പാസ്‌പോര്‍ട്ട് ലഭിക്കാന്‍ ബംഗാള്‍ സ്വദേശി സദ്ദാം ഷെയ്ഖിനായി സിപിഎം കൗണ്‍സിലര്‍ ബിന്‍സി അലിയുടെ അനധികൃത ഇടപെടല്‍; അന്വേഷണം ആരംഭിച്ച് കേന്ദ്ര രഹസ്യാന്വേഷണ ഏജന്‍സി

Saturday 14 December 2019 11:10 am IST

തൊടുപുഴ: ബംഗാള്‍ സ്വദേശിക്ക് പാസ്‌പോര്‍ട്ട് ലഭ്യമാക്കാന്‍ ഇടപെട്ട സിപിഎം വനിതാ കൗണ്‍സിലര്‍ക്കെതിരെ കേന്ദ്ര രഹസ്യാന്വേഷണ ഏജന്‍സികള്‍ അന്വേഷണം ആരംഭിച്ചു. തൊടുപുഴ നഗരസഭയിലെ ഏഴാം വാര്‍ഡ് കൗണ്‍സിലര്‍ ബിന്‍സി അലിക്കെതിരെയാണ് അന്വേഷണം ആരംഭിച്ചത്. സംഭവത്തില്‍ സംസ്ഥാന സ്‌പെഷ്യല്‍ ബ്രാഞ്ചും അന്വേഷണം ഊര്‍ജിമാക്കി. 

തൊടുപുഴ നഗരസഭയിലെ ഏഴാം വാര്‍ഡ് കൗണ്‍സിലര്‍ ബിന്‍സി അലിയാണ്. ബംഗാള്‍ സ്വദേശി സദ്ദാം ഷെയ്ഖിനെ പരിചയമുണ്ടെന്നും പാസ്‌പോര്‍ട്ട് അനുവദിക്കണമെന്നും അഭ്യര്‍ഥിച്ചു തൊടുപുഴ ഹെഡ് പോസ്റ്റ് ഓഫിസില്‍ കത്തുനല്‍കിയിരുന്നു. ഈ കത്തിനെ കുറിച്ചാണ് ഇപ്പോള്‍ അന്വേഷണം നടക്കുന്നത്. 

 ബംഗാള്‍ സ്വദേശിയായ സദ്ദാം ഷെയ്ഖിനെ പരിചയം ഉണ്ടെന്ന് കാണിച്ച് ബിന്‍സി അലിയാണ് പാസ്‌പോര്‍ട്ടിനായി സാക്ഷ്യ പത്രം നല്‍കിയത്. തുടര്‍ന്ന് ഇയാള്‍ക്ക് പാസ്‌പോര്‍ട്ട് ലഭിക്കുകയും ചെയ്തു. എന്നാല്‍ പാസ്‌പോര്‍ട്ട് കൈമാറാനായി നല്‍കിയ മേല്‍വിലാസത്തില്‍ എത്തിയ പോസ്റ്റ്മാന് സദ്ദാമിന്റെ താമസ സ്ഥലം കണ്ടെത്താന്‍ കഴിഞ്ഞില്ല. തുടര്‍ന്ന് ഇങ്ങിനെ ഒരാള്‍ ഏഴാം വാര്‍ഡില്‍ താമസിക്കുന്നില്ലെന്ന് രേഖപ്പെടുത്തി പോസ്റ്റ് ഓഫീസ് അധികൃതര്‍ പാസ്‌പോര്‍ട്ട് മടക്കി അയച്ചു. പിന്നീട് സദ്ദാമിനെ ജോലിക്കായി നിയോഗിച്ച വ്യക്തി ബിന്‍സിയെ സമീപിക്കുകയും പാസ്‌പോര്‍ട്ട് ലഭിക്കാന്‍ ഇടപെടണമെന്ന് അഭ്യര്‍ത്ഥിക്കുകയും ചെയ്തു. തുടര്‍ന്ന് സദ്ദാമിന് പാസ്‌പോര്‍ട്ട് ലഭ്യമാക്കുന്നതിനായി ബിന്‍സി അലി വീണ്ടും അധികൃതരെ സമീപിക്കുകയായിരുന്നു. സംശയം തോന്നിയ ചിലര്‍ നല്‍കിയ വിവരത്തിന്റെ അടിസ്ഥാനത്തിലാണ് കേന്ദ്ര രഹസ്യാന്വേഷണ ഏജന്‍സി അടക്കം അന്വേഷണം തുടങ്ങിയത്.

 

പ്രതികരിക്കാന്‍ ഇവിടെ എഴുതുക:

ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളില്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. വായനക്കാരുടെ അഭിപ്രായങ്ങള്‍ ജന്മഭൂമിയുടേതല്ല.