തിരുവനന്തപുരം: പി.സി. ജോര്ജ്ജിനെ കൂറുമാറ്റനിരോധന നിയമപ്രകാരം അയോഗ്യനാക്കണമെന്ന ചീഫ് വിപ്പ് തോമസ് ഉണ്ണിയാടന്റെ പരാതി നിലനില്ക്കുമെന്നു സ്പീക്കറുടെ തീര്പ്പ്. ഉണ്ണിയാടന്റെ പരാതി നിലനില്ക്കില്ലെന്നുകാട്ടി ജോര്ജ്ജ് നല്കിയ പ്രാഥമിക തടസ്സഹര്ജി സ്പീക്കര് എന്. ശക്തന് തള്ളി. ഇതിനെതിരെ ജോര്ജ്ജിന് എന്തെങ്കിലും അഭിപ്രായം അറിയിക്കാനുണ്ടെങ്കില് 23നു വൈകിട്ടു നാലുമണിക്കു മുന്പ് അറിയിക്കണം. കൂറുമാറ്റ നിരോധന നിയമപ്രകാരമുള്ള പരാതിയില് തോമസ് ഉണ്ണിയാടനു തെളിവുകള് ഹാജരാക്കാന് 26ന് ഇരുകകക്ഷികളും നേരിട്ടു ഹാജരാകാനും സ്പീക്കര് നിര്ദേശം നല്കി.
ഹര്ജിക്കൊപ്പം സമര്പ്പിച്ച രേഖകളില് നിയമസഭാ സെക്രട്ടറി കൃത്രിമം നടത്തിയെന്ന ജോര്ജിന്റെ പരാതി സ്പീക്കര് പരിഗണിച്ചില്ല. ജോര്ജിനു തെളിവുകളും അഭിപ്രായവും സമര്പ്പിക്കാന് ആവശ്യത്തിനു സമയം അനുവദിച്ചെങ്കിലും അതിനു സാധിച്ചില്ലെന്ന് തീര്പ്പില് സ്പീക്കര് വ്യക്തമാക്കി.
സ്പീക്കറുടെ തീര്പ്പിനെതിരേ കോടതിയെ സമീപിക്കുമെന്ന് പി.സി. ജോര്ജ്ജ് പറഞ്ഞു. മാന്യനായ സ്പീക്കറുടെ തീര്പ്പ് അംഗീകരിക്കുന്നെന്നും എന്നാല് അതിനെതിരെ നിയമപോരാട്ടം തുടരുമെന്നും ജോര്ജ്ജ് പ്രതികരിച്ചു. നിയമസഭാ സെക്രട്ടേറിയറ്റിലെ ഉന്നത ഉദ്യോഗസ്ഥനും ഉണ്ണിയാടനും ചേര്ന്നു വ്യാജരേഖ ചമച്ചെന്ന തന്റെ പരാതി സ്പീക്കര് പരിഗണിച്ചില്ല.
ആ പരാതിയില് ഉന്നതതല അന്വേഷണത്തിനു ശേഷം മാത്രമേ അന്തിമ വിധി പാടുള്ളൂവെന്നായിരുന്നു തന്റെ ആവശ്യം. ഉണ്ണിയാടനും നിയമസഭാ ഉദ്യോഗസ്ഥനും ചേര്ന്ന് വ്യാജരേഖ ചമച്ചതിന്റെ തെളിവുകളും തന്റെ കൈയിലുണ്ട്. ജയിലില് പോകേണ്ട ക്രിമിനല് കുറ്റമാണ് ഇരുവരും ചെയ്തത്. വ്യാജരേഖ ചമച്ച സംഭവത്തില് ഇരുവര്ക്കുമെതിരേ ക്രമിനല് കേസ് നല്കുമെന്നും ജോര്ജ്ജ് പറഞ്ഞു.
സ്പീക്കറുടെ തീര്പ്പിനെതിരെ അടുത്തദിവസങ്ങളില്ത്തന്നെ ഹൈക്കോടതിയെ സമീപിക്കാനാണ് പി.സി. ജോര്ജ്ജിന്റെ തീരുമാനം. തടസ്സഹര്ജി തള്ളിയതോടെ കൂറുമാറ്റ നിരോധന നിയമപ്രകാരം ഉണ്ണിയാടന് നല്കിയ പരാതിയില് 26നു വാദം തുടങ്ങും.
പ്രതികരിക്കാൻ ഇവിടെ എഴുതുക: