203. കൗമാരീഃ – കുമാരന്റെ, സുബ്രഹ്മണ്യന്റെ ശക്തിയായി രൂപം പൂണ്ടവള്. സുബ്രഹ്മണ്യന്റെ ശക്തിയായ കൗമാരി ദേവിയും യുദ്ധത്തില് പങ്കെടുക്കാനെത്തി. കൗമാരി ദേവിയെ ദേവീ മാഹാത്മ്യം അവതരിപ്പിക്കുന്നത്.
”കൗമാരീ ശക്തിഹസ്താ ച മയൂരവരവാഹനാ
യേദ്ധുമപ്യായയൗ ദൈത്യാനംബികാ ഗുഹരൂപിണീ”
(ആയുധമായ വേല് കൈയിലെടുത്ത് ശ്രേഷ്ഠമായ മയൂരവാഹനത്തില് ആരൂഢയായി ഗുഹരൂപിണിയായ കൗമാരീദേവി അസുരന്മാരോടു യുദ്ധത്തിനെത്തി. ദേവീമാഹാത്മ്യം 8-16) എന്നാണ്.
204. ശക്തിയുക്താഃ – ശക്തിയോടുകൂടിയവള്. കുമാരന്റെ ആയുധം ശക്തിയാണ്. വേല് എന്ന ആയുധമാണ് ശക്തി. ശക്തിക്ക് ബലം എന്നും പ്രവര്ത്തനശേഷി എന്നും അര്ത്ഥമുണ്ട്. കൗമാരിദേവിയുടെ കാര്യത്തില് ഈ അര്ത്ഥവും യോജിക്കും. ദേവിയുടെ ആയുധമായ വേല് ദേവിയുടെ ശക്തിയുടെ പ്രതീകമാണെന്നും പറയാം.”ദൈത്യാന് ജഘാന കൗമാരീ തഥാ ശക്ത്യാതികോപനാ” (അതികോപനയായ കൗമാരീദേവി വേലുകൊണ്ടു ദൈത്യന്മാരെ നിഗ്രഹിച്ചു) എന്നു ദേവീമാഹാത്മ്യം കൗമാരീദേവിയുടെ ശക്തിെയക്കുറിച്ചു പറയുന്നു.
205. മയൂരവരവാഹനാഃ – ശ്രേഷ്ഠമായ മയൂരത്തെ വാഹനമാക്കിയവള്. കുമാരന്റെ വാഹനം മയിലാണെന്നതു പ്രസിദ്ധം.
206. ശിവദൂതീഃ – ശിവനെ ദൂതനാക്കിയവള്. മഹാദേവിയുടെ ശരീരത്തില്നിന്നുണ്ടായ അതിഭയങ്കരിയും അത്യുഗ്രയുമായ ചണ്ഡികാദേവി ജടാധാരിയായ ശ്രീപരമേശ്വരനെ ദൂതനായി സുംഭനിസുംഭന്മാരുടെ അടുക്കലേയ്ക്കയച്ചു. ”നിങ്ങള് ജീവിച്ചിരിക്കാന് ആഗ്രഹിക്കുന്നുവെങ്കില് പാതാളത്തിലേയ്ക്കു പോകുക. ഇന്ദ്രന് ത്രൈലോക്യാധിപതിയും ദേവന്മാര് ഹവിര്ഭുക്കുകളും ആകട്ടെ. ബലമുണ്ട് എന്ന അഹങ്കാരത്താല് യുദ്ധം ചെയ്യാനാണ് ആഗ്രഹമെങ്കില് വരുക. എന്റെ കുറുക്കന്മാര് നിങ്ങളുടെ മാംസം ഭക്ഷിച്ചു തൃപ്തരാകട്ടെ” എന്ന് സുംഭനെ അറിയിക്കുകയായിരുന്നു ഭഗവാന്റെ ദൗത്യം. ശിവനെ ഭൂതനാക്കിയതിനാല് ദേവിക്കു ശിവഭൂതി എന്നു പേരുണ്ടായി.
207. ശിവാരാദ്ധ്യാഃ – ശിവനാല് ആരാധിക്കപ്പെട്ടവള്. ശിവന് ദേവിയെ ആരാധിച്ചു പ്രസാദിപ്പിച്ച് സര്വ്വേശ്വരപദവിയും അര്ദ്ധനാരീശ്വരത്വവും നേടി എന്നു ബ്രഹ്മാണ്ഡപുരാണം.
”ശിവോളപിയാം സമാരാധ്യ ധ്യാനയോഗബലനേ ച
ഈശ്വരസ്സര്വസിദ്ധീനാമര്ധനാരീശ്വരോളഭവത്”
ശിവന് ദേവിയുടെ ഭൂതനായി സുംഭന്റെ അടുക്കലേയ്ക്കുപോയത് ദേവിയുടെ ആരാധകനായതുകൊണ്ടാണെന്നും പറയാം.
ശിവനും ശിവയും പരസ്പരം തപസ്സുചെയ്ത് പരസ്പരം നേടി. ലോകത്തിനു മാതൃകയായ ദാമ്പത്യവും അര്ദ്ധനാരീശ്വരത്വവും സമ്പാദിച്ചു.
208. ശിവാശതനിനിദിനീഃ – അനുഗമിക്കുന്ന നൂറുകണക്കിനു കുറുക്കന്മാരുടെ ശബ്ദത്തോടുകൂടിയവള്. യുദ്ധത്തിനു ചണ്ഡികാദേവി പുറപ്പെട്ടപ്പോള് മാംസം ധാരാളം കിട്ടുമെന്ന മോഹത്താല് പെണ്കുറുക്കന്മാര് ദേവിയെ അനുഗമിച്ചു എന്നു സങ്കല്പം.
…. തുടരും
പ്രതികരിക്കാൻ ഇവിടെ എഴുതുക: