മിര്പൂര്: ദക്ഷിണാഫ്രിക്കന് പേസര് ഡെയ്ല് സ്റ്റെയ്നും 400 വിക്കറ്റ് ക്ലബ്ബില്. ബംഗ്ലാദേശിനെതിരായ രണ്ടാം ക്രിക്കറ്റ് ടെസ്റ്റിന്റെ ആദ്യ ദിനം ഓപ്പണര് തമീം ഇഖ്ബാലിനെ മൂന്നാം സ്ലിപ്പില് നായകന് ഹാഷിം അംലയുടെ കൈയിലെത്തിച്ചാണ് സ്റ്റെയ്ന് 400 വിക്കറ്റ് ക്ലബ്ബിലെ പതിമൂന്നാമനായത്. 80ാം ടെസ്റ്റില് താരത്തിന്റെ നേട്ടം. 400 വിക്കറ്റ് തികയ്ക്കുന്ന രണ്ടാമത്തെ ദക്ഷിണാഫ്രിക്കക്കാരനാണ് സ്റ്റെയ്ന്. മുന് നായകന് ഷോണ് പൊള്ളോക്ക് 421 വിക്കറ്റുമായി മുന്നില്.
വേഗത്തില് 400 വിക്കറ്റ് തികയ്ക്കുന്ന രണ്ടാമത്തെ താരമെന്ന ബഹുമതി ന്യൂസിലന്ഡ് ഇതിഹാസം റിച്ചാര്ഡ് ഹാഡ്ലിക്കൊപ്പം പങ്കിടാനും സ്റ്റെയ്നായി. ഹാഡ്ലിയും 80ാം ടെസ്റ്റിലാണ് ഈ നേട്ടം കൈക്കലാക്കിയത്. കുറവു പന്തില് ഈ നാഴികക്കല്ല് പിന്നിടുന്ന താരമെന്ന ബഹുമതി സ്റ്റെയ്ന്. 16,634 പന്തിലാണ് സ്റ്റെയ്ന് നാനൂറാം ഇരയെ കണ്ടെത്തിയത്. രണ്ടാമതുള്ള ഹാഡ്ലിയാകട്ടെ 3,600 പന്തുകള് കൂടുതലെറിഞ്ഞു. 72 ടെസ്റ്റില് 400ലെത്തിയ ശ്രീലങ്കന് സ്പിന് ഇതിഹാസം മുത്തയ്യ മുരളീധരനാണ് കുറവ് ടെസ്റ്റില് നേട്ടം കൈവരിച്ചത്.
അഞ്ചു തവണ പത്തു വിക്കറ്റ് നേട്ടവും 25 തവണ അഞ്ചു വിക്കറ്റും, 24 തവണ നാലു വിക്കറ്റു നേട്ടവും സ്വന്തമാക്കിയ സ്റ്റെയ്ന്റെ മികച്ച പ്രകടനം 51 റണ്സിന് ഏഴു വിക്കറ്റ്. 2010ല് ഇന്ത്യയ്ക്കെതിരേ നാഗപ്പൂരില്. 104 ഏകദിനങ്ങളില് 162 വിക്കറ്റും അക്കൗണ്ടില്. മൂന്നു തവണ അഞ്ചു വിക്കറ്റും, നാലു തവണ നാലു വിക്കറ്റ് നേട്ടവും കൈവരിച്ചിട്ടുള്ള താരത്തിന്റെ മികച്ച പ്രകടനം 39 റണ്സിന് ആറു വിക്കറ്റ്. പ്രകടനം 2013ല് പോര്ട്ട് എലിസബത്തില് പാക്കിസ്ഥാനെതിരേ. 38 ട്വന്റി20 മത്സരങ്ങളില്നിന്ന് 55 വിക്കറ്റും ഇദ്ദേഹം സ്വന്തമാക്കി.
പ്രതികരിക്കാൻ ഇവിടെ എഴുതുക: