സമാധാനത്തിനുള്ള നൊബേല്‍ പുരസ്കാരം എത്യോപ്യന്‍ പ്രധാനമന്ത്രി അബി അഹമ്മദ് അലിക്ക്

Friday 11 October 2019 3:16 pm IST

സ്റ്റോക്‌ഹോം: 2019-ലെ സമാധാനത്തിനുള്ള നൊബേല്‍ പുരസ്‌കാരം എത്യോപ്യന്‍ പ്രധാനമന്ത്രി അബി അഹമ്മദ് അലിക്ക് ലഭിച്ചു. എറിത്രിയയുമായുള്ള അതിര്‍ത്തി തര്‍ക്കങ്ങളില്‍ അബി അഹമ്മദ് അലി സ്വീകരിച്ച നിലപാടുകള്‍ എടുത്താണ് അദ്ദേഹത്തെ പുരസ്‌ക്കാരത്തിന് അര്‍ഹനാക്കിയത് . 

അയൽ‌രാജ്യമായ എറിത്രിയയുമായുള്ള അതിർത്തി തർക്കങ്ങളിൽ അബി അഹമ്മദ് നിർണ്ണായക തീരുമാനങ്ങളാണ് കൈക്കൊണ്ടതെന്ന് ജൂറി വിലയിരുത്തി.  ഒരൊറ്റയാളുടെ പ്രവൃത്തിയിലൂടെ മാത്രമല്ല സമാധാനം രൂപപ്പെടുന്നത്. അബി അഹമ്മദ് അലി സമാധാനത്തിനുള്ള ഹസ്തം നീട്ടിയപ്പോൾ എറിത്രിയൻ പ്രസിഡന്റ് അത് ഇരു കയ്യും നീട്ടി സ്വീകരിച്ചുവെന്നും നൊബേൽ സമിതി വിലയിരുത്തി. 

ഈ പുരസ്കാരത്തിലൂടെ ഇരു രാജ്യങ്ങളിലെയും ജനങ്ങൾക്കിടയിൽ സമാധാനം കൊണ്ടുവരാൻ കഴിയുമെന്നും ജൂറി വ്യക്തമാക്കി. എറിത്രിയയുമായി അബി അഹമ്മദ് സമാധാനകരാര്‍ ഉണ്ടാക്കിയിരുന്നു. 20 വര്‍ഷത്തെ വൈരം അവസാനിപ്പിച്ചാണ് സമാധാന കരാര്‍ ഒപ്പിട്ടത്. എത്യോപ്യയിലെ നാലാമത്തെ പ്രധാനമന്ത്രിയാണ് അബി അഹമ്മദ് അലി. ഒരോമിയയിലെ അഗാരോയ്ക്ക് അടുത്ത് ബെഷാഷായിലെ ചെറിയൊരു പട്ടണത്തില്‍ 1976 ഓഗസ്റ്റ് 15 നാണ് അബി അഹമ്മദിന്റെ ജനനം. മുസ്ലിം പിതാവിന്റെയും ക്രിസ്ത്യന്‍ മാതാവിന്റെയും മകനായി ജനിച്ച അബി അഹമ്മദില്‍ ചെറു പ്രായത്തില്‍ തന്നെ സഹിഷ്ണുതയുടെ മൂല്യങ്ങള്‍ വേരുറപ്പിച്ചിരുന്നു.

2018 ഏപ്രില്‍ 2 നാണ് എത്യോപ്യയിലെ പ്രധാനമന്ത്രിയായി അബി അഹമ്മദ് ചുമതലയേറ്റത്. അദ്ദേഹത്തിന്റെ എല്ലാ പ്രസംഗങ്ങളിലും പ്രവര്‍ത്തനങ്ങളിലും ദേശീയ ഐക്യം, സമാധാനപരമായ സഹവര്‍ത്തിത്വം, വളര്‍ച്ച പ്രധാനം ചെയ്യുക, പ്രാദേശിക സംയോജനം എന്നിവ ഊട്ടി ഉറപ്പിക്കുന്നതായിരുന്നു പ്രതിഫലിച്ചിരുന്നത്.

223 വ്യക്തികളും 78 സ്ഥാപനങ്ങളുമായി 301 പേരുകളാണ് ഇത്തവണ മത്സരത്തിനുണ്ടായിരുന്നത്. സ്വീഡൻ പരിസ്ഥിതി പ്രവർത്തകയായ ഗ്രേറ്റ തുൻബെർഗ് പുരസ്കാരത്തിന് പരിഗണിച്ചവരുടെ പട്ടികയിലുണ്ടായിരുന്നു. 

പ്രതികരിക്കാന്‍ ഇവിടെ എഴുതുക:

ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളില്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. വായനക്കാരുടെ അഭിപ്രായങ്ങള്‍ ജന്മഭൂമിയുടേതല്ല.