കൊച്ചി: വോട്ടിംഗ് ദിനത്തിലും നിലപാട് വ്യക്തമാക്കിക്കൊണ്ട് സോഷ്യല് നെറ്റ് വര്ക്ക് സൈറ്റുകള് സജീവം. കേരളത്തില് എല്ഡിഎഫോ യുഡിഎഫോ എന്ന പതിവ് ചര്ച്ചകള്ക്ക് വിപരീതമായിട്ടാണ് ഇക്കുറി കാര്യങ്ങള് നീങ്ങിയത്. കേരളത്തില് എല്ഡിഎഫ്-യുഡിഎഫ് എന്ന തരത്തിലുള്ള ചര്ച്ചകള്ക്ക് വിപരീതമായി കേന്ദ്രം മൊത്തം അലയടിക്കുന്ന ബിജെപി തരംഗത്തിന്റെ പ്രതിഫലനം കേരളത്തിലും പ്രകടമായിരുന്നു. ഫേസ്ബുക്ക്, ട്വിറ്റര് തുടങ്ങി സോഷ്യല്നെറ്റ് വര്ക്കിംഗ് സൈറ്റുകളിലൂടെ ആദ്യവോട്ട് രേഖപ്പെടുത്തിയെന്ന് വിളിച്ചുപറഞ്ഞവരും കുറവല്ല.
കേരളത്തില് കൂടുതല് സീറ്റുകള് എല്ഡിഎഫിനോ യൂഡിഎഫിനോ എന്നതല്ല മറിച്ച് കേരളത്തില് ഇത്തവണ താമര വിരിയാന് സാധ്യതയുണ്ടെന്നാണ് തെരഞ്ഞെടുപ്പിനെ നിക്ഷ്പക്ഷമായി നോക്കിക്കണ്ട ചിലരുടെ അഭിപ്രായം. തിരുവനന്തപുരത്ത് നിക്ഷ്പക്ഷമായി നോക്കിയാല് ഒ. രാജഗോപാല് വിജയിക്കണമെന്നാണ് ആഗ്രഹമെന്നാണ് ഫേസ്ബുക്കിലൂടെ ചിലര് അഭിപ്രായപ്പെട്ടത്. ആം ആദ്മിക്ക് മെട്രോ സിറ്റിയില് മാത്രമാണ് സാധ്യതയെന്ന് പറഞ്ഞവരും കുറവല്ല.
യുപിഎ അധികാരത്തിലെത്തിയാല് ഞാന് ഇന്ത്യവിട്ട് പോകുമെന്നാണ് ഒരു വിരുതന് മുഖപുസ്തകത്തിലൂടെ അഭിപ്രായപ്പെട്ടത്. ഇക്കാര്യം സോണിയയോ രാഹുല് ഗാന്ധിയോ ആണ് പറഞ്ഞിരുന്നതെങ്കില് യുപിഎ ജയിച്ചേനെയെന്നാണ് മറ്റൊരാളുടെ കമന്റ്.
ബിജെപിയ്ക്ക് വോട്ട് രേഖപ്പെടുത്തിയാല് അഞ്ച് വര്ഷത്തേക്ക് ഇന്ത്യയെക്കുറിച്ചോര്ത്ത് ടെന്ഷന് വേണ്ടെന്നാണ് ഫേസ്ബുക്കിലൂടെ വേറൊരാള് അഭിപ്രായപ്പെട്ടിരിക്കുന്നത്.
പ്രമുഖ താരം മമ്മൂട്ടിയ്ക്ക് വോട്ട് ചെയ്യാന് സാധിക്കാതിരുന്നതും ചൂടന് ചര്ച്ചയായി. 18 തികയാത്ത ചുള്ളന് ചെക്കനായതിനാലാണ് മമ്മൂട്ടിക്ക് വോട്ട് ചെയ്യാന് സാധിക്കാതിരുന്നതെന്ന് ഒരാളുടെ കമന്റ്. അതല്ല കണ്ട കോമാളികള്ക്ക് വോട്ട് പിടിക്കാന് പോകുമ്പോള് വോട്ടേഴ്സ് ലിസിറ്റില് സ്വന്തം പേരുണ്ടോയെന്ന് നോക്കണമെന്നായിരുന്നു മറ്റൊരു കമന്റ്. സ്വന്തം വോട്ട് പോലും ഉറപ്പിക്കാത്ത സൂപ്പര് സ്റ്റാര് എന്നും കമന്റുണ്ടായി.
അഴിമതി, വിലക്കയറ്റം തുടങ്ങിയവയ്ക്കെതിരെയുള്ള ജനരോഷം തെരഞ്ഞെടുപ്പില് പ്രതിഫലിക്കുമെന്ന് പറഞ്ഞ പ്രതിപക്ഷ നേതാവിനെതിരെയും രൂക്ഷമായ കമന്റുകളിലൂടെ പ്രതികരിച്ചവരും കുറവല്ല. സെലിബ്രിറ്റി താരങ്ങളായ സനുഷയും മീരാ നന്ദനും തങ്ങള് കന്നിവോട്ട് രേഖപ്പെടുത്തിയെന്ന് മഷി പുരണ്ട ഇടത്തേ ചൂണ്ട് വിരലിന്റെ ചിത്രങ്ങള് ഫേസ്ബുക്കില് പോസ്റ്റ് ചെയ്തുകൊണ്ടാണ് ജനത്തെ അറിയിച്ചത്. പ്രായം 30 എത്തിയെങ്കിലും താനും കന്നിവോട്ട് ചെയ്തുവെന്ന് രഞ്ജിനി ഹരിദാസും കൈ വിരലിലെ മഷിയടയാളത്തിന്റെ ചിത്രം സഹിതം പോസ്റ്റ് ചെയ്ത് ഫേസ് ബുക്കിലൂടെ അറിയിച്ചു. പക്ഷേ മഷി അടയാളമുള്ളത് ഇടത് കൈയിലെ നടുവിരലിലാണെന്ന് മാത്രം.
സ്വന്തം ലേഖിക
പ്രതികരിക്കാൻ ഇവിടെ എഴുതുക: