കോട്ടയം: കേരള നേറ്റീവ്ബോള് അസ്സോസിയേഷന്റെ ആഭിമുഖ്യത്തില് നടന്നുവരുന്ന നാടന് പന്തുകളി സംസ്ഥാന ചാമ്പ്യന്ഷിപ്പ് ഫൈനല്മത്സരം ഇന്ന് കോട്ടയത്ത് നടക്കും. പുതുപ്പള്ളി ഗവ.ഹൈസ്കൂള് മൈതാനത്തു നടക്കുന്ന മത്സരം ഉച്ചക്ക് 2-ന് മുഖ്യമന്ത്രി ഉമ്മന്ചാണ്ടി ഉദ്ഘാടനം ചെയ്യും. ഫുഡ്ബോള്താരം ഐ.എം.വിജയന് മുഖ്യാതിഥിയായിരിക്കും. മന്ത്രി തിരുവഞ്ചൂര് രാധാകൃഷ്ണന്, ജോസ്.കെ.മാണി എം.പി., എന്.ജയരാജ് എംഎല്എ, സിനിമാ-ഹാസ്യതാരം കോട്ടയം നസീര്, ജില്ലാ പഞ്ചായത്ത് പ്രസിഡന്റ് നിര്മ്മലജിമ്മി, വൈസ് പ്രസിഡന്റ് അഡ്വ.ഫില്സണ് മാത്യൂസ്, വി.എന്.വാസവന്, ജില്ലാ സ്പോര്ട്സ് കൗണ്സില് പ്രസിഡന്റ് അയ്മനം ബാബു, അഡ്വ. വി.ബി. ബിനു എന്നിവര് ചടങ്ങില് പങ്കെടുക്കും.
രണ്ടരമാസം നീണ്ടുനിന്ന മത്സര പരമ്പരയില് വിവിധ ജില്ലകളില് നിന്നായി 64 ടീമുകളാണ് പങ്കെടുത്തത്. ഫൈനല് മത്സരത്തില് ഇടുക്കിയില് നിന്നുള്ള കമ്പംമേടു ടീമും, ആതിഥേയ ജില്ലയായ കോട്ടയത്തുനിന്നുള്ള പാറമ്പുഴ ടീമും തമ്മില് ഏറ്റുമുട്ടും. മത്സരത്തില് ഒന്നാം സ്ഥാനത്തെത്തുന്ന ടീമിന് സര്ക്കാര് നല്കുന്ന ചീഫ് മിനിസ്റ്റേഴ്സ് എവര് റോളിംഗ് ട്രോഫിയും ഒരു ലക്ഷം രൂപയുമാണ് ലഭിക്കുക. രണ്ടാം സ്ഥാനത്തെത്തുന്ന ടീമിന് അമ്പതിനായിരം രൂപയും ട്രോഫിയും, മൂന്നാം സ്ഥാനത്തെത്തുന്ന ടീമിന് 15000 രൂപയുമാണ് നല്കുക. നാലാം സ്ഥാനത്തെത്തുന്ന ടീമിന് 10000 രൂപയും സമ്മാനമായി നല്കും.
ഒന്നാം സ്ഥാനത്തെത്തുന്ന ടീമിന് നല്കുന്ന ചീഫ് മിനിസ്റ്റേഴ്സ് ട്രോഫിക്ക് ശനിയാഴ്ച 3 മണിക്ക് ജില്ലാ പഞ്ചായത്ത് ഓഫീസില് സ്വീകരണം നല്കുമെന്നും ഭാരവാഹികളായ കോട്ടയം ബാബുരാജ്, ഷിബുപാറക്കടവ്, ഷാജന്ചമ്പക്കര എന്നിവര് വാര്ത്താസമ്മേളനത്തില് പറഞ്ഞു.
പ്രതികരിക്കാൻ ഇവിടെ എഴുതുക: