266. കൃഷ്ണനാമപ്രകീര്ത്തികഃ – കൃഷ്ണന് എന്ന പേരുകൊണ്ടു കീര്ത്തിക്കപ്പെടുന്നവന്.
ഗര്ഗമഹര്ഷി ഈ അദ്ഭുതശിശുവിന് കൃഷ്ണന് എന്നാണ് പേരുകൊടുത്തത്. ത്രികാല ജ്ഞാനിയായ മഹര് ഷി അനന്തമായ ഗണങ്ങളും നാമങ്ങളുമുള്ള ഭഗവാന് എന്തു പേരുകൊടുക്കാമെന്ന് വളരെ ആലോചിച്ചുകണ്ടെത്തിയ പേരാണ് കൃഷ്ണന്. ഭഗവാന്റെ ഗുണങ്ങളില് മൂല്യമായ ചിലതൊക്കെ ഈ നാമം ഉള്ക്കൊള്ളുന്നു. ചില സൂചനകളേ ഈ വ്യാഖ്യാനത്തില് ഉള്ക്കൊള്ളിക്കാനാകൂ.
1. ഈ ശിശു ശ്യാമവര്ണനാണ്. കറുത്തനിറം അഥവാ കൃഷ്ണവര്ണം ശരീരത്തിനുള്ളതുകൊണ്ട് കൃഷ്ണന് എന്ന പേര് ഉചിതമാണ്. 2. ‘കൃഷ്’ എന്ന ധാതുവിന് ആകര്ഷിക്കുക, വലിച്ചടുപ്പിക്കുക എന്നര്ഥം. എല്ലാവരുടെയും ചിത്തത്തെ ആകര്ഷിക്കുന്നതുകൊണ്ട് കൃഷ്ണന് എന്നു പേര്. പുരാണങ്ങളിലും ഇതിഹാസങ്ങളിലും പ്രത്യക്ഷപ്പെടുന്ന ബഹുസഹസ്രം പേരുകളില് ഏറ്റവും ആകര്ഷകമായത് കൃഷ്ണന് എന്നതു തന്നെയാണല്ലോ. 3. ശത്രുക്കളെ ശക്തിയായി വലിച്ചകറ്റി നശിപ്പിക്കുന്നവന് എന്നും ഈ പേരിനെ വ്യാഖ്യാനിക്കാം. ജനിച്ച് ഏതാനും ദിവസങ്ങള്ക്കുള്ളില് പൂതനയുടെ മുലയിലെ വിഷത്തോടൊപ്പം പ്രാണനെയും ശരീരത്തില് നിന്ന് വലിച്ചകറ്റിയതുതൊട്ട് ജരാസന്ധന്റെ 391 അക്ഷൗഹിണിപ്പടയെയും കുരുക്ഷേത്രത്തിലെ പതിനെട്ടക്ഷൗഹിണിപ്പടയെയും ഭൂമുഖത്തുനിന്ന് തുടച്ചുമാറ്റുന്നതുവരെ ഈ പരിശ്രമം അഭംഗുരമായി തുടര്ന്നു. 4. ജഗത്തിന്റെ പാപങ്ങളെ വലിച്ചുനീക്കിക്കളയുന്നതിനാല് കൃഷ്ണന് എന്ന പേര് ഉചിതമായി എന്ന് നാരായണീയം (44-5). 5. കൃഷ് ധാതു സത്തയെയും ണകാരം ആനന്ദത്തെയും കുറിക്കുന്നു. രണ്ടും ചേര്ന്നുണ്ടായ കൃഷ്ണശബ്ദത്തിന് സത്തും ആനന്ദവും രൂപമായവന്, സദാനന്ദന് എന്നര്ഥം. (നാരായണീയം 44-5) 6. കൃഷ് ധാതു സത്തയെയും ണകാരം ആനന്ദത്തെയും കുറിക്കുന്നു. രണ്ടും ചേര്ന്ന കൃഷ്ണശബ്ദം പരബ്രഹ്മത്തെക്കുറിക്കുന്നു. പരബ്രഹ്മം പരമമായ ആനന്ദത്തെ കുറിക്കുന്നതിനാല് ഈ നിര്ചനം മുന് പറഞ്ഞതിന്റെ വ്യാഖ്യാനമാണെന്നും പറയാം.
(തുടരും)
ഡോ. ബി.സി.ബാലകൃഷ്ണന്
പ്രതികരിക്കാൻ ഇവിടെ എഴുതുക: