കോട്ടയം: എസ്എസ്എല്സി പരീക്ഷയില് പരാജയപ്പെട്ടവരെ പോലീസ് വിജയത്തിന്റെ വഴിയിലേക്ക് കൈപിടിച്ച് കയറ്റുന്നു. പരാജയത്തെ തുടര്ന്നുണ്ടാകുന്ന നിരാശയില് നിന്ന് സാമൂഹ്യ വിരുദ്ധരുടെ കൈകളില് കുട്ടികള് എത്തിപ്പെടാതെയിരിക്കാനും ഭാവിയില് നാടിനും സമൂഹത്തിനും ഗുണമുള്ളവരാക്കി മാറ്റുന്നതിനുമായി ആവിഷ്ക്കരിച്ച ‘പ്രോജക്ട് ഹോപ്പ്’ എന്ന പദ്ധതിയാണ് കുട്ടികള്ക്ക് വഴികാട്ടിയാകുന്നത്.
ജില്ലയില് കഴിഞ്ഞ എസ്എസ്എല്സി പരീക്ഷയില് പരാജയപ്പെട്ട 44 വിദ്യാര്ത്ഥികളെയാണ് ഈ പദ്ധതിയില് ചേര്ത്തിട്ടുള്ളത്. ഇവര്ക്ക് ഗുഡ് ഷെപ്പേര്ഡ് കോളേജ്. നാട്ടകം, പാലാ സെന്ററുകള്, പൊന്കുന്നം ട്യൂഷന്സെന്റര്, മാഞ്ഞൂര് ട്യൂഷന്സെന്റര്, കറുകച്ചാല് പോലീസ് സ്റ്റേഷന് എന്നിവടങ്ങളില് സൗജന്യ ട്യൂഷന് ക്ലാസുകള് നല്കുന്നുണ്ട്. കുട്ടികളുടെ വിദ്യാഭ്യാസ കാര്യങ്ങള്ക്ക് മേല്നോട്ടം വഹിക്കുന്നതിനായി ഒരോ കുട്ടിക്കും പ്രത്യേകം പോലീസ് ഉദ്യോഗസ്ഥരെയും പ്രദേശത്തെ റസിഡന്സ് അസോസിയേഷന് പ്രതിനിധിയേയും ഒരു അദ്ധ്യാപകനെയും ഏര്്പ്പെടുത്തിയിട്ടുണ്ട്. കൂടാതെ കുട്ടികളുടെ വീടുകളില് പോലീസ് ഉദ്യോഗസ്ഥര് സന്ദര്ശിച്ച് പഠനപുരോഗതി വിലയിരുത്തും. പദ്ധതിയുടെ പ്രവര്ത്തനങ്ങള് ഡിസിആര്ബി ഡിവൈഎസ്പിയാണ് ഏകോപിപ്പിക്കുന്നത്.
പഠന പ്രക്രിയയുടെ ഭാഗമായി ക്രിസ്തുമസ് അവധിക്കാലത്ത് മൂന്ന് ദിവസത്തെ റസിഡന്ഷ്യല് ക്യാമ്പും ഫെബ്രുവരിയില് ഒരു മാസത്തെ റസിഡന്ഷ്യല് ക്യാമ്പും നടത്തും. പദ്ധതിയുടെ ഭാഗമായി വിദ്യാര്ത്ഥികള്ക്കും രക്ഷിതാക്കള്ക്കുമുള്ള അവബോധന ക്ലാസ് ജില്ലാ പഞ്ചായത്ത് പ്രസിഡന്റ് സക്കറിയാസ് കുതിരവേലി ഉദ്ഘാടനം ചെയ്തു. ജില്ലാ പോലീസ് മേധാവി മുഹമ്മദ് റഫീഖ് അദ്ധ്യക്ഷനായി.
പ്രതികരിക്കാൻ ഇവിടെ എഴുതുക: