കാഞ്ഞിരപ്പള്ളി: പുതുതലമുറയുടെ മൂല്യതകര്ച്ചയ്ക്ക് കാരണം ആത്മീയ വിദ്യാഭ്യാസത്തിന്റെ അഭാവമാണെന്നും ആധുനിക കാലഘട്ടത്തില് ആത്മീയ വിദ്യാഭ്യാസം അനിവാര്യമാണെന്നും വാഴൂര് തീര്ത്ഥപാദാശ്രമം മുഖ്യകാര്യദര്ശി സ്വാമി ഗരുഡധ്വജാനന്ദ തീര്ത്ഥപാദര്. തമ്പലക്കാട് വിവേകാനന്ദ സേവാ സമിതിയുടെ ഒന്നാം വാര്ഷികത്തോടനുബന്ധിച്ച്് സംഘടിപ്പിച്ച വേനല്ക്കളരി തമ്പലക്കാട് എന്എസ്്എസ് യുപി സ്കൂളില് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
കര്മ്മശേഷിയും ഇച്ഛാശക്തിയും മൂല്യബോധവുമുള്ള തലമുറയെ വാര്ത്തെടുക്കുക എന്ന ലക്ഷ്യത്തോടെയാണ് മൂന്നു ദിവസം നീണ്ടു നില്ക്കുന്ന പരിശീലന പരിപാടി സംഘടിപ്പിച്ചിരിക്കുന്നത്. ഉദ്ഘാടന സമ്മേളനത്തില് കെ.എന്. തങ്കമ്മ കാരുശ്ശേരില് അധ്യക്ഷത വഹിച്ചു. ‘സമ്പൂര്ണ്ണ വ്യക്തിത്വവികാസം – അറിവും അനുഷ്ഠാനവും’ എന്ന വിഷയത്തില് പതഞ്ജലി പ്രാണയോഗ വിദ്യാപീഠം മുഖ്യാചാര്യന് ഇ.എം. ഗോപാലകൃഷ്ണന് ക്ലാസ് നയിച്ചു. ആര്. രാജീവ് കടക്കയം, എ.ആര്. പ്രകാശ് ബാബു, കെ.സി. ശിവദാസ് എന്നിവര് പ്രസംഗിച്ചു. ഇന്ന് രാവിലെ 9.30ന് ‘സംസ്ക്കാരത്തിന്റെ ചൈതന്യ സ്രോതസ്സുകള്’ എന്ന വിഷയത്തില് ഡോ. ഉണ്ണികൃഷ്ണന് കര്ത്തായും, ഉച്ചകഴിഞ്ഞ് 2ന് ‘ശുഭാപ്തി വിശ്വാസം ജീവിത വിജയത്തിന്’ എന്ന വിഷയത്തില് പ്രൊഫ. ബിന്സ് എം. മാത്യുവും ക്ലാസുകള് നയിക്കും. സമാപന ദിവസമായ നാളെ മാതാപിതാക്കളും പങ്കെടുക്കും. രാവിലെ 9.30ന് കോട്ടയം എസ്എന്ഡിപി വനിതാ യൂണിയന് പ്രസിഡന്റ് ഷൈലജാ രവീന്ദ്രന് ‘ആധ്യാത്മിക, ധാര്മ്മിക മൂല്യബോധം കുടുംബ വിജയത്തിന്’ എന്ന വിഷയത്തില് ക്ലാസ് നയിക്കും. കര്ഷക മോര്ച്ച സംസ്ഥാന സെക്രട്ടറി പി.ആര്. മുരളീധരന് ‘ആരോഗ്യവും അടുക്കളത്തോട്ടവും’ എന്ന വിഷയത്തില് ക്ലാസ് നയിക്കും. ഉച്ചകഴിഞ്ഞ് രണ്ടിന് മീനടം ഉണ്ണികൃഷ്ണന്, കലാമണ്ഡലം ഭാഗ്യനാഥ്, കലാമണ്ഡലം പുരുഷോത്തമന് എന്നിവര് കഥകളി അവതരിപ്പിച്ച് പരിചയപ്പെടുത്തും. തുടര്ന്ന് ടിവി താരം ശ്രീജിത്ത് ചെറുവള്ളി കുട്ടികള്ക്ക് സര്ട്ടിഫിക്കറ്റുകള് വിതരണം ചെയ്യും.
പ്രതികരിക്കാൻ ഇവിടെ എഴുതുക: