കോട്ടയം: ശബരിമലയുടെ സമഗ്രവികസനത്തിനായി തെക്കേ ഇന്ത്യയിലെ എല്ലാ സംസ്ഥാനങ്ങളിലെയും പ്രതിനിധികളെ വിളിച്ചുകൂട്ടി പ്രത്യേക പദ്ധതി തയ്യാറാക്കുമെന്ന് മുഖ്യമന്ത്രി ഉമ്മന്ചാണ്ടി പ്രസ്താവിച്ചു. ശബരിമലയെ ദേശീയ തീര്ത്ഥാടന കേന്ദ്രമാക്കണമെന്ന് സംസ്ഥാന സര്ക്കാര് കേന്ദ്ര മന്ത്രിസഭയ്ക്ക് നിവേദനം നല്കിയിട്ടുണ്ടെന്നും അദ്ദേഹം പറഞ്ഞു. ശബരിമല വികസനത്തിന് ആവശ്യമായ വനഭൂമി വിട്ടുകിട്ടുന്നപ്രശ്നം രണ്ടുവട്ടം പ്രധാനമന്ത്രിയുടെ ശ്രദ്ധയില്പ്പെടുത്തിയിട്ടുണ്ട്. ഇക്കാര്യത്തില് കേന്ദ്രം അനുകൂലമായ നിലപാടാണ് സ്വീകരിച്ചിട്ടുള്ളത്.
ശബരിമലയിലെ ശുചീകരണം വളരെ ഗൗരവതരമായ പ്രശ്നമാണ്. ഇക്കാര്യത്തില് ഇതര സംസ്ഥാന സര്ക്കാരുകളുടെ സഹകരണം കൂടി ആവശ്യമാണെന്ന് മുഖ്യമന്ത്രി പറഞ്ഞു. വരുന്ന മണ്ഡല-മകരവിളക്കു തീര്ത്ഥാടന കാലത്തെ മുന്നൊരുക്കങ്ങള് വിലയിരുത്തുന്നതിനായി അടുത്ത ദിവസം പമ്പയില് ഉന്നതതലയോഗം നടക്കുമെന്നും അദ്ദേഹം പറഞ്ഞു.
അഖില ഭാരതീയ അയ്യപ്പധര്മ്മ പ്രചാരസഭയുടെ ഒന്പതാമത് ജന്മദിനാഘോഷങ്ങളുടെ മുന്നോടിയായി പുണ്യദര്ശനം ആദ്ധ്യാത്മിക പഠന ഗവേഷണത്തിന്റെ കൂടി സഹകരണത്തോടെ നിയുക്ത ശബരിമല മേല്ശാന്തി ഇ.എന്. കൃഷ്ണദാസ് നമ്പൂതിരി, മാളിപ്പുറം മേല്ശാന്തി എസ്. കേശവന് നമ്പൂതിരി എന്നിവരെ ആദരിക്കുന്നതിന് കോട്ടയത്ത് ഹോട്ടല് ഐഡ ഓഡിറ്റോറിയത്തില് നടത്തിയ സ്വീകരണസമ്മേളനം ഉദ്ഘാടനം ചെയ്യുകയായിരുന്നു മുഖ്യമന്ത്രി.
പ്രസിഡന്റ് അഡ്വ. ജി. രാമന്നായര് അദ്ധ്യക്ഷത വഹിച്ചു. ജ്യോതിഷ പണ്ഡിതനും താന്ത്രികാചാര്യനുമായ പ്രൊഫ. നീലമന വി.ആര്. നമ്പൂതിരി രചിച്ച ശ്രീമഹാവിഷ്ണുപുരാണം എന്ന ഗ്രന്ഥത്തിന്റെ പ്രകാശനകര്മ്മം മന്ത്രി തിരുവഞ്ചൂര് രാധാകൃഷ്ണന് നിര്വ്വഹിച്ചു. അഖില കേരള തന്ത്രിമണ്ഡലം പ്രസിഡന്റ് എസ്. നീലകണ്ഠന് പോറ്റി അദ്യപ്രതി ഏറ്റുവാങ്ങി. അയ്യപ്പധര്മ്മ പ്രചാരസഭ സംസ്ഥാന വര്ക്കിങ് പ്രസിഡന്റ് ഡോ. എന്. ജയരാജ് എംഎല്എ പുസ്തകാവതരണം നടത്തി. ജനറല് സെക്രട്ടറി മധു മണിമല, ജില്ലാ പോലീസ് ചിഫ് എം.പി. ദിനേശ്, യോഗക്ഷേമസഭ സംസ്ഥാന ജനറല് സെക്രട്ടറി എസ്. രാധാകൃഷ്ണന് പോറ്റി, മുന് ശബരിമല മേല്ശാന്തിമാരായ എഴിക്കോട് ശശി നമ്പൂതിരി, എ.ആര്. രാമന് നമ്പൂതിരി, സംസ്ഥാന സഹകരണ ബാങ്ക് മുന് പ്രസിഡന്റ് കെ.ആര്. അരവിന്ദാക്ഷന്, പ്രോഗ്രാം കമ്മറ്റി ചെയര്മാന് മോഹന് പെരിനാട് എന്നിവര് പ്രസംഗിച്ചു.
ആദ്ധ്യാത്മിക- സാമൂഹിക- സാംസ്കാരിക രംഗങ്ങളില് ശ്രദ്ധേയമായ പ്രവര്ത്തനങ്ങള് കാഴ്ചവച്ച പ്രമുഖ വ്യക്തികളായ ആലുവ തന്ത്രവിദ്യാപീഠം വര്ക്കിങ് പ്രസിഡന്റ് മുല്ലപ്പള്ളി കൃഷ്ണന് നമ്പൂതിരി, ശബരിമല എക്സിക്യൂട്ടീവ് ഓഫീസര് വി.എസ്. ജയകുമാര്, മുന് എസ്പി കെ.കെ. ചെല്ലപ്പന്, അയ്യപ്പധര്മ്മ പ്രചാരസഭ ആന്ധ്രാ സ്റ്റേറ്റ് കൗണ്സില് പ്രസിഡന്റ് ഡോ. ചന്ദ്രമൗലിഗുരുസ്വാമി തിരുപ്പതി, കേരള ഹോമിയോ ശാസ്ത്രവേദി ചെര്മാന് ഡോ. ടി.എന്. പരമേശ്വരക്കുറുപ്പ്, അയ്യപ്പ ഭാഗവതാചാര്യ രമാദേവി ഗോവിന്ദവാര്യര്, കേരള സംഗീതനാടക അക്കാദമി അവാര്ഡ് ജേതാവ് വിനോദ് ചമ്പക്കര, സജീവ് ശാസ്താരം എന്നിവരെ ആദരിച്ചു.
പ്രതികരിക്കാൻ ഇവിടെ എഴുതുക: