പനാജി: പന്ത്രണ്ടാമത് ദേശീയ യൂത്ത് അത്ലറ്റിക് ചാമ്പ്യന്ഷിപ്പില് കേരളത്തിന് ഓവറോള് കിരീടം. അവസാന ദിവസത്തെ പ്രകടനത്തിന്റെ കരുത്തിലാണ് കേരളം കിരീടം ചൂടിയത്. കേരളത്തിന് 156 പോയിന്റ് സ്വന്തമായപ്പോള് രണ്ടാം സ്ഥാനത്തെത്തിയ ഹരിയാന 122.5 പോയിന്റാണ് നേടിയത്.
112 പോയിന്റ് നേടിയ ഉത്തര്പ്രദേശാണ് മൂന്നാമത്. ഇന്നലെ 4 സ്വര്ണ്ണവും രണ്ട് വെള്ളിയും ഒരുവെങ്കലവും നേടിയാണ് കേരളം ഓവറോള് കിരീടമണിഞ്ഞത്.പെണ്കുട്ടികളുടെ വിഭാഗത്തില് കേരളം ചാമ്പ്യന്മാരായപ്പോള് ആണ്കുട്ടികളുടെ വിഭാഗത്തില് കേരളം നാലാം സ്ഥാനത്തേക്ക് പിന്തള്ളപ്പെട്ടു. പെണ്കുട്ടികളുടെ വിഭാഗത്തില് 106 പോയിന്റാണ് കേരളം നേടിയത്. 52 പോയിന്റ് നേടിയ തമിഴ്നാട് രണ്ടാം സ്ഥാനത്തും 44 പോയിന്റുമായി ഉത്തര്പ്രദേശ് മൂന്നാം സ്ഥാനവും സ്വന്തമാക്കി.
ആണ്കുട്ടികളുടെ വിഭാഗത്തില് 103.5 പോയിന്റ് നേടിയ ഹരിയാനയാണ് ജേതാക്കള്. 68 പോയിന്റുമായി ഉത്തര്പ്രദേശ് രണ്ടാമതും 52.5 പോയിന്റുമായി ദല്ഹി മൂന്നാം സ്ഥാനവും സ്വന്തമാക്കിയപ്പോള് നാലാം സ്ഥാനത്തെത്തിയ കേരളത്തിന് ലഭിച്ചത് 44 പോയിന്റാണ്. മീറ്റിലെ മികച്ച താരങ്ങളായി പെണ്കുട്ടികളുടെ വിഭാഗത്തില് മഹാരാഷ്ട്രയുടെ രശ്മി ഷെരാഘറും ആണ്കുട്ടികളുടെ വിഭാഗത്തില് ഹരിയാനയുടെ ആശിഷ് ഝക്കറും തെരഞ്ഞെടുക്കപ്പെട്ടു.
മീറ്റിന്റെ അവസാന ദിനമായ ഇന്നലെ മൂന്ന് പുതിയ റെക്കോര്ഡുകള് കൂടി പിറവിയെടുത്തു. പെണ്കുട്ടികളുടെ 400 മീറ്റര് ഹര്ഡില്സില് കേരളത്തിന്റെ പി.ഒ. സയന, ആണ്കുട്ടികളുടെ ജാവലിന് ത്രോയില് ദല്ഹിയുടെ അഭിഷേക് ദ്രാല്, ട്രിപ്പിള്ജമ്പില് രാജസ്ഥാന്റെ സോനു കുമാര് എന്നിവരാണ് ഇന്നലെ റെക്കോര്ഡ് സ്വന്തമാക്കിയത്. ഇതോടെ മൂന്ന് ദിവസമായി നടന്ന മീറ്റില് മൂന്ന് പുതിയ ദേശീയ റെക്കോര്ഡുകളടക്കം 13 റെക്കോര്ഡുകളാണ് പിറന്നത്.
400 മീറ്ററില് റെക്കോര്ഡോടെ സ്വര്ണ്ണമണിഞ്ഞ സയന 11 വര്ഷം പഴക്കമുള്ള റെക്കോര്ഡാണ് മറികടന്നത്. 2004-ല് കേരളത്തിന്റെ തന്നെ ഗീത റോബി സ്ഥാപിച്ച ഒരു മിനിറ്റ് 03.47 സെക്കന്റിന്റെ റെക്കോര്ഡാണ് 1 മിനിറ്റ് 02.58 സെക്കന്റില് ഫിനിഷ് ചെയ്ത് സയന തിരുത്തിയത്. വെള്ളി നേടിയ പശ്ചിമ ബംഗാളിന്റെ ടിയാഷ സമാദ്ദാറും നിലവിലെ റെക്കോര്ഡ് മറികടന്നു.
കഴിഞ്ഞ ദിവസം 400 മീറ്ററില് സ്വര്ണ്ണം നേടിയ കേരളത്തിന്റെ ജിസ്ന മാത്യു ഇന്നലെ 200 മീറ്ററിലും പൊന്നണിഞ്ഞ് ഡബിള് തികച്ചു. പെണ്കുട്ടികളുടെ ട്രിപ്പിള്ജമ്പില് 12.34 മീറ്റര് ചാടി രുഗ്മ ഉദയനും 800 മീറ്ററില് സി. ബബിതയും പൊന്നണിഞ്ഞു. 800 മീറ്ററില് അബിത മേരി മാനുവലിലൂടെ വെള്ളിയും കേരളത്തിനാണ്.
ആണ്കുട്ടികളുടെ 400 മീറ്റര് ഹര്ഡില്സില് കേരളത്തിന്റെ റഷിദ്. എ വെള്ളിയും മുഹമ്മദ് അനസ്. കെ വെങ്കലവും സ്വന്തമാക്കി.
പ്രതികരിക്കാൻ ഇവിടെ എഴുതുക: