ശ്ലോകം. 90.
ഉത്തമഃ സത്തമോ ഉഗ്രഃ ഉദാനോ ജീയനായകഃ
വ്യാനാപാനോ സമാനശ്ച ജീവമൃത്യുവിഭാജകഃ
392: ഉത്തമഃ ഉത്തമന്. ഉത്തമന് എന്ന പദത്തിനു ഏറ്റവും ശ്രേഷ്ഠന് എന്നര്ഥം. ഈ അര്ഥത്തില് വിഷ്ണു പര്യായമായി ഈ പദം പ്രചാരത്തിലുണ്ട്. ഭഗവാനെക്കാള് ശ്രേഷ്ഠനായി മറ്റാരും ഉണ്ടാകാനിടയില്ലല്ലോ.
393: സത്തമഃ സത്തുക്കളില് ശ്രേഷ്ഠന്. സത് എന്നു വിശേഷിപ്പിക്കാവുന്ന എല്ലാ ഗുണങ്ങളും ഭഗവാന്റെ അല്പമാത്രമായ വിഭൂതികളാണ്. എല്ലാ നന്മയ്ക്കും ഉറവിടമായ ഗുരുവായൂരപ്പനെ സത്തുക്കളില് മുഖ്യനായി നാമം വാഴ്ത്തുന്നു.
394: ഉഗ്രഃ ഉഗ്രതയുള്ളവന് ഉഗ്രശബ്ദത്തിന് വളരെ ശക്തിയുള്ള, വമ്പിച്ച, കടുപ്പമുള്ള, ക്രൂരതയുള്ള, കോപമുള്ള, ഊക്കേറിയ, ഉയര്ന്ന, ശ്രേഷ്ഠതയുള്ള തുടങ്ങിയ അര്ഥങ്ങളുണ്ട്. ഈ സ്വഭാവങ്ങളെല്ലാം ഓരോ സന്ദര്ഭത്തില് ഭഗവാന്റെ ലീലകളില് കാണാം. വരാഹമായും നരസിംഹമായും രാമനായും കൃഷ്ണനായും മറ്റുമുള്ള അവതാരകഥകള് ഓര്ക്കുക. എല്ലാ അര്ഥങ്ങള്ക്കും ചേര്ന്ന സംഭവങ്ങള് കൃഷ്ണാവതാര ലീലയില് സുലഭമാണ്. ഗോവര്ധനപര്വതം വിരലുകൊണ്ടുയര്ത്തിയതും കുവലയാ പീഡത്തിന്റെ കൊമ്പ് ഊരിയെടുത്തതും കാളിയനെ ചവിട്ടിയരച്ചതും പോലെ എത്രയെത്ര ഉദാഹരണങ്ങള്.
ഡോ. ബി.സി.ബാലകൃഷ്ണന്
പ്രതികരിക്കാൻ ഇവിടെ എഴുതുക: