വ്യക്തിപരമായ മോക്ഷം മാത്രമാണു നിങ്ങളുടെ ലക്ഷ്യമെങ്കില് അതിലേക്കാവശ്യമായ ശിക്ഷണം നല്കുന്നതിന് സന്യാസാശ്രമം നിലവിലുണ്ട്. എന്നാല് ഗാര്ഹസ്ഥ്യത്തിലാകട്ടെ നിങ്ങള്ക്ക് കൂടുതല് ഉല്കൃഷ്ടവും മഹത്തുമായ ആദര്ശമാണുള്ളത്. സാമൂഹ്യമായ ക്ഷേമാനേ്വഷണവും കൂട്ടായ പുരോഗതിയും കുടുംബത്തിന്റെ സമുദ്ധാരണവുമാണത്. മാത്രമല്ല ഭവനത്തെ ശാന്തിയുടെയും തപശ്ചര്യയുടെയും വേദിയാക്കി മാറ്റുന്നതോടെ സാമൂഹ്യ സംവിധാനത്തിന്റെ കെട്ടുറപ്പിനും യോഗക്ഷേമത്തിനും ഈടുറ്റ സംഭാവനയാണ് നല്കുന്നത്. ഇതൊരു മഹത്തായ കാര്യമല്ലേ. സമാധാനപൂര്ണമായ ഗൃഹങ്ങള് ഒരു മാതൃകാ സമൂഹത്തിന്റെ വാതായനങ്ങള് തന്നെയാണ്. ഉല്കൃഷ്ടമായ ഒരു തലമുറയുടെ ഉദയത്തിന്റെ മുന്നോടിയുമാണ്.
നിഷ്കളങ്ക ഹൃദയത്തിനു മാത്രമേ ഈശ്വര സാക്ഷാല്കാരം നേടാന് കഴിയൂ. ഈ ആന്തരികവിശുദ്ധി ഒരു മനുഷ്യന്റെ വ്യക്തിത്വത്തിലൊക്കെത്തന്നെ പ്രകടമാവുന്നു.
അപ്രകാരമുള്ള ഒരു വ്യക്തിയില് സത്യസന്ധത, ആര്ജ്ജവം, ന്യായദീക്ഷ, നിഷ്പക്ഷത, സമഭാവന തുടങ്ങിയ സത്ഗുണങ്ങള് ഉണ്ടായിരിക്കും. ഇവ ഒരു ക്രിയാത്മക സംസ്കാരത്തെ ദേ്യാതിപ്പിക്കുന്ന ശാശ്വത മൂല്യങ്ങളാണ് മഹത്തായ ഈ മൂല്യങ്ങള് ഇല്ലാത്തവര്ക്ക് ഉപദേശിക്കാനോ നിര്ദ്ദേശിക്കാനോ അഭ്യസിപ്പിക്കാനോ തിരുത്തുവാനോ ഒന്നും അവകാശമുണ്ടായിരിക്കയില്ല.
നിങ്ങള് തികച്ചും സ്വാര്ത്ഥരഹിതരാണെങ്കില് ഏറ്റവും ശ്രേഷ്ഠമായ ഉദ്ദേശങ്ങളാല് പ്രചോദിതരാണെങ്കില് നിങ്ങളുടെ ഹൃദയം വിശുദ്ധ പ്രേമത്തിന്റെ സംഭരണി ഉള്ക്കൊള്ളുന്നുണ്ടെങ്കില്, നിങ്ങളില് നിന്നും പുറപ്പെടുന്ന ഓരോ വാക്കും ആദരാന്വിതം സമൂഹം ശ്രദ്ധിക്കും. ഒരു ജീവാത്മാവിന്റെ ആത്മാര്ത്ഥത നിങ്ങളുടെ വാക്കുകളില് പ്രതിധ്വനിക്കും. തീര്ച്ച.
മനുഷ്യത്വത്തിന്റെ ഏറ്റവും മാതൃകാപരമായ മഹല്ഗുണങ്ങള് വളര്ത്താനുള്ള സമര്ത്ഥമായ രംഗവേദി പാവനമായ ഗാര്ഹസ്ഥ്യമാണ്. പക്ഷേ തീവ്രമായ ഈശ്വരതൃഷ്ണയില് പ്രേരിതമായ പ്രാര്ത്ഥനയും വിശുദ്ധമായ ജീവിതത്തോടുള്ള പ്രേമത്താല് പരിസേവിതമായ നിരന്തര പ്രയത്നവും നിങ്ങള്ക്കുണ്ടായിരിക്കണം.
മനോ നിയന്ത്രണത്തിന്റെയും ധ്യാനത്തിന്റെയും സങ്കീര്ണതകളെ പുരസ്കരിച്ച് ദിവ്യമാതാവ് ഇങ്ങിനെ തുടര്ന്നു:-
മനസ്സിനെ മനസ്സുകൊണ്ടുതന്നെ ജയിക്കണം. ആത്മാവ് ഒരു കര്മ്മത്തിലും ഇടപെടുന്നില്ല. അത് നിസ്സംഗമായ സാക്ഷി ചൈതന്യമാണ്.
പ്രതികരിക്കാൻ ഇവിടെ എഴുതുക: