പാലാ: ദക്ഷിണകാശി മേജര് ളാലം മഹാദേവക്ഷേത്രത്തില് ഉത്സവം 27ന് തുടങ്ങി 2015 ജനുവരി 5ന് ആറാട്ടോടെ സമാപിക്കും. ദേവപ്രശ്നപരിഹാര കര്മ്മങ്ങള് നടക്കുന്നതിനാല് ക്ഷേത്രനവീകരണ ജോലികള്ക്കും ദേവചൈതന്യവര്ദ്ധനവിനുമാണ് മുന്ഗണന. ആചാരാനുഷ്ഠാനങ്ങള്ക്കും ക്ഷേത്രകലകള്ക്കും പ്രാധാന്യം നല്കിയാണ് ഈ വര്ഷത്തെ ഉത്സവ പരിപാടികളെന്ന് ഭാരവാഹികള് പത്രസമ്മേളനത്തില് അറിയിച്ചു. ജനുവരി 3ന് ദേശക്കാഴ്ച, 4ന് തിരുവാതിര വഴിപാട്, പള്ളിവേട്ട, 5ന് ആറാട്ടെതിരേല്പ്പിന് ളാലം പാലം കവലയില് പാറമേക്കാവ് ശ്രീപത്മനാഭന് ഉള്പ്പെടെ 9 മുന്നിര ഗജവീരന്മാര് അണിനിരക്കുന്ന പ്രൗഢമായ എഴുന്നള്ളിപ്പ്. തൃശൂര് പാറമേക്കാവ് വിഭാഗം ഒരുക്കുന്ന കുടമാറ്റം ഈ വര്ഷത്തെ പ്രത്യേകതയാണ്. പെരുവനം കുട്ടന്മാരാരും 101 കലാകാരന്മാരും പാണ്ടിമേളത്തിലും ചോറ്റാനിക്കര വിജയന്മാരാരും സംഘവും പഞ്ചവാദ്യത്തിലും മേളവിസ്മയം തീര്ക്കും. ഉത്സവദിവസങ്ങളിലെ വിളക്ക് പതിവുപോലെ വിവിധ സര്ക്കാര് വകുപ്പുകളുടെ വകയായി നടക്കും.
27ന് രാത്രി 8ന് ക്ഷേത്രം തന്ത്രി മുണ്ടക്കൊടി ഇല്ലം വിഷ്ണു നമ്പൂതിരി മേല്ശാന്തി കളപ്പുരയ്ക്കല് ഇല്ലം പ്രദീപ് നമ്പൂതിരി എന്നിവരുടെ കാര്മ്മികത്വത്തില് കൊടിയേറ്റ് നടക്കും. തുടര്ന്ന് നാട്യാഞ്ജലി ഒരുക്കുന്ന നൃത്തരാവ്.
28 മുതല് ഉത്സവദിവസങ്ങളില് വിശേഷാല് ചടങ്ങുകള്, ആചാരപരമായ എഴുന്നള്ളിപ്പുകള്, ചുറ്റുവിളക്ക് എന്നിവ നടക്കും. 28ന് രാത്രി 7ന് നാമഘോഷലഹരി, 9ന് കൊടിക്കീഴില് വിളക്ക്. 29ന് രാത്രി 7ന് എടനാട് രാജന് നമ്പ്യാരുടെ ചാക്യാര്കൂത്ത്, 30ന് 7ന് പി.എന്.ശശികുമാറിന്റെ പുല്ലാങ്കുഴല് കച്ചേരി, 31ന് രാവിലെ 11ന് ഓട്ടന്തുള്ളല്, ഒരുമണിക്ക് ഉത്സവബലി ദര്ശനം രാത്രി 7ന് ഗുരുവായൂര് ദോവസ്വം കൃഷ്ണനാട്ടക്കളരി അവതരിപ്പിക്കുന്ന കൃഷ്ണനാട്ടം കഥ-കംസവധം. ജനുവരി ഒന്നിന് രാവിലെ 11ന് പറയന്തുള്ളല്, ഒരുമണിക്ക് ഉത്സവബലി ദര്ശനം രാത്രി 7ന് രാഗമാലിക അവതരിപ്പിക്കുന്ന ധ്വനിതരംഗം 2ന്, ഒരുമണിക്ക് ഉത്സവബലിദര്ശനം, വൈകിട്ട് എട്ടങ്ങാടി സമര്പ്പണം, രാത്രി 7ന് കലാനിലയം രാജനും സംഘവും അവതരിപ്പിക്കുന്ന ഇടയ്ക്ക തായമ്പക.
എട്ടാം ഉത്സവമായ ജനുവരി 3ന് ഉച്ചക്ക് ഒരുമണിക്ക് ഉത്സവബലി, വൈകിട്ട് 4.30ന് ദേശക്കാഴ്ച പുറപ്പാട്, ദേശാധിപത്യമായുള്ള വെള്ളാപ്പാട് ക്ഷേത്രത്തിലേയ്ക്കും അവിടെനിന്ന് മുരിക്കുംപുഴ ദേവീക്ഷേത്രത്തിലേയ്ക്കും എഴുന്നള്ളത്ത്. 7ന് പാലാ രാമപുരം കവലയില് എതിരേല്പ്പും ദീപക്കാഴ്ച, 10ന് വിളക്കെഴുന്നള്ളിപ്പ്. ജനുവരി 4ന് പള്ളിവേട്ട, രാവിലെ 8.30ന് ഒഴിവുശ്രീബലി, വൈകിട്ട് 5.30ന് കാഴ്ചശ്രീബലി, വേല-സേവ, വലിയകാണിക്ക, തുടര്ന്ന് തിരുവാതിര.
ജനുവരി 5ന് ആറാട്ട്. രാവിലെ 9.30ന് കൊടിയിറക്ക് ആറാട്ട് പുറപ്പാട്, 12ന് ചെത്തിമറ്റം തൃക്കയില് കടവില് ആറാട്ട്, ആറാട്ട് സദ്യ, 6.30ന് ളാലം പാലം കവലയില് പ്രൗഢമായ ആറാട്ടെതിരേല്പ്പ്, മേളം, കുടമാറ്റം. തിരുവരങ്ങില് രാവിലെ 11.30 മുതല് ജ്ഞാനപ്പാനകഥാമൃതം, നാമസങ്കീര്ത്തനലഹരി, സംഗീതസദസ്സ് എന്നിവ നടക്കും. മുനിസിപ്പല് ചെയര്മാന് കുര്യാക്കോസ് പടവന്റെ അദ്ധ്യക്ഷതയില് വിവിധ സര്ക്കാര് വകുപ്പുമേധാവികളും ഉത്സവാഘോഷ സമിതി ഭാരവാഹികളും ചേര്ന്ന് ഉത്സവാഘോഷ നടത്തിപ്പിനുള്ള ക്രമീകരണങ്ങള് പൂര്ത്തിയാക്കി.
പത്രസമ്മേളനത്തില് ക്ഷേത്രഭാരവാഹികളായ പി.എന്. പരമേശ്വരന്നായര്, അഡ്വ. രാജേഷ് പല്ലാട്ട്, ഉണ്ണി അശോക, രാജേഷ് ശ്രീഭദ്ര, റ്റി.എന്. രാജന് എന്നിവര് പങ്കെടുത്തു.
പ്രതികരിക്കാൻ ഇവിടെ എഴുതുക: