ആവാസ് ഇന്‍ഷുറന്‍സ് പദ്ധതിയില്‍ അംഗമാകാന്‍ ഇതരസംസ്ഥാന തൊഴിലാളികളുടെ തിരക്ക്

Monday 18 December 2017 2:38 am IST

കാക്കനാട്: ആവാസ് സൗജന്യ ഇന്‍ഷുറന്‍സ് പദ്ധതിയുടെ ഗുണഭോക്താക്കളാകാന്‍ ഇതരസംസ്ഥാന തൊഴിലാളികളുടെ തിരക്ക്. ലക്ഷം തൊഴിലാളികളെ അംഗമാക്കാനാണ് ജില്ലാ തൊഴില്‍ വകുപ്പ് ലക്ഷ്യമിടുന്നത്. കെട്ടിട നിര്‍മാണ മേഖലയിലെ 600 ഓളം ഇതരസംസ്ഥാന തൊഴിലാളികളാണ് സിവില്‍ സ്റ്റേഷനില്‍ സംഘടിപ്പിച്ച ക്യാമ്പിലെത്തി ബയോമെട്രിക് കാര്‍ഡ് സ്വന്തമാക്കിയത്. സിവില്‍ സ്റ്റേഷനില്‍ 14 കൗണ്ടറുകളാണ് സ്ഥാപിച്ചിരുന്നത്.
ക്യാമ്പില്‍ 500 തൊഴിലാളികള്‍ക്ക് കാര്‍ഡ് നല്‍കാണ് തൊഴില്‍ വകുപ്പ് ലക്ഷ്യമിട്ടിരുന്നത്. എന്നാല്‍ സംഘാടകരുടെ കണക്കുകൂട്ടലുകള്‍ തെറ്റിച്ച് കൂടുതല്‍ തൊഴിലാളികള്‍ എത്തിയതോടെ 150 തൊഴിലാളികള്‍ക്ക് കൂടി ബയോമെട്രിക് കാര്‍ഡുകള്‍ നല്‍കി. തൃക്കാക്കര നഗരസഭ പ്രദേശത്തെ കെട്ടിട നിര്‍മാണ മേഖലകളില്‍ നിന്നെത്തിയ തൊഴിലാളികളായിരുന്നു ഭൂരിപക്ഷവും. നിര്‍മാണ മേഖലയില്‍ തൊഴില്‍ വകുപ്പ് അധികൃതര്‍ നേരിട്ടെത്തി തൊഴിലാളികളെ ക്യാമ്പിലേക്ക് എത്തിക്കാന്‍ വിവിധ ഭാഷകളില്‍ തയ്യാറാക്കിയ ലഘുലേഖകള്‍ വിതരണം ചെയ്തിരുന്നു. തെരഞ്ഞെടുപ്പ് തിരിച്ചറിയല്‍ കാര്‍ഡുകളോ മറ്റ് രേഖകളോ ഹാജാക്കിയവരെയാണ് സൗജന്യ ഇന്‍ഷുറന്‍സ് പദ്ധതിയില്‍ അംഗമായത്.
സംസ്ഥാനത്തു ജോലി ചെയ്യുന്ന ഇതര സംസ്ഥാന തൊഴിലാളികള്‍ക്ക് ആരോഗ്യ പരിരക്ഷയും അപകട ഇന്‍ഷുറന്‍സും ഉറപ്പാക്കുന്നതിനു തൊഴില്‍വകുപ്പ് നടപ്പാക്കുന്ന ആവാസ് പദ്ധതി ജനുവരി ഒന്ന് മുതല്‍ നിലവില്‍ വരും. അപകടമരണം സംഭവിക്കുന്ന ഇതരസംസ്ഥാന തൊഴിലാളികളുടെ ആശ്രിതര്‍ക്കു രണ്ടു ലക്ഷം രൂപയുടെ ധനസഹായവും തൊഴിലാളികള്‍ക്ക് വര്‍ഷം 15,000 രൂപയുടെ സൗജന്യ ചികിത്സാ സാഹായവും ഉറപ്പാക്കുന്നതാണ് പദ്ധതി.
ജില്ല തൊഴില്‍ വകുപ്പിന്റെ നേതൃത്വത്തില്‍ സംസ്ഥാന നിയമ സേവന അതോറിറ്റി, ജില്ലാ ലീഗല്‍ സര്‍വീസ് അതോറിറ്റിയുടെയും ജില്ലാ ഭരണകൂടം, ആരോഗ്യ വകുപ്പ് എന്നവയുടെ സഹകരണത്തോടെയാണ് ആവാസ് രജിസ്‌ട്രേഷന്‍ ക്യാമ്പും മെഡിക്കല്‍ ക്യാമ്പും സംഘടിപിച്ചത്. സംസ്ഥാന നിയമ സേവന അതോറിറ്റി മെംമ്പര്‍ സെക്രട്ടറി കെ. സത്യന്‍ ക്യാമ്പ് ഉദ്ഘാടനം ചെയ്തു.