913. ശ്രുതഃ – ശ്രുതന്. കേള്ക്കപ്പെട്ടവന്, കേള്വിപ്പെട്ടവന്. പ്രസിദ്ധന്. ഗുരുവായൂരപ്പനെ ഗുരുവായൂരമ്പലത്തിലെ പ്രതിഷ്ഠാമൂര്ത്തിയായി കരുതിയാലും വൈകുണ്ഠവാസിയായ മഹാവിഷ്ണുവായി സങ്കല്പ്പിച്ചാലും ഗോലോകത്തിലെ രാധാസമേതനായ കൃഷ്ണനായി കരുതിയാലും അമ്പാടിയിലെ നവനീതചോരനായ ഉണ്ണിക്കണ്ണനായി സങ്കല്പ്പിച്ചാലും ഗോപസ്ത്രീകളാകുന്ന ഉപനിഷത്തുകളോടൊത്തു രാസകേളിയില് മുഴുകുന്ന വേദാന്തപ്പൊരുകളായി കണ്ടാലും അര്ജ്ജുനന്റെ തേരാളിയുടെ വേഷത്തില് ഗീതോപദേശം ലോകത്തിനു നല്കിയ ആചാര്യവര്യനായി മാനിച്ചാലും ഭഗവാന് ലോകപ്രശസ്തനാണ്. പുരാണകഥാപാത്രങ്ങളും മതാചാര്യന്മാരും യുദ്ധവീരരും സുന്ദരന്മാരും കലാകാരന്മാരും ശാസ്ത്രജ്ഞന്മാരുമൊക്കെയായി ലോകമാകെ അറിയപ്പെടുന്ന പ്രസിദ്ധര് പലരുമുണ്ട്. പക്ഷേ കല്പിതകഥാപാത്രങ്ങളെയും പുരാണകഥാപാത്രങ്ങളെയും ചരിത്രപുരുഷന്മാരെയും ചേര്ത്തു പരിശോധിച്ചാലും ശ്രീകൃഷ്ണനെക്കാള് വിശ്രുതനായ മറ്റൊരു പുരുഷനെ കണ്ടെത്താന് കഴിയുകയില്ല. ഭഗവാനെ സ്തുതിക്കാനായി പ്രഥിതമായ നാരായണീയം രചിച്ച പണ്ഡിതനും വൈയാകരണനും കവികുലപതിയുമായ മേല്പ്പുത്തൂര് നാരായണഭട്ടതിരി ഭഗവാന്റെ മേന്മ വര്ണ്ണിക്കാന് ശ്രമിച്ച് തോല്വി സമ്മതിച്ചെഴുതിയ ഒരു ശ്ലോകമുണ്ട്.
”യത് ത്രൈലോക്യമഹീയസോളപി മഹിതം സമ്മോഹനം മോഹനാത്
കാന്തം കാന്തിനിധാനതോളപി മധുരം മാധുര്യധുര്യാദപി
സൗന്ദരേ്യാത്തരതോളപി സുന്ദരതരം ത്വദ്രൂപമാശ്ചര്യതോ-
പ്യാശ്ചര്യം ഭുവനേ ന കസ്യ കുതുകം പുഷ്ണാതി വിഷ്ണോ വിഭോ”
( വിഭുവായ ഗുരുവായൂരപ്പാ മൂന്നുലോകങ്ങളിലും മഹീയസ്സായതിനേക്കാള് മഹത്തും മോഹനമായുള്ളതിനെക്കാള് സമ്മോഹനവും കാന്തിനിധാനമായുള്ളതിനെക്കാള് കാന്തിമത്തും മാധുര്യസാരത്തെക്കാള് മധുരവും സൗന്ദരേ്യാത്തരമായതിനെക്കാള് സുന്ദരതരവും ആയ നിന്തിരുവടിയുടെ രൂപം ആര്ക്കാണു കൗതുകം വളര്ത്താത്തത്. നാരായണീയം 2-3. ഈ ശ്ലോകത്തിന്റ അര്ത്ഥവും വ്യാഖ്യാനവും മനനം ചെയ്താല് ഈ നാമത്തിന്റെ അര്ത്ഥം വ്യക്തമാകും.
914. അശ്രുതഃ – അപ്രസിദ്ധന്. അറിയപ്പെടാത്തവന്. പ്രപഞ്ചമായി വ്യാപിച്ച വിഷ്ണുഭഗവാന്റെ ഏതാനും അവതാരങ്ങളുമായി ബന്ധപ്പെട്ട ചില കഥകള് കേട്ടും വായിച്ചും നമുക്കറിയാം. അത്രയേ നമുക്കറിയാവൂ. ഓരോ ജീവിയിലും വസ്തുവിലും എത്രയെത്ര രൂപങ്ങളിലാണു ഭഗവാന് പ്രവര്ത്തിക്കുന്നതെന്ന് അറിയാവുന്നവര് ആരുമില്ല. ഭഗവാനെക്കുറിച്ചു മനുഷ്യര്ക്കെല്ലാവര്ക്കുമുള്ള അറിവ് ഒരുമിച്ചു ചേര്ത്താല് ഭഗവാന്റെ സൃഷ്ടിയിലെ ഏറ്റവും ചെറിയ ഒരു അണുവോളവും ആകുകയില്ല. ഗുരുവായൂരപ്പന്റെ അപദാനങ്ങള് അപ്രസിദ്ധമായിത്തന്നെ തുടരുന്നതിനാല് ഭഗവാന് അശ്രുത എന്നു നാമം.
(തുടരും)
പ്രതികരിക്കാൻ ഇവിടെ എഴുതുക: