ഹൈദരാബാദ്: ഭര്ത്താവിനെ കൊന്ന്, കാമുകനെ ഭര്ത്താവാക്കി മാറ്റാന് ശ്രമിച്ച യുവതിക്ക് പ്രചോദനമായത് തെലുങ്കു സിനിമ. സംഭവത്തിന്റെ ചുരുളയിക്കാന് സഹായിച്ചത് മട്ടന് സൂപ്പും.
കാമുകനുമൊത്ത് ജീവിക്കാന് തീരുമാനിച്ച എം. സ്വാതി എന്ന നഴ്സ് അതിനായി തയാറാക്കിയത് വിചിത്രമായ പദ്ധതി.
നാഗര്കുര്ണൂലിലെ സ്വകാര്യ ആശുപത്രിയില് നഴ്സായ സ്വാതിയെ അറസ്റ്റ് ചെയ്തപ്പോഴാണ് ക്രൂരമായ ഒരു ആസൂത്രണം പോലീസ് ഉദ്യോഗസ്ഥരെപ്പോലും ഞെട്ടിച്ചത്. ഇരുപത്തേഴുകാരിയായ സ്വാതി മൂന്നു വര്ഷം മുമ്പാണ് സുധാകര് റെഡ്ഡിയെ വിവാഹം ചെയ്തത്. ഒരു കുഞ്ഞുമായി. പിന്നീട് ആശുപത്രിയില് ഒപ്പം ജോലി ചെയ്തിരുന്ന ഫിസിയോതെറാപ്പിസ്റ്റ് രാജേഷുമായി പ്രണയത്തിലായി.
കടുത്ത പ്രണയത്തിനൊടുവില് രാജേഷിനൊപ്പം ഇനിയുള്ള ജീവിതം എന്ന് സ്വാതി തീരുമാനിച്ചു. ഭര്ത്താവിനെ എന്നന്നേക്കുമായി ഒഴിവാക്കി ആ സ്ഥാനത്ത് കാമുകനെ പ്രതിഷ്ഠിക്കാന് സ്വാതിയുടെ മെഡിക്കല് ബുദ്ധി പദ്ധതി തയാറാക്കി. കഴിഞ്ഞ മാസം ഇരുപത്തേഴിന് അനസ്തേഷ്യക്കുള്ള മരുന്നു നല്കി ബോധം കെടുത്തിയ ശേഷം തലയ്ക്കടിച്ച് സുധാകരിനെ വധിച്ചു. മൃതദേഹം കാട്ടില് തള്ളി. പിന്നീട് രാജേഷിന്റെ മുഖത്ത് ആസിഡ് ഒഴിച്ച് വികൃതമാക്കിയതും സ്വാതിയുടെ ബുദ്ധി. ഭര്ത്താവിനെ അജ്ഞാതര് ആക്രമിച്ചെന്നും മുഖത്ത് ആസിഡ് ഒഴിച്ചെന്നും കഥയുണ്ടാക്കി. സുധാകറായി രാജേഷിനെ അവതരിപ്പിച്ചു. മുഖത്ത് പ്ലാസ്റ്റിക് സര്ജറിക്കായി രാജേഷിനെ ആശുപത്രിയില് പ്രവേശിപ്പിച്ചു.
ആശുപത്രിയില് രോഗികള്ക്കുള്ള ഭക്ഷണത്തിപ്പം നല്കിയ മട്ടന് സൂപ്പു കഴിക്കാന് വിസമ്മതിച്ച രാജേഷ് താന് വെജിറ്റേറിയനാണെന്നും പറഞ്ഞു. എന്നാല് സുധാകര് വെജിറ്റേറിയനായിരുന്നില്ല. രാജേഷിന്റെ പെരുമാറ്റത്തില് സുധാകറിന്റെ കുടുംബത്തിനു സംശയങ്ങള് തോന്നി. കുടുംബാംഗങ്ങളെക്കുറിച്ചുള്ള ചോദ്യങ്ങള്ക്ക് രാജേഷ് കൃത്യമായി ഉത്തരം നല്കാഞ്ഞതോടെ അവര് പോലീസില് പരാതിപ്പെട്ടു.
ആശുപത്രിയില് പ്രവേശിപ്പിച്ചിരിക്കുന്നത് സുധാകറിനെയല്ല രാജേഷിനെയാണെന്ന് തുടക്കത്തില്ത്തന്നെ പോലീസിനു വ്യക്തമായി. സ്വാതിയെ കസ്റ്റഡിയെടുത്തു ചോദ്യം ചെയ്തപ്പോള് ആള്മാറാട്ട ആസൂത്രണത്തിന്റെ ചുരുളഴിഞ്ഞു. 2014ല് യെവാഡു എന്ന തെലുങ്കു സിനിമ കണ്ടപ്പോഴാണ് ഇങ്ങനെയൊരു പദ്ധതി മനസിലുദിച്ചതെന്നും സ്വാതി പറഞ്ഞു. തന്റെ മകന് മരിക്കുമ്പോള് ആ മുഖം മറ്റൊരു ചെറുപ്പക്കാരന് നല്കുന്ന പ്ലാസ്റ്റിക് സര്ജന്റെ കഥയായിരുന്നു യെവാഡു. ആശുപത്രിയില് നിന്ന ഡിസ്ചാര്ജ് ചെയ്താലുടന് രാജേഷിനേയും അറസ്റ്റ് ചെയ്യുമെന്ന് പോലീസ് പറഞ്ഞു.
പ്രതികരിക്കാൻ ഇവിടെ എഴുതുക: