ന്യൂദല്ഹി: ഭാരതവും ശ്രീലങ്കയും തമ്മില് റോഡ് മാര്ഗം ബന്ധിപ്പിക്കാന് 22,000 കോടി രൂപയുടെ പദ്ധതി കേന്ദ്രഗതാഗത മന്ത്രാലയം തയ്യാറാക്കി. പാക് കടലിടുക്കില് 22 കിലോമീറ്റര് ദൂരത്തിലാണ് പദ്ധതി നടപ്പാവുന്നത്. കടലിനടിയിലൂടെയും മുകളിലൂടെയുമായാണ് പദ്ധതി പൂര്ത്തിയാക്കുക.
അയല്രാജ്യങ്ങളായ ബംഗ്ലാദേശ്, ഭൂട്ടാന്, നേപ്പാള് എന്നിവയ്ക്ക് പിന്നാലെ ശ്രീലങ്കയിലേക്കും റോഡ്മാര്ഗ്ഗം ബന്ധം സ്ഥാപിക്കാനാണ് കേന്ദ്രസര്ക്കാര് ലക്ഷ്യമിടുന്നത്.
ഈ വര്ഷം അവസാനത്തോടെ മ്യാന്മറിലേക്കും തായ്ലന്റിലേക്കും റോഡ് ബന്ധം സ്ഥാപിക്കപ്പെടും. ഏഷ്യന് ഡവലപ്മെന്റ് ബാങ്കിന്റെ സാമ്പത്തിക സഹായത്തോടെയാണ് ഭാരത-ശ്രീലങ്ക റോഡ് പദ്ധതി നടപ്പാക്കുക. കേന്ദ്രഗതാഗതമന്ത്രി നിതിന് ഗഡ്ക്കരിയും ഏഷ്യന് ഡവലപ്മെന്റ് ബാങ്ക് വൈസ് പ്രസിഡന്റും തമ്മില് പദ്ധതി സംബന്ധിച്ച ചര്ച്ചകള് നടത്തി. വായ്പ നല്കാമെന്ന ധാരണയുടെ അടിസ്ഥാനത്തിലാണ് ഭാരത-ശ്രീലങ്ക റോഡ് നിര്മ്മാണവുമായി കേന്ദ്രസര്ക്കാര് മുന്നോട്ടുപോകുന്നത്.
രാമേശ്വരത്തുനിന്നും ശ്രീലങ്കയിലെ മാന്നാറിലേക്ക് നീളുന്ന റോഡ് നിര്മ്മാണം പൂര്ത്തിയാകുന്നതോടെ ഏഷ്യന് രാജ്യങ്ങളിലെ റോഡ് ബന്ധം ശ്രീലങ്കയിലേക്ക് നീളുമെന്ന് നിതിന് ഗഡ്ക്കരി പറഞ്ഞു. ഹൈവേ ഉപകരണങ്ങളെക്കുറിച്ചുള്ള രണ്ടു ദിവസത്തെ ദേശീയ സമ്മേളനം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ബംഗ്ലാദേശ്, ഭൂട്ടാന്, നേപ്പാള് എന്നീ രാജ്യങ്ങളുമായി ബന്ധപ്പെട്ടുള്ള റോഡു നിര്മ്മാണം രണ്ടുവര്ഷത്തിനകം പൂര്ത്തീകരിക്കുമെന്ന് ഗഡ്ക്കരി പറഞ്ഞു.
എട്ടു ബില്യണ് ഡോളര് ചെലവിട്ടാണ് റോഡ്നിര്മ്മാണം. പൊതു-സ്വകാര്യ പങ്കാളിത്തത്തോടെയുള്ള നിരവധി റോഡ് നിര്മ്മാണ പദ്ധതികള് രാജ്യത്ത് ആരംഭിച്ചിട്ടുണ്ട്. 2013-14ല് കേവലം രണ്ട് പിപിപി മാതൃകയിലുള്ള പദ്ധതികള്ക്ക് കരാറായപ്പോള് കഴിഞ്ഞ മൂന്നു മാസത്തിനുള്ളില് മാത്രം 9 വലിയ പദ്ധതികള്ക്ക് അനുമതി നല്കിയതായും 17 പിപിപി പദ്ധതികള് നിലവില് നടക്കുന്നതായും ഗഡ്ക്കരി പറഞ്ഞു.
രാജ്യത്ത് ദേശീയ പാതകളുടെ നിര്മ്മാണം അടിയന്തിര ആവശ്യമായാണ് മന്ത്രാലയം കാണുന്നതെന്നും റോഡ് അടിസ്ഥാന സൗകര്യങ്ങളുടെ ഗുണനിലവാരം മെച്ചപ്പെടുത്താനും നിര്മ്മാണച്ചെലവ് കുറക്കാനും പുതിയസാങ്കേതിക വിദ്യകളും ഉപകരണങ്ങളും വികസിപ്പിക്കാനാവശ്യമായ നടപടികളെടുക്കുമെന്നും അദ്ദേഹം പറഞ്ഞു. ഇതര ഗതാഗത മാര്ഗ്ഗങ്ങളെ അപേക്ഷിച്ച് ചെലവ് അഞ്ചിലൊന്നായി ചുരുക്കിക്കൊണ്ടു വരാന് ഉപരിതല ജല ഗതാഗത മാര്ഗ്ഗങ്ങള് വികസിപ്പിക്കുമെന്നും കേന്ദ്രമന്ത്രി കൂട്ടിച്ചേര്ത്തു.
പ്രതികരിക്കാൻ ഇവിടെ എഴുതുക: