കൊച്ചി: കുമ്പളങ്ങി ഗ്രാമപഞ്ചായത്ത് പ്രസിഡന്റിനെതിരെ ഭരണപക്ഷാംഗങ്ങള് രംഗത്ത്. പഞ്ചായത്ത് പ്രസിഡന്റ് ഉഷ പ്രദീപിനെതിരെ ഇന്ന് അവിശ്വാസ പ്രമേയം കൊണ്ടുവരുന്നതിനാണ് നീക്കം. 2010 ല് പഞ്ചായത്ത് പ്രസിഡന്റ് തെരഞ്ഞെടുപ്പുമായി ബന്ധപ്പെട്ട് കോണ്ഗ്രസ് പാര്ട്ടിക്കുള്ളില് തന്നെ അഭിപ്രായ ഭിന്നത ഉണ്ടായതിനെ തുടര്ന്ന് പാര്ട്ടി നേതൃത്വം ഉണ്ടാക്കിയ ധാരണയുടെ അടിസ്ഥാനത്തിലാണ് ഉഷ പ്രദീപിനെ പ്രസിഡന്റായി തെരഞ്ഞെടുത്തത്. കേന്ദ്രമന്ത്രി പ്രൊഫ.കെ.വി.തോമസ്, ഡൊമിനിക് പ്രസന്റേഷന് എംഎല്എ എന്നിവരാണ് ഇതിന് മുന്കൈ എടുത്തത്. ഉഷ പ്രദീപ് രണ്ടര വര്ഷം പ്രസിഡന്റായും ജോസി ഇടമുറി വൈസ് പ്രസിഡന്റായും അന്ന് തീരുമാനിക്കുകയായിരുന്നു. രണ്ടര വര്ഷത്തിന് ശേഷം ഭരണമാറ്റം ആകാം എന്നുമായിരുന്നു ധാരണ.
എന്നാല് മൂന്ന് വര്ഷത്തിന് ശേഷവും സ്ഥാനം ഒഴിയാന് ഉഷ തയ്യാറാവാത്തതിനെ തുടര്ന്നാണ് ഭരണപക്ഷാംഗങ്ങള് തന്നെ പ്രസിഡന്റിനെതിരെ തിരിഞ്ഞിരിക്കുന്നത്. പാര്ട്ടിക്കകത്തുമാത്രം ഒതുങ്ങി നിന്നിരുന്ന പ്രശ്നമാണ് ഇപ്പോള് പരസ്യമായിരിക്കുന്നത്. ധാരണ പ്രകാരം പ്രസിഡന്റ് കാലാവധി അവസാനിച്ചിട്ടും ഉഷ പ്രദീപ് രാജിവയ്ക്കാത്തിനെ തുടര്ന്ന് കേന്ദ്ര മന്ത്രി കെ.വി തോമസ് അടക്കമുള്ള നേതാക്കള്ക്ക് പരാതി നല്കിയിരുന്നതായും കുമ്പളങ്ങി പഞ്ചായത്ത് മൂന്നാം വാര്ഡ് മെമ്പര് നെല്സണ് കോച്ചേരി വാര്ത്താ സമ്മേളനത്തില് പറഞ്ഞു. ഇക്കാര്യത്തില് തീരുമാനം എടുക്കാം എന്ന് പറയുന്നതല്ലാതെ വേണ്ടത്ര താല്പര്യം ഇവര് എടുക്കുന്നില്ലെന്നും അദ്ദേഹം ആരോപിച്ചു.
കുമ്പളങ്ങി ഗ്രാമപഞ്ചായത്തില് മൊത്തം 17 അംഗങ്ങളാണുള്ളത്. ഇതില് 10 പേര് യുഡിഎഫില് നിന്നും ഏഴ് പേര് എല്ഡിഎഫില് നിന്നുമാണ്. കോണ്ഗ്രസിന് ഒമ്പത് അംഗവും കേരള കോണ്ഗ്രസിന് ഒരു അംഗവുമാണുള്ളത്. കോണ്ഗ്രസിലെ ഒമ്പത് അംഗങ്ങളില് എട്ടുപേരും പഞ്ചായത്ത് പ്രസിഡന്റിന് എതിരാണ്.
ഡിസിസി പ്രസിഡന്റ് വി.ജെ.പൗലോസ്, കെ.വി.തോമസ്, ഡൊമിനിക് പ്രസന്റേഷന് എംഎല്എ, ജില്ലാ വൈസ് പ്രസിഡന്റ് അഡ്വ.കെ.പി.ഹരാദാസ്, ബ്ലോക് പ്രസിഡന്റ് ആര്.ത്യാഗരാജന് എന്നിവര് കോണ്ഗ്രസ് അംഗങ്ങളുടെ അഭിപ്രായം തേടിയിരുന്നു. എട്ട് അംഗങ്ങളും പ്രസിഡന്റിന് എതിരായി അഭിപ്രായം രേഖപ്പെടുത്തിയിട്ടും ഇക്കാര്യത്തില് ഉചിതമായ തീരുമാനം നേതൃത്വം സ്വീകരിക്കാത്തതില് പ്രതിഷേധിച്ചാണ് ഉഷ പ്രദീപിനെതിരെ അവിശ്വാസ പ്രമേയത്തിന് നോട്ടീസ് നല്കുന്നത്.
കുമ്പളങ്ങി ഒന്നാം വാര്ഡ് മെമ്പര് സൂസന് ജോസഫ്, രണ്ടാം വാര്ഡ് മെമ്പര് ദിലീപ് കുഞ്ഞുകുടി, നാലാം വാര്ഡ് മെമ്പര് റീത്ത പീറ്റര്, അഞ്ചാം വാര്ഡ് മെമ്പര് ജോയ്സി ജോസഫ്, എട്ടാം വാര്ഡ് മെമ്പര് ജോസി ഇടമുറി, പതിനഞ്ചാം വാര്ഡ് മെമ്പര് കുഞ്ഞുമോള് ജൂഡ് എന്നിവര് പത്രസമ്മേളനത്തില് പങ്കെടുത്തു.
പ്രതികരിക്കാൻ ഇവിടെ എഴുതുക: