116. ശ്രീവിദ്യാമന്ത്രരൂപിണിഃ – ശ്രീവദ്യാ മന്ത്രം രൂപമായവള്. ശ്രീവിദ്യാമന്ത്രത്തെക്കുറിച്ച് മുന്പു പരാമര്ശിച്ചിരുന്നു. പഞ്ചദശാക്ഷരിയായ ശ്രീവിദ്യാമന്ത്രം, അതിനോട് ശ്രീം ചേര്ന്നുണ്ടാകുന്ന ഷോഡശീവിദ്യാമന്ത്രം എന്നിവയുടെ അക്ഷരഘടന മുന്പു വ്യക്തമാക്കിയിരുന്നു. ഷോഡശിയായ ശ്രീവിദ്യാമന്ത്രത്തെ സൗന്ദര്യലഹരിയുടെ 32-ാം ശ്ലോകത്തില് ശങ്കരാചാര്യസ്വാമികള് അവതരിപ്പിക്കുന്നു. അതിനോട് മൂന്നു മന്ത്രാക്ഷരങ്ങള് മുന്നില് ചേര്ന്ന ഒരു മഹാ ഷോഡശീമന്ത്രത്തെയും അദ്ദേഹം അവതരിപ്പിക്കുന്നു. രണ്ടു ശ്ലോകങ്ങളും ഉദ്ധരിക്കാം.
”ശിവഃ ശക്തിഃ കാമഃ ക്ഷിതിരഥ രവിഃ ശീതകിരണഃ
സ്മരോ ഹംസഃ ശക്രസ്തദനു ച പരാ മാരഹരയഃ
അമീ ഹൃല്ലേഖാഭിസ്തിസൃഭിരവസാനേഷു ഘടിതാ
ഭജന്തേ വര്ണ്ണാസ്തേ തവ ജനനി നാമാവയവതാം”
(അല്ലയോ അമ്മേ, ക ഏ ഈ ല എന്നീ അക്ഷരങ്ങളും തുടര്ന്ന് ഹസകഹലഎന്നീ അക്ഷരങ്ങളും പിന്നീട് സകല എന്നീ അക്ഷരങ്ങളും മൂന്നു ഖണ്ഡങ്ങളായി ഓരോ ഖണ്ഡത്തിന്റെയും ഒടുവില് ഹ്രീംകാരം ചേര്ന്ന് പതിനഞ്ചക്ഷരങ്ങളുള്ള നിന്തുരുവടിയുടെ മന്ത്രശരീരത്തിന്റെ അവയവങ്ങളായി ഭവിക്കുന്നു. സൗന്ദര്യലഹരി ശ്ലോകം 32.)
സ്മരം യോനീം ലക്ഷ്മീം ത്രിതയമിദമാദൗ തവ മനോര്
നിധായൈകേ നിത്യേ നിരവധി മഹാഭോഗ രസികാ
ഭജന്തി ത്വാം ചിന്താമണി ഗുണനിബദ്ധാക്ഷവലയാഃ
ശിവഗ്നൗ ജുഹ്വന്തഃ സുരഭിഘൃതധാരാഹുതി ശതൈഃ”
(നിത്യയായ അല്ലയോ ദേവി നിന്തുരുവടിയുടെ മന്ത്രത്തിന്റെ തുടക്കത്തില് ഐം ഹ്രീം ശ്രീം എന്നീ മൂന്നു മന്ത്രാക്ഷരങ്ങളെയും ചേര്ത്തിട്ട് ചിന്താമണി രത്നസമൂഹത്താല് നിര്മ്മിക്കപ്പെട്ട അക്ഷമാല ധരിച്ച് ശിവാഗ്നിയില് കാമധേനുവിന്റെ നെയ്യുകൊണ്ടുള്ള ആഹൂതിധാരകളാല് തര്പ്പണം ചെയ്യുന്നവരായി അളവില്ലാത്ത മഹാഭോഗങ്ങളില് രസിക്കുന്ന ചില മഹാന്മാര് നിന്തിരുവടിയെ ഭജിക്കുന്നു. സൗന്ദര്യലഹരി. ശ്ലോകം 33) . ഈ രണ്ടു ശ്ലോകങ്ങളുമായി പരിചയമില്ലാത്ത വായനക്കാര് മന്ത്രാക്ഷരങ്ങള് ശ്ലോകത്തില് കാണുന്നില്ലല്ലോ എന്നു സംശയിക്കാം. അവരോട് സൗന്ദര്യ ലഹരീവ്യാഖ്യാനം വായിക്കാന് അപേക്ഷിക്കുന്നു.
ശ്രീവിദ്യാമന്ത്രത്തിനു രണ്ടു രൂപങ്ങളുണ്ട്. പതിനഞ്ചക്ഷരങ്ങളുള്ള ശ്രീവിദ്യാമന്ത്രത്തിന്റെ ആദ്യത്തെ അക്ഷരം ‘ക’ ആയുള്ള രൂപം കാദിവിദ്യ. നാം മുമ്പുകണ്ട മന്ത്രം കാദിവിദ്യയാണ്. ആദ്യത്തെ അക്ഷരം ‘ഹ’ ആയിട്ടുള്ളത് ഹാദിവിദ്യ. ഇത് അഗസ്ത്യമഹര്ഷിയുടെ പത്നിയായ ലോപാമുദ്രോ ദേവി സ്വീകരിച്ച മാറ്റമായതുകൊണ്ട് ലോപാമുദ്രാവിദ്യ എന്നും ഇതിനു പേരുണ്ട്. ഹാദിവിദ്യയുടെ രൂപം ‘ഹസകലഹ്രീം ഹസകഹലഹ്രീം സകലഹ്രീം എന്നാണ്. ആദ്യത്തെ മൂന്നക്ഷരങ്ങള്ക്കാണു വ്യത്യാസം. പതിനാറക്ഷരങ്ങളുള്ള ഷോഡശീമന്ത്രത്തിനു മുമ്പും പിമ്പും ഇടയ്ക്കും മറ്റു മന്ത്രാക്ഷരങ്ങള് ചേര്ത്ത് ഷോഡശിയെ മഹാഷോഡശിയാക്കിയ പല മന്ത്രങ്ങളുണ്ട്. സൗന്ദര്യലഹരിയുടെ മാതാവ് എന്നു വിശേഷിപ്പിക്കപ്പെടുന്ന ശക്തിമ ഹിമ്നസ്തോത്രത്തില് ദുര്വാസാവു മഹര്ഷി ശ്രീവിദ്യാമന്ത്രത്തിന്റെ ഷോഡശീരൂപത്തോടു പല മന്ത്രാക്ഷരങ്ങള് പലതരത്തില് ചേര്ന്നുണ്ടാകുന്ന രൂപങ്ങള് ചര്ച്ചചെയ്യുന്നുണ്ട്. നമുക്കിവിടെ ഉറപ്പായി സ്വീകരിക്കേണ്ട കാര്യം ശ്രീവിദ്യാമന്ത്രം മൂകാംബികാദേവിയുടെ രൂപമാണ് എന്നതാണ്. ഈ നാമത്തിന് ഇത്രയും വിശദമായ ചര്ച്ച ആവശ്യമായിത്തീര്ന്നത് ശങ്കരാചാര്യസ്വാമികളെയും മൂകാംബികാദേവിയെയും സൗന്ദര്യലഹരിയുടെ രചനയെയും തമ്മില് ബന്ധിപ്പിക്കുന്ന ഒരു ഐതിഹ്യമാണ്. ആ ഐതിഹ്യം തുടര്ന്നുളള ചില നാമങ്ങളുടെ ചര്ച്ചയില് വരുന്നുണ്ട്. വാഗ്ദവകൂടം കാമരാജകൂടം ശക്തികൂടം എന്നിവ ചേര്ന്ന പഞ്ചദശാക്ഷരീമന്ത്രം ദേവിയുടെ മന്ത്രശരീരം. അതിനോടു ചേര്ന്ന മന്ത്രാക്ഷരങ്ങള് ആ ശരീരത്തിന്റെ അലങ്കാരങ്ങള്.
…തുടരും
പ്രതികരിക്കാൻ ഇവിടെ എഴുതുക: