തൃപ്രയാര്‍ ഏകാദശി നാളെ: ഇന്ന് ദശമി വിളക്കാഘോഷം

Monday 17 November 2014 12:07 am IST

തൃപ്രയാര്‍: നാളെ ഏകാദശി. സരയൂ തീരത്ത് ഏകാദശി വ്രതം നോറ്റ് പതിനായിരങ്ങള്‍ തൃപ്രയാറിലെത്തും. പുലര്‍ച്ചെ നിര്‍മാല്യ ദര്‍ശനത്തോടെ ഏകാദശി ചടങ്ങുകള്‍ക്ക് തുടക്കമാകും. 8ന് നടക്കുന്ന ശീവേലി എഴുന്നള്ളിപ്പില്‍ 30 ആനകള്‍ അണിനിരക്കും. ദേവസ്വം സീതാരാമന്‍ ഭഗവാന്റെ തിടമ്പേറ്റും. കിഴക്കൂട്ട് അനിയന്‍മാരാരുടെ മേളം അകമ്പടിയാകും. ഉച്ചക്ക് 2ന് ഓട്ടംതുള്ളല്‍, 3ന് നടക്കുന്ന കാഴ്ചശീവേലിക്ക് പെരുവനം സതീശന്‍മാരാര്‍ മേളത്തിന് നേതൃത്വം നല്‍കും. വൈകീട്ട് 6ന് കെ.പി.രാമചന്ദ്രന്റെ പാഠകം, 6.30ന് ദീപാരാധന, രാത്രി 11ന് വിളക്കെഴുന്നള്ളിപ്പ്, തുടര്‍ന്ന് വെടിക്കെട്ട് എന്നിവ നടക്കും. പുലര്‍ച്ചെ 2ന് പഞ്ചവാദ്യം, നാലിന് ദ്വാദശി പണസമര്‍പ്പണം, 8ന് ദ്വാദശി ഊട്ട് എന്നിവയാണ് ചടങ്ങുകള്‍. ദശമി ദിവസമായ ഇന്ന് രാവിലെ 9.30ന് പഞ്ചരത്‌ന കീര്‍ത്തനാലാപനം നടക്കും. ഉച്ചതിരിഞ്ഞ് 3.30ന് തൃപ്രയാര്‍ രമേശന്‍ മാരാരുടെ പഞ്ചവാദ്യത്തിന്റെ അകമ്പടിയോടെ ശാസ്താവിനെ പുറത്തേക്ക് എഴുന്നള്ളിക്കും. തുടര്‍ന്ന് ആനച്ചമയ പ്രദര്‍ശനം, വൈകീട്ട് 5ന് നൃത്താഞ്ജലി, 7ന് സംഗീത സായാഹ്നം എന്നിവയുമുണ്ടാകും. രാത്രി 10 മണിക്ക് ദര്‍ശനപുണ്യം നല്‍കുന്ന ദശമി വിളക്ക് എഴുന്നള്ളിപ്പ്. ക്ഷേത്രത്തില്‍ ഏകാദശിയുടെ ഒരുക്കങ്ങള്‍ പൂര്‍ത്തിയായതായി ദേവസ്വം മാനേജര്‍ കെ.കെ.രാജന്‍ അറിയിച്ചു. വലപ്പാട് സിഐയുടെ നേതൃത്വത്തില്‍ വിപുലമായ പോലീസ് സംവിധാനവും ഏര്‍പ്പെടുത്തിയിട്ടുണ്ട്. ക്ഷേത്രപരിസരം വൈദ്യുത ദീപാലങ്കാരങ്ങളാല്‍ നിറഞ്ഞു. ഏകാദശിയുടെ പ്രധാന ഇനമായ കരിമ്പ് കച്ചവടക്കാരും ധാരാളം എത്തിയിട്ടുണ്ട്. ക്ഷേത്രത്തില്‍ ഏകാദശിക്ക് എത്തുന്നവര്‍ക്ക് ഗോതമ്പ് ചോറും കറികളും നല്‍കുന്നുണ്ട്.

പ്രതികരിക്കാന്‍ ഇവിടെ എഴുതുക:

ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. പ്രതികരണങ്ങളില്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. വായനക്കാരുടെ അഭിപ്രായങ്ങള്‍ ജന്മഭൂമിയുടേതല്ല.