എന്റെ കുട്ടികളേ, നിങ്ങള്ക്ക് ഈ സന്ദേശം- ‘ക്ലൈബ്യം മാ സ്മഗമഃ പാര്ത്ഥ, നൈതത് ത്വയുപപദ്യതേ’ എന്ന സന്ദേശം ലോകത്തില് വിളംബരപ്പെടുത്താന് കഴിഞ്ഞാല്, അപ്പോള്, എല്ലാ വ്യഥയും വിഷാദവും പാപവും ദുഃഖവും ഈ ഭൂമുഖത്തുനിന്ന് മൂന്നു നാള്ക്കകം കാണാതാകും. പിന്നീട് ദൗര്ബല്യത്തെസംബന്ധിച്ച ഈ ആശയങ്ങള് ഒരിടത്തും ഉണ്ടാവില്ല.
ഇന്ന് അതെല്ലായിടത്തുമുണ്ട്- ഭയസ്പന്ദങ്ങളുടെ പ്രവാഹം. ഈ പ്രവാഹത്തിന്റെ ഗതി തിരിച്ചുവിടുക, എതിര്സ്പന്ദനങ്ങള് സൃഷ്ടിക്കുക- അപ്പോള് കാണാം അത്ഭുതകരമായ പരിവര്ത്തനം. നിങ്ങള് സര്വശക്തരാണ്- പീരങ്കിയുടെ മുഖത്തേയ്ക്കുതന്നെയും ചെല്ലുക, ഭയമരുത്.
അതിനീചനായ പാപിയെപ്പോലും വെറുക്കരുത്; അവന്റെ പുറംതൊലിയിലേക്കു നോക്കരുത്. അന്തരംഗത്തിലേക്കു നോക്കുക. അവിടെ പരമാത്മാവ് ഇരുണരുളുന്നു. കാഹളധ്വനിയില് ലോകത്തെ മുഴുവന് ഇപ്രകാരം വിളിച്ചറിയിക്കുക- ‘നിന്നില് പാപമില്ല; നിന്നില് ദുഃഖമില്ല; നീ സര്വ്വശക്തികളുടെയും സംഭരണകേന്ദ്രമാണ്. ഉത്തിഷ്ഠത, ജാഗ്രത, അകത്തുള്ള ബലം പ്രകാശിപ്പിക്കുക.
ഒരുവന് ഈ ഒരു ശ്ലോകം വായിച്ചാല് മതി- ക്ലബ്യം മാസ്മ ഗമഃ പാര്ത്ഥ, നൈതത് ത്വയുപപദ്യതേ! ക്ഷുദ്രം ഹൃദയ ദൗര്ബല്യം ത്യക്തോത്തിഷ്ഠ പരംതപ- അയാള്ക്കു ഗീത മുഴുവന് വായിക്കുന്നതിന്റെ ഫലവും സിദ്ധിക്കുന്നു; എന്തെന്നാല് ഈ ഒറ്റ ശ്ലോകത്തില് ഗീതയുടെ സന്ദേശം മുഴുവന് അടങ്ങിയിരിക്കുന്നു.
പ്രതികരിക്കാൻ ഇവിടെ എഴുതുക: