കാലടി: ആദിശങ്കര ഇന്സ്റ്റിറ്റ്യൂട്ട് ഓഫ് എഞ്ചിനീയറിങ് ആന്റ് ടെക്നോളജിയിലെ ആറാം സെമസ്റ്റര് ഇലക്ട്രിക്കല് ആന്റ് ഇലക്ട്രോണിക്സ് വിദ്യാര്ത്ഥികളുടെ സാമൂഹ്യ സേവന പരിപാടി ‘വിദ്യുത് 2015’ലൂടെ അയ്യമ്പുഴയില് വെളിച്ചമെത്തി.
അസി. കളക്ടര് മൃണ്മയി ജോഷി പരിപാടി ഉദ്ഘാടനം നിര്വ്വഹിച്ചു. അയ്യമ്പുഴ പഞ്ചായത്തിലെ ദാരിദ്ര്യരേഖയ്ക്കുതാഴെ മുപ്പതോളം കുടുംബങ്ങള്ക്കാണ് വിദ്യാര്ത്ഥികള് വൈദ്യുതി എത്തിച്ചത്.
2013ലും 2014ലും കോളേജിലെ സീനിയര് വിദ്യാര്ത്ഥികള് നടത്തിയ വൈദ്യുതീകരണ പ്രവര്ത്തനങ്ങളുടെ തുടര്ച്ചയായാണ് ‘വിദ്യുത് 2015’ സംഘടിപ്പിച്ചിട്ടുള്ളത്. കോളേജ് സെമിനാര് ഹാളില് നടന്ന ഉദ്ഘാടന സമ്മേളനത്തില് ശങ്കര ട്രസ്റ്റ് മാനേജിങ് ട്രസ്റ്റി കെ. ആനന്ദ് അധ്യക്ഷത വഹിച്ചു. ആദിശങ്കര ട്രസ്റ്റ് സിഇഒ പി. എസ്. രാമചന്ദ്രന്, കെഎസ്ഇബി അസിസ്റ്റന്റ് ചീഫ് എഞ്ചിനീയര് നാരായണസ്വാമി, കോളേജ് ഡയറക്ടര് ഡോ. എസ്. ജി. അയ്യര് എന്നിവര് പ്രസംഗിച്ചു. വിദ്യുത് 2015 നെപ്പറ്റി വിദ്യാര്ത്ഥി പ്രതിനിധി നിധിന് നാരായണന് വിശദീകരിച്ചു.
ഇലക്ട്രിക്കല് വിഭാഗം മേധാവി കൃഷ്ണകുമാരി ടി. സ്വാഗതവും വിദ്യാര്ത്ഥി പ്രതിനിധി എന്. ശ്രീനാഥ് കൃതജ്ഞതയും പ്രകടിപ്പിച്ചു. വിദ്യുത് പ്രൊജക്ടിന്റെ ഗുണഭോക്താക്കളായ അയ്യമ്പുഴ പഞ്ചായത്ത് നിവാസികളും യോഗത്തില് സംബന്ധിച്ചു.
പ്രതികരിക്കാൻ ഇവിടെ എഴുതുക: