നശ്വര വിഷയങ്ങളില് നിന്നുള്ള പിന്വാങ്ങല് ഈശ്വരദര്ശനത്തിനുള്ള അഭിനിവേശം, തീവ്രമായ സാന്മാര്ഗികവ്യഗ്രത, ഭൂതകാല ജീവിതത്തെ വ്യര്ത്ഥമാക്കിയതിനുള്ള ആഴമേറിയ പശ്ചാത്താപം ഇവയെല്ലാം പ്രബുദ്ധമായ ആദ്ധ്യാത്മികചോദനയില്നിന്ന് പ്രവേശിക്കുന്ന ശക്തിയുടെ വിവിധരീതിയിലുള്ള സൂചനകളാണ്.
ഒരിക്കലെങ്കിലും ഈശ്വര മഹത്വത്തിന്റെ ഒരു നേരീയ വീക്ഷണം നിങ്ങള്ക്ക് സിദ്ധിച്ചാല് അഥവാ ഭക്തിയുടെ പരമാനന്ദം ആസ്വദിച്ചാല് നിങ്ങള്ക്ക് പഴയമട്ടിലുള്ള ജീവിതം തുടരുവാനോ സംസാരബന്ധത്തില് കുടുങ്ങി കഴിയാനോ സാദ്ധ്യമല്ല.
ജീവാത്മാവ് ഈശ്വരനില്നിന്ന് ആവിര്ഭവിച്ചതാണ്. അത് ഈശ്വരനില്തന്നെ വിലയിക്കണം. ജീവന് ഈശ്വരനില് വിലയംകൊള്ളുന്നതുവരെ മനസിനു നിജമായ ശാന്തിയോ ശാശ്വതമായ സംതൃപ്തിയോ ലഭിക്കുകയില്ല. പ്രേമത്താല് പ്രേരിതമായ ചിന്തകളോടും ഉദ്ദീപ്തമായ ആത്മബോധത്താല് നയിക്കപ്പെടുന്ന കര്മ്മാചരണങ്ങളുംകൂടി ബോധപൂര്വ്വം ഈശ്വരനിലേക്കുള്ള ഈ തിരിച്ച് പോകല് തന്നെയാണ് ആദ്ധ്യാത്മികജീവിതം.
ഈശ്വരാഭിമുഖമായ ഈ പ്രയാണം പുരോഗമിക്കുമ്പോള് ആത്മീയശക്തി നിങ്ങളില് അനുക്രമം പ്രബുദ്ധമായി പ്രകാശിതമാകും. ഒടുവില് ഈശ്വരനുമായി ഇച്ഛയിലും പ്രജ്ഞയിലും ഐക്യം പ്രാപിക്കുകയാല് നിങ്ങള് ഈശ്വരശക്തിയുടെ പ്രകടനോപാധിയായി മാറും.ഈശ്വര പ്രേമത്തിന്റെയും അനുഗ്രഹത്തിന്റെയും ശാന്തിയുടെയും ജ്ഞാനത്തിന്റെയും മാദ്ധ്യമമായിതീരും.
ആത്മീയശക്തിയുടെ സഹായം കൊണ്ട് മാത്രമേ നിങ്ങള്ക്ക് പ്രലോഭനങ്ങളെ ചെറുത്തുനില്ക്കാനും മോഹങ്ങളെ ത്യജിക്കാനും ജീവിതത്തിലെ വെല്ലുവിളികളേയും ധര്മ്മസങ്കടങ്ങളേയും നേരിടാനും സാധിക്കൂ.
അഹങ്കാരവും ആദ്ധ്യാത്മികതയും ഒന്നിച്ച് നില്ക്കുക സാദ്ധ്യമല്ല. ശുദ്ധവും വിശ്വവിശാലവുമായ മനസ്സില് കോപമോ താപമോ പാപമോ ഉദിക്കുകയില്ല. മൂന്നും അഹന്താബദ്ധമായ മനസ്സിനെയാണ് പിഡിപ്പിക്കുന്നത്. ചിന്തയില് പാപവും വചനത്തില് കര്ക്കശവും കര്മ്മങ്ങളില് അധര്മ്മവും അനുഭവത്തില് ദുരിതവും കടന്നുകൂടാന് കാരണമാക്കുന്നത് അഹങ്കാരമാണ്.
പാപശക്തികളേയും വൈരുധ്യങ്ങളെയും പ്രതിരോധിക്കാന് പ്രപഞ്ചത്തില് അനവരതാം പ്രവര്ത്തിക്കുന്ന ആദ്ധ്യാത്മികശക്തിയുടെ ഏറ്റവും ശ്രേഷ്ഠമായ മൂന്നു പ്രകടിത രൂപങ്ങളാണ് സര്വ്വാത്മഭാവവും ശാശ്വത ശാന്തിയും വിശ്വപ്രേമവും.
ശ്രീ രമാദേവി
പ്രതികരിക്കാൻ ഇവിടെ എഴുതുക: