വാഷിങ്ടണ്: പുതിയ വിവരങ്ങള് സ്വീകരിക്കാനും ഓര്മ്മയില് സൂക്ഷിക്കാനും ആവശ്യത്തിനു വിനിയോഗിക്കാനും നിത്യവും 20 മിനിട്ട് യോഗപരിശീലനം സഹായകമാണെന്ന് അന്താരാഷ്ട്ര ശാസ്ത്രീയ പഠനം. പ്രവൃത്തിയിലെ കൃത്യത, സൂക്ഷ്മത, വേഗത, ആത്മനിയന്ത്രണം തുടങ്ങിയ രംഗത്തും യോഗ ഏറെ സഹായകമാണെന്ന് പഠനം പറയുന്നു. ഹഠയോഗത്തെക്കുറിച്ചുള്ള പഠനമാണ് ഈ കണ്ടെത്തലുകളിലെത്തിച്ചിരിക്കുന്നത്.
ഇത്രയും സമയം എയ്റോബിക് എക്സര്സൈസ് ചെയ്തവരിലും ഹഠയോഗ പരിശീലനം നടത്തിയവരിലും ഏറെനാള് നടത്തിയ പഠനഗവേഷണത്തിന്റെ ശാസ്ത്രീയാടിസ്ഥാനത്തിലുള്ള പഠന റിപ്പോര്ട്ടാണിത്. മുപ്പതുപേരിലാണ് ദീര്ഘനാളത്തെ പഠനം നടത്തിയത്. ”യോഗ കായിക പരിശീലനവും ചില വ്യായാമ മുറകളും മാത്രമല്ല, അത് ശ്വസനത്തെയും മനസ്സിനെയും നിയന്ത്രിക്കുന്ന വിദ്യകൂടിയാണ്,”പഠനത്തിന് നേതൃത്വം നല്കിയ അമേരിക്കയിലെ അര്ബാനാ കാമ്പൈനിലുള്ള യൂണിവേഴ്സിറ്റി ഓഫ് ഇല്ലിനോയിസിലെ ഗവേഷക നേഹാ ഗോഥെ പറയുന്നു.
പ്രയോഗ പരീക്ഷണത്തിന് ഒരു വിഭാഗത്തെ ആധുനിക എക്സര്സൈകള്ക്കു വിധേയമാക്കുകയും മറ്റൊരു വിഭാഗത്തെ അത്രതന്നെ സമയം യോഗപരിശീലനത്തിനു നിയോഗിച്ചുമാണ് പരീക്ഷണം നടത്തിയത്. ഇത് പലതവണ മാറിമാറി ആവര്ത്തിച്ചു. യോഗപേശികളെയും ഞരമ്പുകളെയും സംഘര്ഷമുക്തമാക്കുകയും ഹൃദയത്തിന്റെ സ്പന്ദനനിരക്ക് സാധാരണയില്നിന്ന് 60-70 ശതമാനം വര്ദ്ധിപ്പിക്കുകയും ചെയ്യുന്നുവെന്നും കണ്ടെത്തി. യോഗ പരിശീലിച്ചവരിലെ വ്യത്യാസം തനിക്കൊപ്പമുണ്ടായിരുന്ന മുഴുവന് ഗവേഷകരും ഈ കണ്ടെത്തലില് അത്ഭുതപ്പെട്ടതായി ഗോഥെ പറയുന്നു. ഫിസിക്കല് ആക്ടിവിറ്റി ആന്ഡ് ഹെല്ത്ത് ജേണലില് തന്റെ ഗവേഷണ ഫലം പ്രസിദ്ധീകരിച്ചിട്ടുണ്ടെന്നും അവര് പറഞ്ഞു.
പ്രതികരിക്കാൻ ഇവിടെ എഴുതുക: