ശബരിമലയില്‍ സര്‍ക്കാര്‍ യുവതി പ്രവേശനം നടത്തരുത്; വിശാല ബെഞ്ചിന് വിട്ടപ്പോള്‍ നിലവിലെ വിധി സ്‌റ്റേയായെന്ന് വെള്ളാപ്പള്ളി നടേശന്‍

Thursday 14 November 2019 1:29 pm IST

ആലപ്പുഴ: അന്തിമ വിധി വരുന്നത് വരെ ശബരിമലയില്‍ സര്‍ക്കാര്‍ യുവതി പ്രവേശനം നടത്തെരുതെന്ന് എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍. ഏഴംഗ ബെഞ്ചിന്റെ വിധി അന്തിമമാണെന്നും വിധി വരുന്നത് വരെ യുവതി പ്രവേശനം പാടില്ല എന്ന് വെള്ളാപ്പള്ളി പറഞ്ഞു. 10 നും 50 നും ഇടയില്‍ പ്രായമുള്ള സ്ത്രീകള്‍ ശബരിമലയില്‍ പ്രവേശിക്കേണ്ട്. ഇത് വ്യക്തിപരമായ അഭിപ്രായമാണെന്നും അദേഹം പറഞ്ഞു. വിശാല ബെഞ്ചിന് വിട്ടപ്പോള്‍ നിലവിലെ വിധി സ്റ്റേ ചെയ്തതിന് തുല്യമായി. സര്‍ക്കാര്‍ ഒരു തരത്തിലും പ്രതിസന്ധിയില്‍ ആകില്ല. സുപ്രീം കോടതി വിധി എന്തായാലും സര്‍ക്കാര്‍ നടപ്പിലാക്കിയേ മതിയാകൂവെന്നും വെള്ളാപ്പള്ളി പറഞ്ഞു. 

നേരത്തെ, ശബരിമല യുവതി പ്രവേശന വിധിയിലെ പുനഃപരിശോധന  ഹര്‍ജി ഭരണ ഘടനാബെഞ്ചിന്റെ ഏഴംഗ ബെഞ്ചിനു വിട്ടു കൊണ്ടുള്ള സുപ്രീം കോടതിയുടെ വിധിയെ എന്‍എസ്എസ് സ്വാഗതം ചെയ്തിരുന്നു. മൂന്നു ജഡ്ജിമാരുടെ ഈ വിധിയായിരിക്കും ഇനിയും ശബരിമലയില്‍ നടപ്പാക്കുന്നത്. വിശ്വാസത്തിന്റെയും വിശ്വാസി സമൂഹത്തിന്റെയും വിജയമായിട്ടാണ് വിധിയെ കാണുന്നതെന്നു എന്‍എസ്എസ് ജനറല്‍ സെക്രട്ടറി ജി. സുകുമാരന്‍ നായര്‍ പറഞ്ഞു.

ശബരിമല യുവതി പ്രവേശന ഉത്തരവ് പുനപരിശോധിക്കാന്‍ സുപ്രീം കോടതി തീരുമാനിച്ചിട്ടുണ്ട്.  യുവതി പ്രവേശന ഉത്തരവിനെതിരേസമര്‍പ്പിച്ച പുനഃപരിശോധന ഹര്‍ജികളിലാണ് അതി നിര്‍ണായക വിധി ഉണ്ടായത്. ശബരിമല വിഷയം വിശാല ബെഞ്ച് കേള്‍ക്കേണ്ട വിഷയമാണെന്നും കോടതി വ്യക്തമാക്കി. മതത്തിന് പ്രാധാന്യമുണ്ടെന്നും മതവിശ്വാസം പരിഗണിക്കണമെന്നുമായിരുന്നു വിധി. ചീഫ് ജസ്റ്റിസ് രഞ്ജന്‍ ഗോഗോയ് അധ്യക്ഷനായ ഭരണഘടന ബെഞ്ചിന്റേതാണ് വിധി. 2018 സെപ്റ്റംബര്‍ 28നാണ് ശബരിമലയില്‍ യുവതീ പ്രവേശനം അനുവദിച്ച് സുപ്രീം കോടതിയുടെ അഞ്ചംഗ ഭരണഘടനാ ബെഞ്ച് വിധിച്ചത്. ഇതിനെതിരേ സമര്‍പ്പിച്ച 56 പുനപരിശോധന ഹര്‍ജികളിലാണ് ഇന്നു വിധി പറഞ്ഞത്. ചീഫ് ജസ്റ്റിസ് രഞ്ജന്‍ ഗൊഗോയിക്കു പുറമേ ജസ്റ്റിസുമാരായ ആര്‍.എഫ്. നരിമാന്‍, എ.എം. ഖാന്‍വില്‍കര്‍, ഡി.വൈ. ചന്ദ്രചൂഡ്, ഇന്ദു മല്‍ഹോത്ര എന്നിവരടങ്ങുന്ന അഞ്ചംഗബെഞ്ചാണ് വിധിപറഞ്ഞത്. ബെഞ്ച് ഫെബ്രുവരി ആറിന് മൂന്നരമണിക്കൂറോളം വാദം കേട്ടശേഷമാണ് വിധിപറയാന്‍ മാറ്റിയത്. സ്ത്രീപ്രവേശവിധി പറഞ്ഞ ബെഞ്ചിലെ അന്നത്തെ ചീഫ് ജസ്റ്റിസ് ദീപക് മിശ്ര വിരമിച്ചതിനാലാണ് ഇപ്പോഴത്തെ ചീഫ് ജസ്റ്റിസ് രഞ്ജന്‍ ഗൊഗോയ് പകരമെത്തിയത്.

പ്രതികരിക്കാന്‍ ഇവിടെ എഴുതുക:

ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളില്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. വായനക്കാരുടെ അഭിപ്രായങ്ങള്‍ ജന്മഭൂമിയുടേതല്ല.