ന്യൂദല്ഹി : റെയില്വേ റദ്ദാക്കിയ കേരളത്തിലെ എല്ലാ സ്റ്റോപ്പുകളും ഉടന് പുനഃസ്ഥാപിക്കുമെന്ന് കേന്ദ്രറെയില്വേ മന്ത്രി സദാനന്ദഗൗഡ പറഞ്ഞു. കേരളത്തിന്റെ വിവിധ ആവശ്യങ്ങളുന്നയിച്ച് കേന്ദ്രമന്ത്രിമാരെ സന്ദര്ശിച്ച ബി.ജെ.പി നേതാക്കളായ ദേശീയസെക്രട്ടറി പി.കെ.കൃഷ്ണദാസ്, സംസ്ഥാന ജനറല് സെക്രട്ടറി എ.എന്.രാധാകൃഷ്ണന് എന്നിവര്ക്കാണ് മന്ത്രി ഉറപ്പുനല്കിയത്.
കെ.ടി.ജയകൃഷ്ണന് മാസ്റ്റര്ടി.പി.ചന്ദ്രശേഖരന് വധക്കേസുകളിലും മനുഷ്യക്കടത്ത് സംഭവത്തിലും സി.ബി.ഐ അന്വേഷണം നടത്തണമെന്ന് കേന്ദ്ര ആഭ്യന്തരമന്ത്രി രാജ്നാഥ് സിംഗുമായുള്ള ചര്ച്ചയില് ആവശ്യപ്പെട്ടു. ഗാഡ്ഗില് കസ്തൂരിരംഗന് റിപ്പോര്ട്ടുകളുടെ വിഷയത്തില് കേന്ദ്ര പരിസ്ഥിതി മന്ത്രി പ്രകാശ് ജാവഡേക്കര്, പൊതുമേഖലാ സ്ഥാപനങ്ങളുടെ പുനരധിവാസവുമായി ബന്ധപ്പെട്ട വിഷയത്തില് കേന്ദ്രമന്ത്രി പൊന് രാധാകൃഷ്ണന് എന്നിവരുമായും ചര്ച്ച നടത്തി.
കേരളത്തിന്റെ ടൂറിസം വികസനത്തിന് എല്ലാ പിന്തുണയും കേന്ദ്രത്തില് നിന്നുണ്ടാകുമെന്നും ഉടന് കേരളം സന്ദര്ശിക്കുമെന്നും കേന്ദ്ര ടൂറിസം മന്ത്രി ശ്രീപാദ് നായിക്കുമായുള്ള ചര്ച്ചയില് അദ്ദേഹം ഉറപ്പുനല്കി.
മലബാറിന്റെ വികസന സ്വപ്നങ്ങള്ക്ക് ഗതിവേഗം പകരാന് തലശ്ശേരി-മൈസൂര് റെയില്വേ ലൈന് നടപ്പാക്കണമെന്നാവശ്യപ്പെട്ടും ബിജെപി നേതാക്കള് ഗൗഡയ്ക്ക് നിവേദനം നല്കി. തലശ്ശേരി-മൈസൂര് റൂട്ടില് റീസര്വ്വേ നടത്തി പദ്ധതിക്ക് പുതുജീവന് നല്കണമെന്നാണ് ആവശ്യം.
ബ്രിട്ടീഷ് ഭരണകാലത്ത് അംഗീകാരം ലഭിച്ച റെയില്വേ ലൈന് പിന്നീട് പല കാരണങ്ങളാല് നീണ്ടു പോവുകയായിരുന്നു.കര്ണ്ണാടകത്തിലെ വിരാജ്പേട്ട മുതല് കേരളത്തിലെ വള്ളിത്തോട് വരെയുള്ള നിര്ദ്ദിഷ്ട റെയില്വേ ലൈന് വടക്കന് മലബാറിന്റെ വികസനത്തിന് കുതിപ്പേകും. മൈസൂര്-തലശ്ശേരി പാതയുടെ പ്രവര്ത്തനങ്ങള് ഒന്നാം ലോകമഹായുദ്ധത്തെ തുടര്ന്നാണ് ആദ്യം തടസ്സപ്പെട്ടത്. പിന്നീട് സ്വാതന്ത്ര്യലബ്ദിക്കു ശേഷം പ്രധാനമന്ത്രി ലാല് ബഹാദൂര് ശാസ്ത്രിയുടെ കാലത്ത് വീണ്ടും പാതയെന്ന ആവശ്യം ഉയര്ന്നു വന്നെങ്കിലും അതും യാഥാര്ത്ഥ്യത്തിലേക്കെത്തിയില്ല. കണ്ണൂര് വിമാനത്താവളവുമായും തുറമുഖവുമായും കര്ണ്ണാടകത്തിലെ നഗര-ഗ്രാമങ്ങള്ക്ക് പുതിയ പാത യാഥാര്ത്ഥ്യമാകുന്നതോടെ ബന്ധം സുഗമമാകും. നിലവില് രണ്ടു സര്വ്വേകള് പദ്ധതിക്കായി റെയില്വേ ഇതിനകം നടപ്പാക്കിയിട്ടുണ്ട്. ആദ്യസര്വ്വേയില് 249 കിലോ മീറ്ററും രണ്ടാമത്തെ സര്വ്വേയില് 298 കിലോമീറ്ററുമാണ് റെയില്പാതയുടെ നീളം. എന്നാല് രണ്ടു പദ്ധതിയും ഉപേക്ഷിക്കപ്പെടുകയായിരുന്നു. തലശ്ശേരി-മൈസൂര് 146 കിലോമീറ്റര് മാത്രമാണ്.
പ്രതികരിക്കാൻ ഇവിടെ എഴുതുക: