506. ഷഡഭിജ്ഞഃ – ആറുകാര്യങ്ങളെക്കുറിച്ച് പൂര്ണമായ അറിവുള്ളവന്. ഈശ്വരവാചിയായി ഉപയോഗിക്കുന്ന ഈ പദത്തെ ആചാര്യന്മാര് പലതരത്തില് വ്യാഖ്യാനിക്കുന്നു. മുഖ്യമായ ചില വ്യാഖ്യാനങ്ങള് ചുവടെ ചേര്ക്കുന്നു. (1) ഭൂതങ്ങളുടെ ഉത്പത്തി, വിപത്തി, ആഗതി, ഗതി, വിദ്യ, അവിദ്യ എന്നിവ ആറും അറിയുന്നവന്. (2) സമ്പൂര്ണമായ ഐശ്വര്യം, ധൈര്യം, കീര്ത്തി, സമ്പത്ത്, ജ്ഞാനം, വൈരാഗ്യം എന്നിവയുള്ളവന്. (3) പരമഹൃദയജ്ഞാനം, ആകാശഗമനം, കായവ്യൂഹം, പൂര്വനിവാസാനുസ്മൃതി, ദിവ്യദൃഷ്ടി, ആത്മജ്ഞാനം എന്നിവയുള്ളവന്. (4) ധര്മ്മം, അധര്മ്മം, കാമം, മോക്ഷം, ലോകം, തത്ത്വര്ത്ഥം എന്നിവ അറിയുന്നവന്.
ഇനിയും പല വിഷയങ്ങളുള്പ്പെടുത്തി ആചാര്യന്മാര് ഭഗവാന്റെ ഷഡഭിജ്ഞതയെ വ്യാഖ്യാനിക്കാന് ശ്രമിക്കുന്നു. ഇതില് ഓരോന്നും വിശദമാക്കണമെങ്കില് ഒരു ഗ്രന്ഥം തന്നെ വേണ്ടിവരും. എല്ലാ വ്യാഖ്യാനങ്ങളും ഭഗവാനെക്കുറിച്ചു ചില കാര്യങ്ങള് അവതരിപ്പിക്കുന്നു എന്നേയുള്ളൂ. വിഷ്ണു പര്യായമായി ‘ഷഡദിജ്ഞഃ’ എന്ന നാമം പുരാണകര്ത്താക്കള് പ്രയോഗിച്ചിട്ടുണ്ട്. നമുക്ക് എല്ലാ വ്യാഖ്യാനങ്ങളും ചേര്ത്ത് സര്വജ്ഞന് എന്ന ഒറ്റവാക്കില് വ്യാഖ്യാനത്തെ സംഗ്രഹിക്കാം.
507. ഷഡാധാരപദ്മകേന്ദ്രനിവാസകഃ – കുണ്ഡലിനീയോഗദര്ശനപ്രകാരം മനുഷ്യശരീരത്തില് നട്ടെല്ലിനുള്ളിലുള്ള സുഷുമ്നാ നാഡിക്കുള്ളില് ആറ് ആധാരചക്രങ്ങളുണ്ട്. ശരീരം മുഴുവന് വ്യാപിക്കുന്ന നാഡികളുടെ കേന്ദ്രങ്ങളാണിവ. ഇവയെ ആധാരപദ്മങ്ങളെന്നും പറയും. ഈ ആധാരപദ്മങ്ങളോരോന്നിലും കേന്ദ്രസ്ഥാനത്ത് ഭഗവാന് വ്യത്യസ്തരൂപങ്ങളില് സ്ഥിതിചെയ്യുന്നതായി വൈഷ്ണവതന്ത്രങ്ങള് അഭിപ്രായപ്പെടുന്നു. ഓരോ പദ്മത്തിലും ഭഗവാന്റെ ശിരസ്സുകളുടെ എണ്ണവും പദ്മത്തിന്റെ നിറവും ആ പദ്മത്തിന്റെ സംരക്ഷണയിലുള്ള ശരീരഭാഗവും വ്യത്യസ്തമാണ്. കൂടുതല് വിവരങ്ങള് ഗുരുമുഖത്തുനിന്നറിയുന്നതു മെച്ചം.
(തുടരും)
ഡോ. ബി.സി.ബാലകൃഷ്ണന്
പ്രതികരിക്കാൻ ഇവിടെ എഴുതുക: