92. കസ്തൂരിതിലകാഞ്ചിതാഃ – കസ്തൂരി തിലകംകൊണ്ടു അലങ്കരിക്കപ്പെട്ടവള്. കസ്തൂരിയും മറ്റു സുഗന്ധിയായ പ്രസാധവസ്തുക്കളുംകൊണ്ട് അലങ്കരിക്കപ്പെട്ടവള്. ദേവിയുടെ സ്ഥൂലരൂപവര്ണനയില്പ്പെട്ട നാമം.
93. ഹര്ഷദാത്രീഃ – ഹര്ഷം തരുന്നവള്. സന്തുഷ്ടിയെ കുറിക്കുന്ന പദമാണു ഹര്ഷം. ഉള്ളില് ഉണരുന്ന ആനന്ദം ശരീരത്തില് മുഖപ്രസാദം, രോമാഞ്ചം, ഗദ്ഗദം തുടങ്ങിയ ഭാവങ്ങള് ഉളവാക്കും. ദേവിയെ ഏകാഗ്രതയോടെ ആരാധിക്കുന്ന ഭക്തന് ഹര്ഷത്തിന്റെ എല്ലാ ഭാവങ്ങളും അനുഭൂതമാകും. ധ്യാനം തീവ്രമാകുമ്പോള് ശരീരസ്ഥനായിരിക്കെത്തന്നെ ദേവീപാദങ്ങളില് മനസ്സു ലയിച്ചുചേരുന്ന ഭാവസമാധിയുടെ ആനന്ദം അനുഭവപ്പെടും. ഹര്ഷത്തിന്റെ വിവിധഭാവങ്ങള് ഭക്തര്ക്കു കൊടുക്കുന്നതിനാല് ഹര്ഷദാത്രി എന്നു ദേവിക്കു നാമം.
94. ഹകാരാര്ഥാഃ – ഹകാരത്തിന്റെ അര്ത്ഥം രൂപമായവള്. ശ്രീവിദ്യാമന്ത്രത്തിന്റെ ആറാമത്തെ അക്ഷരമായ ഹകാരത്തിന്റെ അര്ത്ഥമായി മൂകാംബികാദേവിയെ ഈ നാമം അവതരിപ്പിക്കുന്നു. ക ഏ ഈ ലഹ്രീം ഹസകഫലഹ്രീം സകലഹ്രീം എന്നാണ് മന്ത്രസ്വരൂപം. ഇതില് ആദ്യത്തെ അഞ്ചക്ഷരങ്ങള്ക്ക് വാഗഭവകൂടം എന്നും തുടര്ന്നുള്ള ആറക്ഷരങ്ങള്ക്ക് കാമരാജകൂടമെന്നും തുടര്ന്നുള്ള നാലക്ഷരങ്ങള്ക്ക് ശക്തികൂടമെന്നും പേര്.
പതിനഞ്ചക്ഷരമുള്ള ഈ മന്ത്രം മഹാദേവിയുടെ മന്ത്രശരീരം എന്നുപറയാറുണ്ട്. വാഗ്ഭവകൂടം മുഖവും കാമരാജകൂടം ഉടലും ശക്തികൂടം ഉടലിന്റെ കീഴ്ഭാഗവും. ഇവയില് കാമരാജകൂടത്തിന്റെ ആദ്യക്ഷരത്തിന്റെ അര്ത്ഥമായി നാമം മൂകാംബികാദേവിയെ അവതരിപ്പിക്കുന്നു. മന്ത്രാര്ത്ഥം വാക്കുകള്ക്ക് വഴങ്ങുന്നതല്ലാത്തതിനാല് കൂടുതല് വ്യക്തമാക്കാന് സാധ്യമല്ല. മന്ത്രരൂപത്തില് ദേവിയെ ധ്യാനിച്ചാല് അക്ഷരങ്ങളുടെ അര്ത്ഥം മനസ്സില് തെളിയും.
95. ഹര്യക്ഷവരവാഹനാഃ – ഹര്യക്ഷം- സിംഹം, ശ്രേഷ്ഠനായ സിംഹത്തെ വാഹനമാക്കിയവള്. പിംഗളവര്ണ്ണമായ കണ്ണുകളുള്ളതിനാല് സിംഹത്തിനു ഹര്യക്ഷഃ എന്നു പേര്. മഹിഷാസുരവധത്തിനായി സര്വദേവന്മാരുടെയും തേജസ്സുകള് എകീഭവിച്ച രൂപത്തില് മഹാദേവി അവതരിപ്പിച്ചപ്പോള് എല്ലാ ദേവന്മാരും ദേവിക്ക് ആഭരണങ്ങളും വസ്ത്രങ്ങളും ആയുധങ്ങളും മറ്റും ഉപഹാരമായി അര്പ്പിച്ചു. ഹിമവാന് കാഴ്ചവച്ച വിവിധ രത്നങ്ങള് തുടങ്ങിയവയോടൊപ്പം വാഹനമായി ഒരു സിംഹത്തെയും കൊടുത്തു. ആ സിംഹം മഹിഷാസുരന്റെ സൈന്യത്തിനു വളരെയേറെ നാശമുണ്ടാക്കിയെന്നു ദേവീ മാഹാത്മ്യം. സിംഹശ്രേഷ്ഠനെ വാഹനമാക്കിയവളായി ദേവിയെ നാമം അവതരിപ്പിക്കുന്നു.
….. തുടരും
പ്രതികരിക്കാൻ ഇവിടെ എഴുതുക: