ഇന്ത്യന്‍ നഴ്സസ്‌ അസോസിയേഷന്‍ സമരത്തിലേക്ക്‌

Tuesday 3 September 2013 4:37 pm IST

കൊച്ചി: ശമ്പള പരിഷ്കരണം ഉള്‍പ്പെടെയുള്ള കരാറുകള്‍ നടപ്പാക്കാതെ ലേബര്‍ ഡിപ്പാര്‍ട്ടുമെന്റും ഹോസ്പ്പിറ്റല്‍ മാനേജ്മെന്റും ഒത്തുകളിക്കുകയാണെന്നു ഇന്ത്യന്‍ നഴ്സസ്‌ അസോസിയേഷന്‍. ഏപ്രിലിലാണ്‌ ശമ്പള വര്‍ധനവ്‌ പ്രാബല്യത്തില്‍ വന്നത്‌. എന്നാല്‍ നാളിതുവരെ വര്‍ധനവ്‌ നടപ്പാക്കാന്‍ ആശുപത്രി അധികൃതര്‍ തയാറായിട്ടില്ല. ഒരു മാസത്തിനുള്ളില്‍ ആവശ്യങ്ങള്‍ അംഗീകരിച്ചില്ലെങ്കില്‍ സംസ്ഥാനത്തെ മുഴുവന്‍ ആശുപത്രികളുടെയും പ്രവര്‍ത്തനം നിലക്കുന്ന തരത്തിലുള്ള പ്രക്ഷോഭങ്ങള്‍ക്ക്‌ നേതൃത്വം നല്‍കുമെന്നു ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു.
സ്വകാര്യ ആശുപത്രി ജീവനക്കാരുടെ പ്രശ്നങ്ങള്‍ക്കു പരിഹാരം കാണാന്‍ രൂപീകരിച്ച ഐആര്‍സിയുടെ പ്രവര്‍ത്തനം ദൂരൂഹത നിറഞ്ഞതാണെന്നും അവര്‍ പറഞ്ഞു. ഓണ മാസമായിട്ടും ജീവനക്കാരുടെ ബോണസ്‌ പ്രഖ്യാപിച്ചിട്ടില്ല. 108 ആംബുലന്‍സ്‌ സമരത്തില്‍ ചില സംഘടനാ നേതാക്കള്‍ ഐആര്‍സിയില്‍ ഉണ്ടാക്കിയ ശമ്പള കരാറില്‍ നിന്നും 3000 രൂപയില്‍ താഴെയാണ്‌ എഗ്രിമെന്റ്‌ ഉണ്ടാക്കിയിരിക്കുന്നത്‌. ചില ലേബര്‍ ഉദ്യോഗസ്ഥരുടെ ഒത്താശയിലാണ്‌ ഇതെന്നും അവര്‍ ആരോപിച്ചു. ലേബര്‍ മന്ത്രി, ലേബര്‍ കമ്മിഷ്ണര്‍, മാനേജ്മെന്റ്‌ അസോസിയേഷന്‍, പ്രമുഖ ട്രേഡ്‌ യൂണിയന്‍ നേതാക്കള്‍ തുടങ്ങിയവര്‍ ഒന്നര വര്‍ഷത്തോളം ചര്‍ച്ചചെയ്താണു കരാര്‍ ഉണ്ടാക്കിയത്‌. ഇതാണ്‌ മാനേജ്മെന്റുകള്‍ പൂര്‍ണമായും ലംഘിച്ചിരിക്കുന്നത്‌. ലേബര്‍ ഡിപ്പാര്‍ട്ട്മെന്റ്‌ മാനേജ്മെന്റ്‌ ഡിപ്പാര്‍ട്ട്മെന്റായാണ്‌ ഇപ്പോള്‍ പ്രവര്‍ത്തിക്കുന്നത്‌. കോതമംഗലം എംബിഎംഎം, തൃശൂര്‍ വെസ്റ്റ്‌ ഫോര്‍ട്ട്‌, മെട്രൊ ആശുപത്രികള്‍ തുടങ്ങി നൂറിലധികം ആശുപത്രികള്‍ ഇതുവരെ മിനിമം വേതനം നല്‍കിയിട്ടില്ല. ഇതിനെതിരെ എഎല്‍ഒ എടുത്ത ക്ലെയിം പെറ്റീഷന്‍ നടപടികള്‍ പൂര്‍ത്തിയാക്കാതെ മേലുദ്യോഗസ്ഥര്‍ തടഞ്ഞുവച്ചിരിക്കുകയാണ്‌. ഇതിനു പിന്നിലുള്ള അഴിമതി അന്വേഷിക്കണമെന്നും ഭാരവാഹികള്‍ ആവശ്യപ്പെട്ടു.
ശമ്പള വര്‍ധനവ്‌ ഉള്‍പ്പെടെയുള്ള ആവശ്യങ്ങള്‍ ഉന്നയിച്ചു നടത്തിയ സെക്രട്ടറിയേറ്റ്‌ മാര്‍ച്ചിനുശേഷം മുഖ്യമന്ത്രി നിയോഗിച്ച മന്ത്രി സഭാ ഉപസമിതി നാളിതുവരെ മീറ്റിങ്ങുകള്‍ വിളിച്ചിട്ടില്ല. ബെഡുകളുടെ എണ്ണം കണക്കാക്കി ശമ്പളം നിര്‍ണയിച്ചതോടെ ഒട്ടേറെ ബെഡുകള്‍ കുറച്ചു. വന്‍ ലാഭം നേടുന്ന സിഗിള്‍ സ്പെഷ്യാലിറ്റി ആശുപത്രികളിള്‍ തുച്ഛമായ വേതനം നല്‍കിയാല്‍ മതി. ഇത്തരം സാഹചര്യങ്ങള്‍ നിലനില്‍ക്കുന്നതിനാലാണ്‌ പ്രക്ഷോഭത്തിനിറങ്ങുന്നതെന്നും അവര്‍ പറഞ്ഞു.

ഐആര്‍സിയിലൂടെ ഡോ. എസ്‌. ബലരാമന്‍ കമ്മിറ്റി റിപ്പോര്‍ട്ട്‌ അട്ടിമറിച്ചതിലെ ദുരൂഹത അന്വേഷിക്കുക, ക്ലെയിം പെറ്റീഷന്‍ നടപടി പൂര്‍ത്തിയാക്കി ശമ്പള കുടിശിഖ നല്‍കുക, നേഴ്സുമാരെ വഞ്ചിച്ച ഉദ്യോഗസ്ഥര്‍ക്കെതിരെയും നേതാക്കള്‍ക്കെതിരെയും വിജിലന്‍സ്‌ അന്വേഷണം നടത്തുക, ഡോ. ബലരാമന്‍ കമ്മിറ്റി റിപ്പോര്‍ട്ട്‌ നടപ്പാക്കുക, മിനിമം വേതനം നല്‍കാത്ത ആശുപത്രികള്‍ക്കെതിരെ നടപടികള്‍ വേഗത്തിലാക്കുക എന്നീ ആവശ്യങ്ങള്‍ ഉന്നയിച്ചാണ്‌ സമരം. വാര്‍ത്താ സമ്മേളനത്തില്‍ ഐഎന്‍എ സംസ്ഥാന പ്രസിഡന്റ്‌ ജോമി ജേക്കബ്‌, ജനറല്‍ സെക്രട്ടറി മുഹമ്മദ്‌ ഷിഹാബ്‌, ലിബിന്‍ തോമസ്‌, അമ്പിളി, സീമ എന്നിവര്‍ പങ്കെടുത്തു.

പ്രതികരിക്കാന്‍ ഇവിടെ എഴുതുക:

ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളില്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. വായനക്കാരുടെ അഭിപ്രായങ്ങള്‍ ജന്മഭൂമിയുടേതല്ല.