മട്ടാഞ്ചേരി: സംസ്ഥാനത്തെ ബാറുകള്ക്ക് എത്ര സ്റ്റാര് വേണമെന്ന ചര്ച്ചയിലാണ് ഇപ്പോഴും യുഡിഎഫ് സര്ക്കാര്. ഇതാണോ യഥാര്ഥ മദ്യനിരോധന നയമെന്ന് സര്ക്കാര് വ്യക്തമാക്കണമെന്ന് ഹിന്ദു ഐക്യവേദി സംസ്ഥാന പ്രസിഡന്റ് കെ. പി. ശശികല ടീച്ചര് ആവശ്യപ്പെട്ടു. മദ്യനിരോധനം നടപ്പിലാക്കുമ്പോള് സമൂഹം മറ്റൊന്നിലേക്ക് വഴുതിമാറാതെ നോക്കേണ്ടത് സര്ക്കാരിന്റെ ഉത്തരവാദിത്വമാണെന്നും അവര് പറഞ്ഞു.
ശ്രീകൃഷ്ണജയന്തി ആഘോഷങ്ങളുടെ ഭാഗമായി മട്ടാഞ്ചേരി ടിഡി ഹൈസ്കൂളില് സംഘടിപ്പിച്ച കുടുംബസംഗമത്തില് മുഖ്യപ്രഭാഷണം നടത്തുകയായിരുന്നു ശശികല ടീച്ചര്. ദുഃശീലങ്ങളും ദുഃസ്വഭാവങ്ങളും സമൂഹത്തെ വരിഞ്ഞുമുറിക്കിയിരിക്കുകയാണ്. ഇതില് നിന്നും യുവതലമുറയെ മോചിപ്പിക്കുവാന് സാംസ്കാരിക ഉദ്ബോധനമാണ് വേണ്ടതെന്നും അവര് പറഞ്ഞു. തലമുറകള് പിന്നിട്ട് നാം കാത്തുസൂക്ഷിച്ചുപോരുന്ന ഭാരതീയ സംസ്കാരം അതിന്റെ തനിമയും പവിത്രതയും ഒട്ടും നഷ്ടപ്പെടാതെ വരും തലമുറക്ക് കൈമാറുവാന് നമുക്ക് കഴിയണമെന്നും അവര് അഭ്യര്ഥിച്ചു. ഉദ്ദേശശുദ്ധിയും ലക്ഷ്യബോധവും ഉണ്ടെങ്കിലെ ജീവിതത്തില് വിജയിക്കുവാന് കഴിയു എന്ന സത്യം ഇന്ത്യന് ജനതക്ക് കാണിച്ചുതന്ന വ്യക്തിയാണ് നമ്മുടെ പ്രധാനമന്ത്രി നരേന്ദ്രമോദിയെന്നും അവര് കൂട്ടിച്ചേര്ത്തു.
ശ്രീകൃഷ്ണ ജയന്തി ആഘോഷ കമ്മറ്റി രക്ഷാധികാരി ഡോ.ജയചന്ദ്രന് സമ്മേളനത്തില് അധ്യക്ഷനായി. ഡോ.ശശാങ്ക പ്രഭു കുടുംബ സമ്മേളനം ഉദ്ഘാടനം ചെയ്തു. ആഘോഷകമ്മിറ്റി ഉപാധ്യക്ഷന് സുധീഷ് എസ്. ഷേണായ്, കൗണ്സിലര് ശ്യാമള എസ് പ്രഭു, ബിജെപി ജില്ലാ സമിതി അംഗം കെ. ശശിധരന് മാസ്റ്റര്, വിശ്വനാഥ് അഗര്വാള്, ജനറല് സെക്രട്ടറി അഭിലാഷ് എന് കമ്മത്ത്, ശ്രീലക്ഷ്മി അജിത്ത്, കുമാരി കാവ്യ എന്നിവര് പ്രസംഗിച്ചു. തുടര്ന്ന് ഗോകുലാംഗങ്ങളുടെ വിവിധ കലാപരിപാടികളും അരങ്ങേറി.
പ്രതികരിക്കാൻ ഇവിടെ എഴുതുക: