58. ബ്രഹ്മാണ്ഡമണ്ഡലഗ്രാസാഃ – ബ്രഹ്മാണ്ഡ മണ്ഡലങ്ങളെ ഗ്രസിക്കുന്നവള്. സൃഷ്ടിക്കുകയും രക്ഷിക്കുകയും ചെയ്യുന്ന മൂകാംബിക ബ്രഹ്മാണ്ഡ മണ്ഡലങ്ങളെ ഗ്രസിക്കുകയും ചെയ്യുന്നു. ഈ സ്തോത്രത്തിലെ 11-ാം നാമം മഹാഗ്രാസാ എന്നായിരുന്നു. താന് സൃഷ്ടിച്ച ലോകങ്ങളെ തന്നില്ത്തന്നെ ലയിപ്പിക്കുന്ന പ്രക്രിയയാണു ഗ്രാസം. ഗ്രാസം എന്ന പദത്തിന് വിഴുങ്ങുക എന്നര്ത്ഥം. മഹാകാളിയായ മൂകാംബിക ബ്രഹ്മാണ്ഡങ്ങളെ വിഴുങ്ങുന്നു എന്നും പറയാം. ‘മഹാ കാളീ’ എന്ന പത്താം പദത്തിന്റെ വ്യാഖ്യാനം നോക്കുക.
59. കൃശമദ്ധ്യാഃ – ഒതുങ്ങിയ അരക്കെട്ടുള്ളവള്, സുന്ദരി. മെലിഞ്ഞ അരക്കെട്ട് സൗന്ദര്യലക്ഷണമെന്നത് കവിസങ്കേതം.
60. കൃശോദരീഃ – ഒതുങ്ങിയ വയറുള്ളവള്. അരക്കെട്ടുപോലെ വയറുകൃശമായിരിക്കുന്നതും സൗന്ദര്യലക്ഷണമെന്നത് കവി സങ്കേതം.
ബ്രഹ്മാണ്ഡ മണ്ഡലങ്ങളെ വിഴുങ്ങിയിട്ടും മൂകാംബിക കൃശമദ്ധ്യയും കൃശോദരിയുമായി വിരാജിക്കുന്നത് കൗതുകകരമായ വൈരുദ്ധ്യമായി തോന്നാം. വീര്ത്ത വയറും ചീര്ത്ത അരക്കെട്ടകെട്ടുമാണല്ലോ വേണ്ടത്.
61. ധരാഃ – ധരിക്കുന്നവള്. പ്രപഞ്ചത്തെ ധരിക്കുന്ന പരാശക്തി തന്നെയാണ് മൂകാംബിക എന്നപേരില് കൊല്ലൂരില് വിരാജിക്കുന്നത്.
ധരാ എന്ന പദത്തിന് ഭൂമി എന്ന അര്ത്ഥമാണു കൂടുതല് പ്രസിദ്ധം. ജീവികളെയും മറ്റു ജംഗമങ്ങളെയും സ്ഥാവരങ്ങളെയും ധരിക്കുന്നതിനാല് ഭൂമിക്കു ധരാ എന്നുപേര്. ഭൂമിയുടെ രൂപത്തില് നമ്മെയെല്ലാം ധരിക്കുന്നതു മൂകാംബിക തന്നെയാണല്ലോ.
62. ധരാധരാധാരാഃ – ധരാധാരങ്ങള്ക്ക് ആധാരമായവള്. ധരാധരം പര്വതം. മറ്റെല്ലാ സ്ഥാവരങ്ങളെയുംപോലെ പര്വതങ്ങളെയും ഭൂമിദേവിയായി രൂപം പൂണ്ട മൂകാംബിക ധരിക്കുന്നു.
63. ധരാധരാകുടുംബിനിഃ – ധരാധരന് ശിവന്. ശിവപത്നിയായ പാര്വതീദേവി ധരാധരാ കുടുംബിനി. ധരാധരപദത്തിന് വിഷ്ണു എന്നും അര്ത്ഥമുണ്ട്. വിഷ്ണുപത്നിയായ മഹാലക്ഷ്മി ദേവിയെയും ധരാധരാകുടുംബിനി എന്നുപറയാം. പരാശക്തിയായ മൂകാംബികാദേവിയുടെ രൂപങ്ങളാണ് പാര്വതീദേവിയും ലക്ഷ്മീദേവിയും
..തുടരും
പ്രതികരിക്കാൻ ഇവിടെ എഴുതുക: