'ഗവര്‍ണര്‍ പ്രവര്‍ത്തിക്കുന്നത് നോക്കുകുത്തിയെ പോലെ; പറ്റില്ലെങ്കില്‍ രാജിവെച്ച് പോണം'; ആരെയും പിണക്കാതെ മുന്നോട്ട് പോകാനാണ് സദാശിവം ശ്രമിക്കുന്നതെന്ന് ബി. ഗോപാലകൃഷ്ണന്‍

Friday 19 July 2019 11:57 am IST

തിരുവനന്തപുരം: കേരള ഗവര്‍ണ്ണര്‍ ജസ്റ്റിസ് പി. സദാശിവം ഉറക്കം വെടിയണമെന്ന് ബി.ജെ.പി ജനറല്‍ സെക്രട്ടറി ബി. ഗോപാലകൃഷ്ണന്‍. യൂണിവേഴ്‌സിറ്റികളുടെ ചാന്‍സിലറാണ് ഗവര്‍ണര്‍. എന്നാല്‍ അദേഹം ക്രമക്കേടുകള്‍ കണ്ടില്ലെന്ന് നടിക്കുകയാണ്.  കെട്ടിടങ്ങള്‍ക്ക് മുന്നില്‍ വെച്ചിരിക്കുന്ന നോക്കുകുത്തി പോലെയാണ് സദാശിവം പ്രവര്‍ത്തിക്കുന്നത്.

പറ്റില്ലെങ്കില്‍ രാജിവെച്ച് പോകണം. ഇത്രയധികം ക്രമക്കേടുകള്‍ നടന്നിട്ട് ഒന്നും മിണ്ടാതിരിക്കുന്നത് ശരിയല്ല. കേരളത്തിലെ ഗവര്‍ണര്‍ പല കാര്യങ്ങളിലും ഇടപെടുന്നില്ല. യൂണിവേഴ്‌സിറ്റി കോളേജിലും ഭരണഘടന സ്ഥാപനമായ പി.എസ്.സിയിലും ക്രമക്കേടുകള്‍ നടന്നിട്ട് രാജ്ഭവന്‍ ഒരു ചെറുവിരല്‍ അനക്കിയിട്ടില്ല. ഗവര്‍ണ്ണറുടെ കാലാവധി തീരാന്‍ ഒരു മാസംകൂടിയേ ബാക്കിയുള്ളൂ. അതുവരെ ആരെയും പിണക്കാതെ മുന്നോട്ട് പോകാനാണ് അദേഹം ശ്രമിക്കുന്നതെന്നും ബി. ഗോപാലകൃഷ്ണന്‍ ഒരു ചാനല്‍ ചര്‍ച്ചയില്‍ വ്യക്തമാക്കി. 

യൂണിവേഴ്സിറ്റി കോളേജില്‍ നടക്കുന്ന സംഭവങ്ങളുടെ പശ്ചാത്തലത്തില്‍ യൂണിവേഴ്സിറ്റി കോളേജിന്റെ ചാന്‍സലര്‍ കൂടിയായ ഗവര്‍ണര്‍ അടിയന്തരമായി ഇടപെട്ട് അന്വേഷണം നടത്തണമെന്ന് ബിജെപി ദേശീയ നിര്‍വാഹക സമിതിയംഗം പി.കെ. കൃഷ്ണദാസ് നേരത്തെ ആവശ്യപ്പെട്ടിരുന്നു.  യൂണിവേഴ്സിറ്റി കോളേജ് മയക്കുമരുന്നിന്റെ കേന്ദ്രമാണ്. യൂണിവേഴ്സിറ്റി കോളേജില്‍ നടക്കുന്ന പിഎസ്സി പരീക്ഷകളില്‍ ക്രമക്കേട് നടന്നിട്ടുണ്ടെങ്കില്‍ അതിനെതിരെ നടപടിയെടുക്കണമെന്നും അദ്ദേഹം ആവശ്യപ്പെട്ടു. 

പ്രതികരിക്കാന്‍ ഇവിടെ എഴുതുക:

ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളില്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. വായനക്കാരുടെ അഭിപ്രായങ്ങള്‍ ജന്മഭൂമിയുടേതല്ല.