ചങ്ങനാശേരി: അസംപ്ഷന് കോളേജില് യുജിസി ധനസഹായത്തോടെ മലയാളം, ജേര്ണലിസം വിഭാഗങ്ങളുടെ ആഭിമുഖ്യത്തില് സംഘടിപ്പിക്കുന്ന ദേശീയ മാധ്യമസെമിനാര് ഇന്നാരംഭിക്കും. രാവിലെ പത്തിന് മന്ത്രി രമേശ് ചെന്നിത്തല ഉദ്ഘാടനം ചെയ്യും. ആര്ച്ച്ബിഷപ് മാര് ജോസഫ് പെരുന്തോട്ടം അധ്യക്ഷത വഹിക്കും. എംജി യൂണിവേഴ്സിറ്റി ഡിപ്പാര്ട്ടുമെന്റ് ഓഫ് ജേര്ണലിസം ഡയറക്ടര് പ്രൊഫ. മാടവന ബാലകൃഷ്ണപിള്ള മുഖ്യപ്രഭാഷണം നടത്തും. ഉച്ചകഴിഞ്ഞ് 1.30ന് ടെലിവിഷനും മലയാളിയുടെ സാമൂഹിക ഭാവനയും എന്ന വിഷയത്തെക്കുറിച്ച് സിനിമാ നിരൂപകന് ഡോ.സി.എസ്. വെങ്കിടേശന്, തിര ഭൂപടത്തിന്റെ അകവും അരികുകളും എന്ന വിഷയത്തില് എംജി സര്വകലാശാലാ സ്കൂള് ഓഫ് ലെറ്റേഴ്സ് ഡയറക്ടര് ഡോ.പി.എസ്.രാധാകൃഷ്ണന് എന്നിവര് പ്രബന്ധങ്ങള് അവതരിപ്പിക്കും.
നാളെ രാവിലെ 9.30ന് ‘മാധ്യമങ്ങള് സാമൂഹിക മാറ്റത്തിന്റെ ചാലകശക്തികള്’ എന്ന വിഷയത്തില് സംവാദം നടക്കും. ദീപിക ചീഫ് എഡിറ്റര് ഫാ. ബോബി അലക്സ് മണ്ണംപ്ലാക്കല് ഉദ്ഘാടനം ചെയ്യും. ഡോ. പോള് മണലില് മോഡറേറ്ററായിരിക്കും. നാലിനു രാവിലെ 9.45ന് പ്രബന്ധാവതരണങ്ങള് നടക്കും. 11ന് ഡിപ്പാര്ട്ടുമെന്റ് ഓഫ് ജേര്ണലിസം മാസ് കമ്മ്യൂണിക്കേഷന് കാലിക്കട്ട്, കണ്ണൂര് സര്വകലാശാലാ ഡയറക്ടര് ഡോ. സി.ഡി. ചാക്കപ്പന് പ്രഭാഷണം നടത്തും. ഉച്ചകഴിഞ്ഞ് രണ്ടിനു നടക്കുന്ന സമാപന സമ്മേളനത്തില് പ്രിന്സിപ്പല് ഡോ. സിസ്റ്റര് മേഴ്സി നെടുമ്പുറം അധ്യക്ഷത വഹിക്കും.
പ്രതികരിക്കാൻ ഇവിടെ എഴുതുക: