പണ് ഓഡിറ്റോറിയവും സമീപത്തായി പണി കഴിക്കുന്നതിലൂടെ സാംസ്ക്കാരിക പരിപാടികളും മറ്റും എല്ലാവര്ക്കും എവിടെ നിന്നും കാണാവുന്ന രീതിയില് സൗകര്യമൊരുക്കും. നക്ഷത്ര ബംഗ്ലാവും പരിസരവും നവീകരിച്ച് വിശ്രമസ്ഥലം ഉള്പ്പെടെ തയ്യാറാക്കും, മുളകൊണ്ടുള്ള ചങ്ങാടം നിര്മ്മിച്ച് പരിശീലനം ലഭിച്ചവരിലൂടെ ഡിമിലൂടെ സവാരി, തുടങ്ങിയവയുടെ പ്രവര്ത്തനങ്ങളാണ് രണ്ടാം ഘട്ട നിര്മ്മാണ പ്രവര്ത്തനത്തില് ഉള്പ്പെടുത്തുന്നത്.
ഇതിനായി ടൂറിസം വകുപ്പ് നാലു കോടി രൂപയാണ് അനുവദിച്ചിരിക്കുന്നത്.ടൂറിസം പ്രമോഷന് കൗണ്സിലിന്റെ അനുമതി ലഭിച്ചയുടന് നവീകരണ പ്രവര്ത്തനങ്ങള് ആരംഭിക്കാനാണ് തീരുമാനം കെ.ഡി.പ്രസേനന് എം.എല്.എയെ കൂടാതെ ടൂറിസം പ്രമോഷന് കൗണ്സില് സെക്രട്ടറി അജീഷ്,എക്സി:എഞ്ചിനീയര് എം.വി.സുനീതി, വണ്ടാഴി പഞ്ചായത്ത് പ്രസിഡണ്ട് സുമാവലി മോഹന്ദാസ് എന്നിവരും സംഘത്തില് ഉണ്ടായിരുന്നു.
പ്രതികരിക്കാൻ ഇവിടെ എഴുതുക: