ഭക്തിപൂര്വ്വവും ശിശുസഹജവുമായ സരളതയോടുകൂടിയ സമീപനം വഴിയോ ഗാഢമായ ധ്യാനം വഴിയോ ആദിശക്തിയുമായി സമ്പര്ക്കം പുലര്ത്തുമ്പോള് ആ ശക്തി നിങ്ങളില് സ്വയം പ്രകാശിതമാകും. നിങ്ങളുടെ ശരണാഗതിയുടേയും മനഃശുദ്ധിയുടെയും ധ്യാനശക്തിയുടെയും പരിണാമത്തിനനുസരണമായി നിങ്ങളില് പ്രകടമാവുന്ന ശക്തിയുടെ അളവും പ്രവൃദ്ധമായിരിക്കും.
ആദിശക്തിയോട് ഗാഢമായി സമീപിക്കുന്തോറും പ്രകൃതിയുടെ വശ്യവലയത്തില്നിന്നും, മനസ്സിനെ കലുഷിതമാക്കുന്ന വികാര പ്രഭാവങ്ങളില് നിന്നും സ്വാഭാവികമായിത്തന്നെ നിങ്ങള് അകന്നുതുടങ്ങും. വ്യക്തിപരമായ കഴിവുകള്ക്ക് അതീതമായ ഒരു മഹല്ശക്തി നിങ്ങളെ സുശക്തമാക്കും. നിങ്ങള്ക്ക് അഭയം നല്കും. നിങ്ങളെ സംരക്ഷിക്കും.
ഒരിക്കലെങ്കിലും ഇൗശ്വരമഹത്വത്തിന്റെ ഒരു നേരിയ വീക്ഷണം നിങ്ങള്ക്ക് സിദ്ധിച്ചാല് അഥവാ ഭക്തിയുടെ പരമാനന്ദം ആസ്വാദിച്ചാല് നിങ്ങള്ക്ക് പഴയ രീതിയിലുള്ള ജീവിതം തുടരാനോ സംസാരത്തില് കുടുങ്ങികഴിയാനോ ഒരു നിമിഷംപോലും സാദ്ധ്യമല്ല.
ജീവാത്മാവ് ഈശ്വരനില്നിന്ന് ആവിര്ഭവിച്ചതാണ്. അത് ഈശ്വരനില്തന്നെ വിലയിക്കണം. ജീവന് ഈശ്വരനില് വിലയം കൊള്ളുന്നതുവരെ മനസ്സിന് നിജമായ ശാന്തിയോ ശാശ്വതമായ സംതൃപ്തിയോ ലഭിക്കുകയില്ല.
പ്രേമത്താല് പ്രേരിതമായ ചിന്തകളോടും ഉദ്ദീപ്തമായ ആത്മബോധത്താല് നയിക്കപ്പെടുന്ന കര്മ്മാചരണങ്ങളോടുംകൂടി ബോധപൂര്വം ഈശ്വരനിലേക്കുള്ള ഈ തിരിച്ചുപോകല് തന്നെയാണു ആദ്ധ്യാത്മിക ജീവിതം.
ആത്മീയശക്തിയുടെ സഹായംകൊണ്ട് മാത്രമേ നിങ്ങള്ക്ക് പ്രലോഭനങ്ങളെ ചെറുക്കാനും മോഹങ്ങളെ ത്യജിക്കാനും പാപചിന്തകള്ക്കുള്ള പ്രവണതയേയും പരുഷഭാഷണത്തേയും അധാര്മ്മികകര്മ്മങ്ങളെയും നിയന്ത്രിക്കാനും സ്നേഹവിദേ്വഷങ്ങളാകുന്ന ദ്വന്ദങ്ങളുടെ സമ്മര്ദ്ദത്തില്നിന്ന് മനസ്സിനെ സംരക്ഷിക്കാനും ജീവിതത്തിലെ ഏത് വെല്ലുവിളികളേയും ധര്മ്മസങ്കടങ്ങളേയും നേരിടാനും ഏത് പരീക്ഷണഘട്ടങ്ങളില്പോലും സത്യധര്മ്മങ്ങളില് ഉറച്ചുനില്ക്കാനും സാധിക്കുകയുള്ളൂ.
ശ്രീ രമാദേവി
പ്രതികരിക്കാൻ ഇവിടെ എഴുതുക: