477. ഭാസുരഃ – ഗുരുവായൂരപ്പന് പരാക്രമിയാണെന്ന് എടുത്തുപറയേണ്ട കാര്യമില്ല. എല്ലാ പുരാണങ്ങളും ഇതിഹാസങ്ങളും അതിനു സാക്ഷ്യം വഹിക്കുന്നു. അധര്മ്മം ശക്തിപ്പെട്ട് ധര്മ്മത്തിനു ഗ്ലാനി സംഭവിച്ചിട്ടുള്ളപ്പോഴെല്ലാം ഭഗവാന്റെ പരാക്രമമാണ് ധര്മ്മസംസ്ഥാപനം നടത്തിയത്.
ഭയങ്കരന് എന്ന അര്ത്ഥം സ്വീകരിച്ചാല് അധര്മ്മികള്ക്കു ഭയമുണ്ടാക്കുന്നവന് എന്നു വ്യക്തമാക്കണം. ഭഗവാന്റെ അതിഭയങ്കരമായ രൂപവും ഭാവവും പ്രവര്ത്തനവും അറിയാന് നരസിംഹാവതാരം വര്ണ്ണിക്കുന്ന നാരാണീയം 25-ാം ദശകത്തിലെ ആദ്യ ശ്ലോകങ്ങള് വായിക്കുക. ആ ദശകം മുഴുവന് വായിച്ചാല് ഭഗവാന്റെ ഭയങ്കരമായ രൂപവും പരാക്രമവും ഭക്തനും ബാലനുമായ പ്രഹ്ലാദന് ഭയമുണ്ടാക്കിയില്ല എന്നു കാണാം. അധര്മ്മികള്ക്കേ ഭഗവാനെ ഭയപ്പെടേണ്ടതുള്ളൂ.
478. ഭൂമിപാലകഃ – ഭൂമിയെ രക്ഷിക്കുന്നവന്. ലോകങ്ങള് പലതുണ്ടെങ്കിലും ഏറ്റവും ശ്രേഷ്ഠം ഭൂലോകമാണെന്നു തത്ത്വവാദികള് പറയുന്നു. ധര്മത്തിന്റെ വിളഭൂമിയാണു ഭൂമി. കര്മ്മങ്ങളെല്ലാം അതതിന്റെ ഫലത്തില് എത്തിച്ചേരുന്നതും ഭൂമിയിലാണ്. ലോകസംഗ്രഹം ആഗ്രഹിക്കുന്ന അന്യലോകവാസികള്ക്കും ആശ്രയം ഭൂമിയാണ്. അങ്ങനെയുള്ള ഭൂമിയുടെ പാലനമാണ് ലോകരക്ഷകനായ ഗുരുവായൂരപ്പന്റെ ധര്മ്മ സ്ഥാപന പരിശ്രമത്തിന്റെ ലക്ഷ്യം.
ശ്ലോകം 102. മധുവൈരീ കൈടഭാരിര്മന്ത്രജ്ഞേ മന്ത്രദര്ശകഃ
യതിവര്യോ യജമാനോ യക്ഷകര്ദ്ദമഭൂഷിതഃ
479. മധുവൈരീഃ – മധുവിന്റെ ശത്രു, മധുവിനെ നശിപ്പിച്ചവന്,യോഗനിദ്രയിലായിരുന്ന മഹാവിഷ്ണുവിന്റെ കര്ണ്ണമലത്തില്നിന്നും മധു എന്നും കൈമഭനെന്നും രണ്ടു അസുരന്മാരുണ്ടായി. ബ്രഹ്മദേവനെ ആക്രമിക്കാന് തുനിഞ്ഞ അവരെ വിഷ്ണുഭഗവാന് വധിച്ചു. മധു എന്ന അസുരനെ വധിച്ചതിനാല് ഭഗവാന് മധുവൈരി എന്നു നാമം.
മധു എന്ന പദത്തിന് മദ്യം എന്ന് അര്ത്ഥം. മദ്യം മദിപ്പിക്കുന്നതാണ്. മദം ഉണ്ടാക്കുന്നതു മദ്യം. മദ്യം അഹങ്കാരമാണ്. കാമം,ക്രോധം തുടങ്ങിയ ദോഷങ്ങള് മദ്യത്തില് നിന്നുണ്ടാകും. അഹങ്കാരമുണ്ടാക്കുന്ന, മദിപ്പിക്കുന്ന മധുവിനു വൈരിയായി ഗുരുവായൂരപ്പനെ സ്തുതിക്കുന്ന നാമമായും വ്യാഖ്യാനിക്കാം.
(തുടരും)
ഡോ. ബി.സി.ബാലകൃഷ്ണന്
പ്രതികരിക്കാൻ ഇവിടെ എഴുതുക: