കൊല്ലം: പ്രധാനമന്ത്രി ഗ്രാം സഡക് യോജനയില് ഉള്പ്പെടുത്തി കൊല്ലം പാര്ലമെന്റ് മണ്ഡലത്തിലെ ആറ് റോഡുകള്ക്ക് അംഗീകാരമായി. ചീഫ്സെക്രട്ടറി അദ്ധ്യക്ഷനായ സംസ്ഥാനതല സ്റ്റിയറിംഗ് കമ്മറ്റിയാണ് അംഗീകാരം നല്കിയത്.
പുല്ലപണ-കന്നിക്കുഴി റോഡ്, ചണ്ണപ്പേട്ട മൂര്ത്തിക്കാവ്-കൊടിയന്നൂര് ആനക്കുളം റോഡ്, ചന്തമുക്ക്-പാരാന്തി കാവുച്ചിറ റോഡ്, നെടുമ്പാറ-കുറവന്താവളം-മാമ്പഴത്തറ റോഡ്, മുരക്കുമണ്-കമ്പനിമല ഇടത്തറജംഗ്ഷന് റോഡ്, കിണറുമുക്ക്- ദേവി സ്കൂള് റോഡ് എന്നിവയ്ക്കാണ് അംഗീകാരം ലഭിച്ചതെന്ന് എന്.കെ. പ്രേമചന്ദ്രന് എംപി അറിയിച്ചു.
വിശദമായ പ്രോജക്ട് റിപ്പോര്ട്ട് തയ്യാറാക്കുന്നതിന്റെ ഭാഗമായി ഉദ്യോഗസ്ഥരും ഗ്രാമപഞ്ചായത്ത് തലത്തിലുള്ള ജനപ്രതിനിധികളും സംയുക്തമായി തെരഞ്ഞെടുക്കപ്പെട്ട റോഡുകളുടെ തുടക്കം മുതല് അവസാനം വരെ നടന്ന് പരിശോധന നടത്തും. റോഡിന്റെ വികസനവുമായി ബന്ധപ്പെട്ട് ഗ്രാമസഭകളില് ചര്ച്ച നടത്തും.
റോഡുപണി ശാസ്ത്രീയമായും സമയബന്ധിതമായും പൂര്ത്തിയാക്കുന്നതിന് പ്രോജക്ട് റിപ്പോര്ട്ട് തയ്യാറാക്കുന്ന ഘട്ടത്തില് ജനപങ്കാളിത്തം ഉറപ്പുവരുത്തുന്നതിനാണിത്. അംഗീകാരം ലഭിച്ച റോഡുകള്ക്ക് നാഷണല് റൂറല് ഡെവലപ്മെന്റ് ബോര്ഡ് ഏജന്സിയുടെയും കേന്ദ്ര ഗ്രാമവികസന മന്ത്രാലയത്തിന്റെയും അനുമതിക്ക് വിധേയമായി തുടര്നടപടി സ്വീകരിക്കുന്നതിനുവേണ്ടിയാണ് റിപ്പോര്ട്ട് തയ്യാറാക്കുന്നത്.
പ്രതികരിക്കാൻ ഇവിടെ എഴുതുക: