മാര്സിലിങ് (സിങ്കപ്പൂര്): ഭാരതീയ പൈതൃക വിജ്ഞാനവും കലാ സാംസ്കാരിക മൂല്യങ്ങളും, പുതു തലമുറയിലെ കുഞ്ഞുങ്ങള്ക്കും കുടുംബങ്ങള്ക്കും പകര്ന്നു നല്കുകയെന്ന ലക്ഷ്യത്തോടെ നടന്ന ‘സമീക്ഷ’ കലാ സംസ്കൃതി സംഗമം സിങ്കപ്പൂരിലെ പ്രവാസി മലയാളികള്ക്ക് വേറിട്ട അനുഭവമായി.
വിവേകാനന്ദ സേവാ സംഘത്തിന്റെ ആഭിമുഖ്യത്തില് മാര്സിലിങ് ശ്രീ ശിവകൃഷ്ണ ക്ഷേത്രവേദിയില് നടന്ന ‘സമീക്ഷ’ കലാ സംസ്കൃതി സംഗമത്തിന്റെ ഉദ്ഘാടനം സിങ്കപ്പൂര് ശ്രീ രാമകൃഷ്ണ ആശ്രമം വൈസ് പ്രസിഡണ്ട് സ്വാമി സമചിത്താനന്ദ നിര്വഹിച്ചു. അതിപുരാതനവും നിത്യ നൂതനവുമായ ഭാരതത്തിന്റെ വിജ്ഞാന സമ്പത്ത് മാതൃഭാഷയില് പഠിപ്പിക്കുകയും പുതുതലമുറക്ക് പകര്ന്നുകൊടുക്കുകയും ചെയ്യുക എന്നുള്ളത് കാലഘട്ടത്തിന്റെ ആവശ്യമാണെന്ന് അദ്ദേഹം പറഞ്ഞു.
തുടര്ന്ന് നടന്ന വിവിധ കലാ സാംസ്കാരിക പരിപാടികളില് അന്പതോളം കുട്ടികള് പങ്കെടുത്തു. ശാസ്ത്രീയ സംഗീതം, ഗീതാ ശ്ലോക പാരായണ മത്സരം, ചിത്ര രചനാ മത്സരം എന്നിവയ്ക്ക് സമീക്ഷ വേദിയൊരുക്കി. അമൃത അവതരിപ്പിച്ച സംഗീത കച്ചേരിയും ഗാലക്സി ടീം അവതരിപ്പിച്ച ചെണ്ടമേളവും പരിപാടിക്ക് മാറ്റുകൂട്ടി.
ഭാരതത്തിലെ പുണ്യസ്ഥലങ്ങളെയും മഹാന്മാരെയും പരിചയപെടുത്തിയ ‘ഭാരതത്തെ അറിയുക’ എന്ന ഗെയിം പ്രോഗ്രാം പുതുമയായി. പ്രവാസി മലയാളികള്ക്ക് സൗഹൃദ സംഗമങ്ങളിലൂടെയും കുട്ടികള്ക്കായുള്ള വിനോദവും വിജ്ഞാനവും അടങ്ങിയ പഠന ക്ലാസ്സുകളിലൂടെയും ധാര്മ്മിക വ്യക്തിത്വ വികാസത്തിനായുള്ള വേദിയൊരുക്കുവാന് വിവേകാനന്ദ സേവാ സംഘം സദാ സന്നദ്ധരായിരിക്കുമെന്നും അതിനുള്ള നിസ്വാര്ത്ഥ പ്രവര്ത്തനങ്ങള് തുടങ്ങിക്കഴിഞ്ഞതായും സംഘാടകര് അറിയിച്ചു.
സാമുഹിക പ്രതിബദ്ധതയും ധാര്മ്മിക മൂല്യങ്ങളും ജീവിതത്തില് പകര്ത്തുവാനും മാനവ സേവ ജീവിതത്തിന്റെ ഭാഗമാക്കുവനും ‘സംസ്കാര്, സേവ, സമന്വയ്’ എന്നീ മൂല്യങ്ങള്ക്ക് പ്രാമുഖ്യം നല്കി സിങ്കപ്പൂരില് പ്രവര്ത്തനം ആരംഭിച്ച വിവേകാനന്ദ സേവാ സംഘം നിരവധി സമൂഹ സേവാ പ്രവര്ത്തനങ്ങള് നടത്തിവരുന്നു. തുടര്ച്ചയായി സംഘടിപ്പിച്ചുവരുന്ന രക്തദാനം, ആഴ്ചതോറും നടത്തിവരുന്ന സൗജന്ന്യ യോഗ ക്ലാസുകള്, വ്യക്തിത്വ വികസന ക്ലാസുകള്, കലാ കായിക മത്സരങ്ങള്, എന്നിവ ഇതിന്റെ ഭാഗമാണ്.
പ്രതികരിക്കാൻ ഇവിടെ എഴുതുക: