പാലക്കാട്: മുപ്പതുവര്ഷത്തിലധികമായി മലമ്പുഴ ഉദ്യാനപരിസരത്ത് വ്യാപാരം നടത്തിവരുന്നവര്ക്ക് ലൈസന്സ് അനുവദിച്ച് തൊഴില് സംരക്ഷണം നല്കണമെന്ന് വഴിയോരകച്ചവട മസ്ദൂര്സംഘം(ബിഎംഎസ്) ജില്ലാ കമ്മറ്റി യോഗം ആവശ്യപ്പെട്ടു.
മലമ്പുഴ നവീകരണപ്രവര്ത്തനങ്ങളുടെ ഭാഗമായി രൂപീകരിച്ച രാഷ്ട്രീയപാര്ട്ടികള് ഉള്പ്പെട്ട കോര്കമ്മറ്റി അഴിമതി സംഘമായിരിക്കുകയാണ്. പുനരധിവാസത്തിന്റെപേരില് തികച്ചും അനര്ഹര്ക്കാണ് ലൈസന്സും സ്റ്റാളുകളും നല്കുന്നത്.
വിനോദ സഞ്ചാരസീസണ് അല്ലാത്ത സമയത്ത് മറ്റുതൊഴിലുകള്ക്ക് പോകുന്നവര് സീസണായാല് രാഷ്ട്രീയക്കാരുടെ പിന്തുണയോടെ അനധികൃത കച്ചവടം നടത്തി കുഴപ്പമുണ്ടാക്കുന്നു. റോഡുകയ്യേറിയുള്ള കച്ചവടം ഗതാഗത തടസ്സം ഉണ്ടാക്കുന്നു.
യഥാര്ത്ഥകച്ചവടക്കാര്ക്ക് ലൈസന്സ് അനുവദിക്കുക, അനധികൃതകച്ചവടക്കാരെ ഒഴിപ്പിക്കുക, അഴിമതി നടത്തുന്ന കോര്കമ്മറ്റി പിരിച്ചുവിടുക തുടങ്ങിയ ആവശ്യങ്ങള് ഉന്നയിച്ച് പ്രക്ഷോഭം നടത്താന് യോഗം തീരുമാനിച്ചു.
സംഘം ജില്ലാ പ്രസിഡന്റ് വേലു അധ്യക്ഷതവഹിച്ച യോഗത്തില് ബിഎംഎസ് ജില്ലാ വൈസ്പ്രസിഡന്റ് കെ.ആര്.രാജന്, യൂണിയന് വൈസ് പ്രസിഡന്റ് കെ. എം.ഗംഗാധരന്, കൃഷ്ണദാസ്, കെ.വി.രാധാകൃഷ്ണന്. സി.മണികണ്ഠന് എന്നിവര് സംസാരിച്ചു.
പ്രതികരിക്കാൻ ഇവിടെ എഴുതുക: