നിയമങ്ങളുടെ ദ്രഷ്ടാക്കളെ ഋഷികള് എന്നുവിളിക്കുന്നു. പൂര്ണന്മാരെന്ന നിലയില് അവരെ ഞങ്ങള് പൂജിക്കുകയും ചെയ്യുന്നു. അവരില് ഏറ്റവും മഹിമയുള്ളവരില് ചിലര് സ്ത്രീകളായിരുന്നു എന്ന് ഈ സദസ്സിനോടു പറയാന് എനിക്കു സന്തോഷമുണ്ട്.
ഈ നിയമങ്ങള് നിയമങ്ങളെന്ന നിലയില് അന്തമറ്റവയായിരിക്കാം: എങ്കിലും അവയ്ക്ക് ആദിയുണ്ടായിരിക്കണം എന്ന് ഇവിടെ ഒരു വാദം വരാം.
സൃഷ്ടിക്ക് ആദിയോ അന്തമോ ഇല്ലെന്നു വേദങ്ങള് ഉപദേശിക്കുന്നു. വിശ്വശക്തിയുടെ ആകത്തുക സദാ സമമാണെന്നു ശാസ്ത്രം തെളിയിച്ചിട്ടുള്ളതായി പറയപ്പെടുന്നു. അപ്പോള്, ഒന്നും ഇല്ലാതിരുന്ന ഒരു കാലം ഉണ്ടായിരുന്നെങ്കില് ഈ വ്യക്തശക്തിയെല്ലാം എവിടെയായിരുന്നു? അത് ഈശ്വരനില് അവ്യക്തമായിരുന്നു എന്നു ചിലര് പറയുന്നു. എങ്കില് ഈശ്വരന് ചിലപ്പോള് അവ്യക്തശക്തിയും ചിലപ്പോള് വ്യക്തശക്തിയും ആകും. അത് ഈശ്വരനെ വികാരിയാക്കും. വികാരമുള്ളതെല്ലാം കൂട്ടാണ്. കൂട്ടെല്ലാംതന്നെ വിനാശമെന്ന വികാരത്തിനു വിധേയമാകണം. അപ്പോള് ഈശ്വരന് നശിക്കും; ഇത്രബദ്ധം. അതുകൊണ്ട് സൃഷ്ടി ഇല്ലാതിരുന്ന കാലം ഒരിക്കലുമില്ലായിരുന്നു.
പ്രതികരിക്കാൻ ഇവിടെ എഴുതുക: