ഫുട്‌ബോള്‍ രാജാവ് മെസി വിരമിക്കുന്നുവോ?; യാഥാര്‍ഥ്യം വെളിപ്പെടുത്തി ബാഴ്‌സലോണയുടെ കോച്ച് ഏണസ്‌റ്റോ വല്‍വെര്‍ഡെ

Saturday 7 December 2019 4:33 pm IST

കാല്‍പന്തു കളിയിലെ രാജാവ് വിരമിക്കുന്നതുമായി ബന്ധപെട്ട് വിദേശമാധ്യമങ്ങളില്‍ വന്ന വാര്‍ത്തകള്‍ക്കെതിരെ പ്രതികരണവുമായി എത്തിയിരിക്കുകയാണ് ബാഴ്‌സലോണയുടെ കോച്ച് ഏണസ്‌റ്റോ വല്‍വെര്‍ഡെ. ലയണല്‍ മെസ്സിക്ക് മുപ്പത്തിരണ്ട് വയസായി. ഇനി ഏതാനും വര്‍ഷങ്ങള്‍ കൂടിയേ അദ്ദേഹത്തിന് മുന്നിലുളളൂ. നിലവിലെ ഫോമില്‍ കളിക്കുന്ന കാര്യമാണ് മെസി ഉദ്ദേശിച്ചതെന്നും അദേഹം പറഞ്ഞു.

കഴിഞ്ഞ തിങ്കളാഴ്ച നടന്ന ബാലണ്‍ ഡി ഓര്‍ ചടങ്ങില്‍ ആറാം തവണയും പുരസ്‌കാരം സ്വീകരിച്ച് ചരിത്രം സൃഷ്ടിച്ചുകൊണ്ട് മെസി നടത്തിയ പ്രഭാഷണമാണ് ആരാധകരില്‍ സംശയത്തിനു ഇടവച്ചത്. പുരസ്‌കാര ദാനചടങ്ങില്‍ സംസാരിക്കവെ തന്റെ കരിയര്‍ അവസാനിക്കാന്‍ പോകുന്നുവെന്ന സൂചന നല്‍കുകയുണ്ടായി. നിങ്ങളീ നിമിഷങ്ങളെല്ലാം ശരിക്കും ആസ്വക്കുന്നത് എന്റെ കരിയര്‍ അവസാനിക്കാറായെന്ന തിരിച്ചറിവിലാണെന്ന് ആറാം ബാലണ്‍ ഡി ഓര്‍ നേടി ചരിത്ര പുരുഷനായി കൈയ്യടി വാങ്ങി നില്‍ക്കവെ വികാരാധീനനായി മെസി പറഞ്ഞു. എന്നാല്‍, ഇത് വലിയ ആശയക്കുഴപ്പത്തിന് വഴി വച്ചു. ലയണല്‍ മെസി വിരമിക്കുന്നതിനെ കുറച്ച് ആലോചിച്ചു തുടങ്ങിയിരിക്കുന്നുവെന്ന മട്ടില്‍ വാര്‍ത്തകള്‍ വന്നു. തുടര്‍ന്ന് സോഷ്യല്‍ മീഡിയയില്‍ ബാലണ്‍ ഡി ഓര്‍ പുരസ്‌കാര ദാനചടങ്ങില്‍ മെസി നടത്തിയത് തന്റെ വിരമിക്കല്‍ പ്രസംഗമാണെന്നും പരന്നു.

ബാഴ്‌സലോണയുടെ കോച്ച് ഏണസ്‌റ്റോ വല്‍വെര്‍ഡെ മെസിയുടെ പ്രഭാഷണത്തില്‍ ആരാധകര്‍ തെറ്റിദ്ധരിക്കപ്പെട്ടന്ന് വ്യക്തമാക്കി രംഗത്തെത്തി. മെസി വിരമിക്കുന്നതിനെ കുറിച്ച് സൂചിപ്പിച്ചതിനു അര്‍ത്ഥം അടുത്ത മൂന്ന് ദിവസത്തിനുള്ളില്‍ വിരമിക്കുമെന്നല്ല. മെസിയുടെ ഒരു വാചകത്തില്‍ കയറിപ്പിടിച്ച് ചര്‍ച്ച നയിക്കേണ്ടതിന്റെ താത്പര്യം മനസിലാകുന്നില്ലെന്നും ബാര്‍സ കോച്ച് ഏണസ്‌റ്റോ വല്‍വെര്‍ഡെ പറഞ്ഞു. വിരമിക്കല്‍ കാലം അടുത്തുവെന്ന് പറഞ്ഞത് സ്വാഭാവികമാണ്. സമീപഭാവിയില്‍ ലയണല്‍ മെസ്സി വിരമിക്കുമെന്ന വസ്തുതയോട് ഫുട്‌ബോള്‍ ലോകം പൊരുത്തപെടണമെന്നും വാല്‍വര്‍ഡെ പറഞ്ഞു. ഇതൊക്കെ സൂചിപ്പിച്ചു കൊണ്ട് മെസി വൈകാരികമായി സംസാരിച്ചത്.

റയല്‍മാഡ്രിഡിന്റെ ഇതിഹാസതാരം ആല്‍ഫ്രഡോ ഡി സിറ്റെഫാനോയെ കുറിച്ച് മുന്‍കാലങ്ങളിലുള്ളവര്‍ സംസാരിക്കുന്നത് കേട്ടിട്ടില്ലേ. അതുപോലെ ഭാവിയില്‍ മെസിയെ കുറിച്ച് സംസാരിക്കും. റയലിന് തുടരെ അഞ്ച് യൂറോപ്യന്‍ കപ്പ് നേടിക്കൊടുത്ത സ്‌റ്റെഫാനോയുടെ മഹത്വത്തിന് ഒപ്പമാണ് മെസിയുടെയും സ്ഥാനമെന്നും ഏണസ്‌റ്റോ വല്‍വെര്‍ഡെ പറഞ്ഞു. വല്‍വെര്‍ഡെയുടെ കമന്റിനു പുറകെ 

ബാഴ്‌സ സ്‌ട്രൈക്കര്‍ ലൂയിസ് സുവാരസും എത്തിയിരുന്നു. മെസിയുടെ വാക്കുകള്‍ തെറ്റായി വ്യാഖ്യാനിക്കപ്പെട്ടതാണെന്ന് സുവാരസ് അഭിപ്രായപ്പെട്ടു. മെസിക്ക് മുന്നില്‍ കാലം ഇനിയുമുണ്ട്. അദ്ദേഹത്തിനൊപ്പം കൂടുതല്‍ മത്സരങ്ങള്‍ കളിക്കാനാവുക എന്നത് ഭാഗ്യമാണ്. നിങ്ങള്‍ കരുതിയത് പോലെ അദ്ദേഹം ഈ സീസണോടെ കളി നിര്‍ത്തില്ല. ഫുട്‌ബോളില്‍ ഇനിയും ഉയരങ്ങള്‍ കയറാനുള്ളതാണ് മെസിക്കെന്നും അദേഹം പറഞ്ഞു.

 

പ്രതികരിക്കാന്‍ ഇവിടെ എഴുതുക:

ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളില്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. വായനക്കാരുടെ അഭിപ്രായങ്ങള്‍ ജന്മഭൂമിയുടേതല്ല.