229 . മഹാവിദ്യാ – മഹതിയായ വിദ്യയായി വര്ത്തിക്കുന്നവള്. ”വിഭന്തി അനയാ ഇതി വിദ്യാ” (ഇതിനാല് അറിവു ലഭിക്കുന്നു. അതിനാല് വിദ്യ) എന്ന് വിദ്യ എന്ന പദത്തെ നിര്വചിക്കാം. മഹാ എന്ന വിശേഷണം ശ്രേഷ്ഠതയെ കുറിക്കുന്നു. രണ്ടുംചേര്ന്ന മഹാവിദ്യാ എന്ന പദം എല്ലാ ആപത്തുകളെയും ഒഴിവാക്കുന്നവളും ജ്ഞാനമായി വിളങ്ങുന്നവളും എന്ന ആശയം വ്യക്തമാക്കുന്നു. ദേവിയെ ഉപാസിക്കുന്ന രീതികളെ മൊത്തത്തില് മഹാവിദ്യ എന്നു പറയാറുണ്ട്. ഉപാസനകള് ദേവിതന്നെയാണ് എന്നര്ത്ഥം.
വിദ്യകള് പലതുണ്ടെങ്കിലും ആത്മജ്ഞാനമാണ് ഏറ്റവും മഹത്തായ വിദ്യ. ശ്രീവിദ്യ എന്നു പ്രസിദ്ധമായ പഞ്ചദശാക്ഷരീമന്ത്രമാണു മഹാവിദ്യ എന്നും അഭിപ്രായമുണ്ട്.
230 . മഹാമായാ – മഹത്തായ മായ സ്വരൂപമായവള്. നാം അറിയുന്ന പ്രപഞ്ചവും അതിന്റെ പ്രവര്ത്തനവും മൂകാംബികാദേവിയുടെ മായ മാത്രമാണ്. അനാദിയായ പരാശക്തി മാത്രമാണ് സനാതനമായ ഉണ്മ. ഈ സത്യം അറിയാവുന്ന ത്രിമൂര്ത്തികളും മഹാന്മാരായ ഋഷിമാരും കൂടി മായയ്ക്കു വഴങ്ങിപ്പോകുന്നു.
”ജ്ഞാനിനാമപി ചേതാംസി ദേവീ ഭഗവതീ ഹി സാ
ബലാദാകൃഷ്യ മോഹായ മഹാമായാ പ്രയച്ഛതി
തയാ വിസൃജ്യതേ വിശ്വം ത്രൈലോക്യം സചരാചരം
സൈഷാ പ്രസന്നാ വരദാ നൃണാം ഭവതി മുക്തയേ
സാ വിദ്യാ പരമാ മുക്തേര് ഹേതുഭൂതാ സനാതനീ
സംസാരബന്ധഹേതുശ്ച സൈവ സര്വേശ്വരേശ്വരീ”
(മഹാമായയായ ആ ഭഗവതീ ദേവി ജ്ഞാനികളുടെ മനസ്സുകളെപ്പോലും ബലമായി ആകര്ഷിച്ച് മോഹിപ്പിക്കുന്നു. മൂന്നു ലോകങ്ങളും അവയിലുള്ള ചരാചരങ്ങളും ആ മായയാല് സൃഷ്ടിക്കപ്പെടുന്നു. ബന്ധഹേതുവായ ആ മായ തന്നെ പ്രസന്നയായാല് മനുഷ്യര്ക്കു മുക്തി നല്കുന്ന വരദയായും ഭവിക്കുന്നു. വിദ്യാരൂപിണിയും സനാതനിയും മുക്തിക്കു ഹേതുഭൂതയുമായ ആ ദേവി തന്നെ സര്വ ഈശ്വരന്മാര്ക്കും ഈശ്വരിയും സംസാരബന്ധത്തിനു ഹേതുവും ആയി ഭവിക്കുന്നു. ദേവീമാഹാത്മ്യം 1-43, 44, 45)
ഗര്ഭസ്ഥശിശുവിനു ജ്ഞാനമുണ്ടെന്നും ഗര്ഭത്തില്നിന്നു പുറത്തുവരുന്നതോടെ ജ്ഞാനത്തെ മായ ആവരണം ചെയ്യുമെന്നും കാളികാപുരാണം മായാവലയത്തില് അകപ്പെടുന്നതോടുകൂടി ആഹാരം തുടങ്ങി പലതിലും മോഹവും മമതയും ഉണ്ടാകുന്നു. ക്രമേണ മോഹത്തിലും മമതയിലും നിന്ന് ക്രോധവും ലോഭവും ബന്ധപ്പെട്ട വികാരങ്ങളും ഉണ്ടാകുന്നു. വളരുമ്പോള് കാമവും ആവേശിക്കുന്നു. ആഗ്രഹങ്ങള് വര്ദ്ധിക്കുന്നു. ആഗ്രഹസാദ്ധ്യത്തിനുള്ള ആലോചനയില് മുഴുകുന്നു. സന്തോഷവും വ്യസനവും അനുഭവിക്കുന്നതായി കരുതുന്നു. ഇതെല്ലാം മഹാമായാപ്രവര്ത്തനമാണ്.
മായയ്ക്ക് കാരുണ്യം എന്നും അര്ത്ഥം. മഹത്തായ കാരുണ്യംകൊണ്ടാണ് പരാശക്തി മൂകാംബികാക്ഷേത്രത്തില് ഇളകൊണ്ട് നമ്മെ അനുഗ്രഹിക്കുന്നത് എന്നും വ്യാഖ്യാനിക്കാം.
…. തുടരും
പ്രതികരിക്കാൻ ഇവിടെ എഴുതുക: