ജ്ഞേയരൂപാ ജ്ഞാനദാത്രീ കോലാപുരനിവാസിനീ
കാളകണ്ഠീ ബ്രഹ്മപൂജ്യാ വൈഷ്ണവീ സ്കന്ദമാതൃകാ
265. ജ്ഞേയരൂപാ: – അറിയപ്പെടേണ്ട രൂപങ്ങളുള്ളവര്. ദേവിയുടെ രൂപം എന്തെന്നറിയാനാണ് വേദങ്ങളും ഉപനിഷത്തുകളും പുരാണേതിഹാസകര്ത്താക്കളും ശ്രമിക്കുന്നത്. കാണുന്നതും കേള്ക്കുന്നതും സ്പര്ശിക്കുന്നതും രുചിച്ചും ധ്യാനിച്ചും അറിയുന്നതെല്ലാം ദേവിയുടെ രൂപങ്ങളാണ്. അതിവിശാലമായ പ്രപഞ്ചത്തിന്റെ അത്യല്പമായ ബിന്ദുവിലുള്ള ദേവീരൂപം ഉള്ക്കൊള്ളാന്പോലും നമുക്കു കഴിയില്ല. ദേവിയുടെ വിഭൂതികളുടെയും ആചരിതങ്ങളുടെയും അല്പാംശം കണ്ടും കേട്ടും അറിഞ്ഞിട്ടുള്ള ഋഷിമാര് അവരറിഞ്ഞ ദേവീരൂപം അവര്ക്കാവുംവിധം അവതരിപ്പിച്ചിട്ടുണ്ട്. അവരുടെ അറിവ് അല്പമാത്രം. അറിഞ്ഞതിന്റെ ചില അംശങ്ങളേ കൃതികളില് പ്രതിഫലിക്കൂ. അതിന്റെ അല്പാംശമേ നമുക്കു മനസ്സിലാകൂ.
266. ജ്ഞാനദാത്രീ: – ജ്ഞാനം തരുന്നവള്. ഏതു വിഷയത്തെക്കുറിച്ചുള്ള അറിവും ജ്ഞാനമാണ്. എല്ലാ ജ്ഞാനവും നമുക്കു തരുന്നത് സരസ്വതിയും ലക്ഷ്മിയും ദുര്ഗ്ഗയും ചേര്ന്ന ഏകരൂപയായ മൂകാംബികയുടെ കാരുണ്യമാണ്. ഏതു വിഷയത്തെക്കുറിച്ചുള്ള അറിവും ജ്ഞാനമാണെങ്കിലും സ്തോത്രത്തില് മുമ്പും പിമ്പുമുള്ള നാമങ്ങളുമായി ചേര്ത്തു വ്യാഖ്യാനിക്കുമ്പോള് കൈവല്യസിദ്ധിക്കുള്ള അറിവു തരുന്നവള് എന്ന വ്യാഖ്യാമാണു മെച്ചം.
”ജ്ഞാനം ബന്ധഃ” എന്ന് ശിവസൂത്രം ജ്ഞാനത്തെ നിര്വചിക്കുന്നു. ഈ നിര്വചനപ്രകാരം ജ്ഞാനം ബന്ധമാണ്. ബന്ധം തരുന്നവള് എന്ന് നാമത്തെ വ്യാഖ്യാനിക്കാം. കുടുംബ ബന്ധങ്ങളും സാമൂഹിക ബന്ധങ്ങളും തൊട്ട് തത്ത്വങ്ങളും ശാസ്ത്രങ്ങളും ദേവന്മാരും ദേവിയും വരെയുള്ളവയോടുള്ള ബന്ധങ്ങളില്പ്പെടുത്തി മനുഷ്യരെ പ്രവര്ത്തിപ്പിക്കുന്നതു ദേവിയാണ്.
267. കോലാപുരിനിവാസിനീ: – കോലാപുരത്തു വസിക്കുന്നവള്. മൂകാംബികാക്ഷേത്രം സ്ഥിതിചെയ്യുന്ന പുണ്യഭൂമിയുടെ മറ്റൊരുപേരാണു കോലാപുരി. ഇപ്പോള് കൊല്ലൂര് എന്ന് അറിയപ്പെടുന്നു. കോലമഹര്ഷി തപസ്സുചെയ്ത പ്രദേശമായതുകൊണ്ട് കോലാപുരം എന്നു പേരുണ്ടായി എന്ന് ഐതിഹ്യം. അവിടെ വിരാജിക്കുന്ന പരാശക്തി.
മഹാരാഷ്ട്രയിലുള്ള പ്രസിദ്ധമായ മഹാലക്ഷ്മീക്ഷേത്രം സ്ഥിതിചെയ്യുന്ന ശക്തിപീഠത്തിനും കോലാപുരം എന്നുപേരുണ്ട്. ആ ക്ഷേത്രത്തില് മഹാലക്ഷ്മീരൂപത്തില് വസിക്കുന്നവള് എന്നും വ്യാഖ്യാനിക്കാം. മൂകാംബികാ സഹസ്രനാമത്തില്പ്പെട്ട നാമമായതുകൊണ്ട് ആദ്യം പറഞ്ഞ അര്ത്ഥമാണു ചേരുന്നത്.
268. കാളകണ്ഠീ: – കാളകണ്ഠന് ശിവന്. ശിവനില്നിന്ന് അഭിന്നയാകയാല് ദേവിക്കു കാളകണ്ഠി എന്നുപേര്.
269. ബ്രഹ്മപൂജ്യാ: – ബ്രഹ്മദേവനാല് പൂജിക്കപ്പെടുന്നവള്. താന് സൃഷ്ടിച്ച പ്രപഞ്ചത്തിന്റെ സുസ്ഥിതിക്ക് ഏതെങ്കിലും തരത്തില് ഭംഗമുണ്ടാകുമ്പോള് ബ്രഹ്മദേവന് ദേവിയെ അഭയംപ്രാപിക്കുന്ന പല ഘട്ടങ്ങള് പുരാണങ്ങളിലുണ്ട്. ഉദാ: ദേവീമാഹാത്മ്യം
270. വൈഷ്ണവീ: – വിഷ്ണുവിന്റെ ശക്തി. വിഷ്ണുവിന്റെ ആയുധങ്ങളും വാഹനവുമായി വൈഷ്ണവി സുംഭാസുരനുമായുള്ള യുദ്ധത്തില് പങ്കെടുത്തതായി ദേവീമാഹാത്മ്യം 8-17. വിഷ്ണുമായ എന്നും മഹാമായ എന്നും പ്രസിദ്ധമായ മഹാശക്തിയാണു വൈഷ്ണവി. മൂകാംബികാ ക്ഷേത്രത്തില് കുടികൊള്ളുന്നത് വൈഷ്ണവിയാണെന്നാണ് വിഷ്ണുഭക്തന്മാരുടെ വിശ്വാസം.
271. സ്കന്ദമാതൃക: – സ്കന്ദന്റെ അമ്മയായ മഹേശ്വരി. സ്കന്ദന് സുബ്രഹ്മണ്യന്.
…. തുടരും
പ്രതികരിക്കാൻ ഇവിടെ എഴുതുക: